Ermənistan Xarici İşlər Nazirliyinin mətbuat katibi Tiqran Balayan Türkiyə xarici işlər naziri Mevlüt Çavuşoğlunun bəyənatını şərh edərkən deyib ki, Türkiyə Qarabağ münaqişəsinin tənzimlənməsi prosesindən kənarda dayanmalıdır.
Bundan əvvəl Çavuşoğlu demişdi ki, Qarabağ münaqişəsi Qafqazın təhlükəsizliyini təsirləndirən məsələdir və Rusiya bu münaqişənin nizamlanması istiqamətində səylər göstərir.
Türkiyə xarici işlər naziri bildirmişdi ki, Türkiyə də bu prosesə öz töhfəsini verə bilər.
Çavuşoğlu “Akşam” qəzetinə verdiyi müsahibədə iddia etmişdi ki, Qarabağ münaqişəsinin çözümü üçün Türkiyənin təklifləri də Rusiyanın təkliflərinə bənzəyir.
“Türkiyə Dağlıq Qarabağ tənzimləməsi prosesinə bircə halda, bu məsələdən aralıda dursa fayda verə bilər” - deyib Balayan.
Sözçü əlavə edib ki, “Çavuşoğlunun sələfi də belə təşəbbüslərdə bulunmuşdu, sonu hamıya bəllidir”.
Ermənistan və Türkiyə arasında diplomatik münasibətlər yoxdur və iki ölkənin sərhədi Ankaranın təşəbbüsü ilə 1993-cü ildən bağlıdır.
Ermənistan tərəfi Türkiyəni “erməni soyqırımında” ittiham edir və bu qənaətdədir ki, Ankara Ermənistan-Azərbaycan münaqişəsinin çözümündə neytral ola bilməz.
Türkiyə Dağlıq Qarabağ tənzimləməsi prosesinə bircə halda, bu məsələdən aralıda dursa fayda verə bilər
Ermənistan mediası xatırladır ki, iki ölkə arasında münasibətlərin normallaşmasına 2008-ci ildə başlanmışdı.
2009-cu ilin 10 oktyabrında Ermənistan və Türkiyənin xarici işlər nazirləri diplomatik münasibətlərin qurulması və ikitərəfli əlaqələrin genişləndirilməsi barədə protokol imzalamışdılar.
“Sürix protokolu” kimi tanınan bu sənəd Azərbaycan tərəfindən narazılıqla qarşılanmışdı.
Lakin sonradan iki ölkənin parlamentləri bu sənədi ratifikasiya etməkdən boyun qaçırdı.
2010-cu ilin 22 aprelində prezident Sarkisyan protokolun ratifikasiya prosesinin dayandırılması barədə fərman imzaladı.
