Keçid linkləri

2017, 18 Avqust, Cümə, Bakı vaxtı 03:24

Vaşinqton Azərbaycanda saytların bloklanmasından narahatdır


Roger Wicker

ABŞ-ın Helsinki Komissiyasının rəhbəri Roger Wicker Azərbaycanda bir neçə müstəqil saytın bloklanmasından narahatlığını bildirib.

«Turan» İnformasiya Agentliyinin xəbərinə görə, məhkəmənin bu yaxınlardakı qərarını şərh edərkən senator deyib:

«Bu, ciddi narahatlıq doğurur və biz bu barədə ən yüksək səviyyədə hakimiyyətlə söhbət edəcəyik».

Agentliyinin xəbərinə görə, oxşar narahatlığı Dövlət Departamentinin yüksəkvəzifəli nümayəndələrindən biri də bildirib.

«Biz dost hesab etdiyimiz ölkələrdə mətbuat azadlığının vəziyyətinin daim pisləşməsindən narahatıq. Biz araşdırma jurnalistikasının və azad medianın rolunu, önəmini yaxşı baş düşürük», - deyə agentliyə adının çəkilməsini istəməyən nümayəndə vurğulayıb.

Mayın 12-si Səbail rayon Məhkəməsinin qərarı ilə Azərbaycanda fəaliyyət göstərən bir neçə müstəqil sayt bloklanıb.

Söhbət AzadlıqRadiosunun azadliq.org, «Azadlıq» qəzetinin azadliq.info, MeydanTV-nin, TuranTV-nin və «Azərbaycan saatı» televiziya proqramının saytlarından gedir.

Məhkəmə qərarı Nəqliyyat, Rabitə və Yüksək Texnologiyalar Nazirliyinin iddiası əsasında verilib. Nazirliyin iddia tələbi qismən təmin olunub. İddia ərizəsində adları çəkilənlərlə yanaşı, bu informasiya resurslarına girişi mümkün edən başqa saytların da bloklanması istənilirdi.

Nazirlik iddiasının Baş Prokurorluğun müraciətinə söykəndiyini bildirib. Müraciətdə sözügedən saytlarda dövlətin maraqlarına ziyan vuran bir sıra yazıların yayıldığı iddia edilib. Ancaq müdafiə tərəfi məhkəmə prosesində iddiaların əsassız olduğunu bəyan edib.

Sənin fikrin

Şərhləri göstər

Günün bütün mövzuları

XS
SM
MD
LG