Keçid linkləri

2024, 19 Mart, çərşənbə axşamı, Bakı vaxtı 12:06

Deputat da təkrarladı: 'Dövlət xəstəxanalarında xidmətin hamısı pulsuzdur'


Milli Məclisin Səhiyyə Komitəsinin üzvü Rafiq Məmmədhəsənov
Milli Məclisin Səhiyyə Komitəsinin üzvü Rafiq Məmmədhəsənov

Səhiyyə naziri korrupsiya ilə mübarizə tədbirlərinin gücləndirilməsinə dair əmr imzalayıb. Fevralın 20-də imzalanan sənəd «Korrupsiyaya qarşı mübarizə tədbirlərinin gücləndirilməsi barədə» adlanır.

AzadlıqRadiosu Milli Məclisin Səhiyyə Komitəsinin üzvü Rafiq Məmmədhəsənovdan müsahibə alıb.

Rafiq Məmmədhəsənov tibb elmləri doktoru, əməkdar elm xadimi, YAP siyasi şurasının üzvüdür.

Buna da bax:​ Sağlamlıq bahasına büdcəni yüngülləşdirmək

- Rafiq müəllim, səhiyyə naziri korrupsiya ilə mübarizənin gücləndirilməsini əmr edib. Sizcə, 250 manat maaş alan həkimin rüşvət almaması nə dərəcədə realdır?

- Nə “kaprizni” (şıltaq – red.) sual verirsən? (Gülür – red.). Cəmiyyətdə hərənin özünəuyğun maaşı-zadı var, nə olsun? Korrupsiya, həkimin rüşvət almağı... Dövlət xəstəxanalarında xidmətin hamısı pulsuzdur. Özəl xəstəxanalarda hər müayinənin, müalicənin öz qiyməti var. Necə müqayisə etmək olar? Xəstəxanaların əksəriyyəti dövlətin deyil, axı. Özəl xəstəxanalarda həkimlər nə maaş alır, neynir, - mən bilmirəm. Amma dövlət xəstəxanalarında müayinə pulsuzdur.

- Dövlət xəstəxanlarında rüşvət verilmədiyini deyirsiniz, amma Dünya Bankı bu yaxınlarda Avropa və Mərkəzi Asiyada təhsil və səhiyyə sahəsində ən rüşvətxor ölkələrin reytinqini hazırlayıb. Azərbaycan səhiyyədə rüşvətə görə ön sıradadır, üstəlik, burda 10 adamdan 9-u rüşvət verdiyini deyib...

- Mən bilmirəm o sorğunu kim keçirib, neyləyib. Ağıllarına gələni yazırlar. Onu bilmirəm. Ona görə də həmin sorğu ilə bağlı fikir bildirə bilmərəm. Hərə bir statistika qoyur, hərə bir sorğu keçirir. Kim, harda keçirib, doğrudanmı keçirib? O suala cavab vermək istəmirəm.

Buna da bax: Xəstənin pul kisəsi tükənsə də, özü sağalmır

- Nazir rüşvətlə, korrupsiyayla bağlı mübarizəni gücləndirmək əmrini imzalayırsa, deməli, dövlət xəstəxanalarında rüşvət var ki bu addımı atır, deyilmi?

- Ölkədə görmürsünüz bu istiqamətdə hansı iş aparılır? Rabitə Nazirliyinin işidir, keçmiş Milli Təhlükəsizlik Nazirliyindəki haqq-hesablardır, görmürsünüz? Bu nazirliklərdə olan işlərin hamısı məhkəmədədir də. Bu əmr də profilaktik məqsədlə verilib...

- Rafiq müəllim, sizcə, səhiyyədə rüşvətin kökünü kəsmək üçün neyləmək lazımdır?

- Qurtardıq. Mən o işlərlə məşğul olmuram, vəssalam.

Rafiq Məmmədhəsənovla AzadlıqRadiosu əməkdaşının söhbəti burda bitir. Daha doğrusu, deputat telefonu söndürməklə söhbəti birtərəfli qaydada bitirir.

Buna da bax:​ Onkoloji xəstə: ‘Pulum olmadığına görə 'kimyaterapiya lazım deyil', dedilər’

Bir gün öncə 1 saylı Kliniki Tibbi Mərkəzin ("Semaşko") baş həkimi Ədalət Dadaşov “Report”a müsahibəsində deyib ki, mərkəzdə “xəstələri pulsuz müalicə edirlər”. Onun bu açıqlaması sosial şəbəkələrdə tikanlı qarşılanıb və müzakirələrə yol açıb.

Qadir İbrahimli yazır: “Semaşko xəstəxanasında həqiqətən rüşvət yoxdur, xəstəm olub, Semaşkoya aparmışam, həkim dedi ki, müəllim, 600 manat ver, tibb bacıları da, sanitarlar da mənlikdir, daha heç kimə 1 qəpik də vermə. Doğrudan da heç kim əlavə pul istəmədi məndən”.

Buna da bax: Baş pediatr: «Rüşvət» sözü Azərbaycan səhiyyəsinə uyğun gəlmir

Elçin Həsənzadə belə bir status paylaşıb: “Müalicəyə pul tapa bilməyən və ya səhhətində problem olan dostlarım, "Semaşko"nun baş həkimi Ədalət Dadaşov deyir ki, “xəstələri pulsuz müalicə edirik”. Günü sabahdan utanmayın gedin "Semaşko"da həkim müayinəsinə. Pul istəsələr də verməyin, haqınızı tələb edin”.

Tünzalə Rafiqqızı yazır: “Tapın, görüm, bu yalanın rəngi nədir? Ağ, qırmızı?! Tapana “Semaşko”da “çekap” müayinə mənim şotuma!”

Səhiyyə Nazirliyi mətbuat xidmətinin sözçüsü Liya Bayramova da mediaya açıqlamasında dövlət xəstəxanalarında müalicənin pulsuz olduğunu bildirib.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

Abunə

XS
SM
MD
LG