Keçid linkləri

2024, 19 Mart, çərşənbə axşamı, Bakı vaxtı 08:07

Britaniyada iqtidar və müxalifət deputatları anti-Breksit koalisiyası yaradırlar


Anti-Breksit fəalı
Anti-Breksit fəalı

Britaniyadan alınan xəbərlərə görə hakim və müxalfət partiyalarından ölkənin Avropa İttifaqından ayrılmasına qarşı olan millət vəkilləri anti-Breksit koalisiya hökumətinin yaradılması üçün qüvvələrini birləşdirmək əzmindədirlər.

Reuters agentliyi xəbər verir ki, bu koalisiyanın əsas vəzifəsi Britaniyanı razılaşmalı və ya razılaşmasız Avropa İttifaqından çıxaracağını söyləyən baş nazir Boris Johnson-u vəzifəsindən kənarlaşdırmaqdır.

Avropa İttifaqı Britaniyaya bu bloku tərk etmək üçün oktyabrın 31-dək vaxt verib. Bu müddət ərzində London və Brüssel Britaniyanın ittifaqdan ayrılmasını tənzimləyən saziş barədə razılığa gəlməlidirlər.

Lakin baş nazir Johnson deyib ki, o ölkəni sazişli və ya sazişsiz həmin müddətədək Aİ-dən çıxarmaq əzmindədir.

Burası da var ki, Boris Johnson-un parlamentdəki işçi çoxluğu yalnız bir mandat fərqi ilədir və onun partiyadaşlarından bəziləri lazım gələrsə, onun hökumətinə etimad səsi verməyəcəklərini deyiblər.

Hakim Mühafizəkar və müxalif Leyborist, habelə Liberal-Demokrat partiyalarından olan bir çox millət vəkillərinin fikrincə, Britaniyanın Avropa İttifaqından razılaşmasız çıxması ölkə iqtisadiyyatı üçün fəlakətli ola bilər.

Reuters yazır ki, anti-Breksit siyasətçiləri hələlik vahid strategiyanı müəyyən etməyiblər.

Ana müxalifət partiyası olan Leyborist Partiyasının lideri Jeremy Corbyn keçid baş naziri vəzifəsinə öz namizədliyini təklif edib və bundan sonra parlament seçkisinin keçirilməli olduğunu deyib.

Lakin Britaniyanın Avropa İttifaqından sazişsiz çıxışına qarşı olanların bir çoxu bu qənaətdədir ki, qatı solçu olan Corbyn hökumətin tərtibi üçün başqa partiyalardan kifayət qədər dəstək ala bilməyəcək.

Avropayönlü liberal-demokratların lideri Jo Swinson keçid hökuməti başçılığına ya mühafizəkar Kenneth Clarke-ın, ya da leyborist Harriet Harmanın namizədliyini təklif edib.

Onların hər ikisi keçmiş nazirlərdir.

Avqustun 16-da Swinson BBC-yə deyib ki, o sözü gedən millət vəkillərinin hər ikisi ilə söhbət edib və onlar bu təklifi qəbul etməyə hazır olduqlarını bildiriblər:

“Onlar ictimai vəzifələrini üstün tuturlar və sazişsiz Breksitə qarşıdırlar. Əgər İcmalar Palatası onlardan fövqəladə hökumətə başçılıq etmələrini rica etsə, bu siyasətçilər ölkəmizi Breksit hərc-mərcliyindən qurtara bilrələr...”

Veteran siyasətçi Clarke Margaret Thatcher, John Major və David Cameron-un hökumətlərində nazir postlarını tutub.

Harman parlamentin veteran üzvüdür və bir müddət Leyborist Partiyası liderinin əvəzi kimi fəaliyyət göstərib.

Reuters yazır ki, Britaniya parlamentində ölkənin Avropa İttifaqından sazişsiz çıxışını istəməyən millət vəkilləri çoxluq təşkil edirlər. Baş nazir Johnson isə Avropa İttifaqından bütün hallarda çıxışın tərəfdarıdır. Belə situasiyada Britaniyada siyasi böhran yarana bilər.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

Abunə

XS
SM
MD
LG