“Azadlıq” qəzetinin yayım direktoru və AXCP sədrinin köməkçisi Faiq Əmirlinin mədəsindəki ağrılar artıb.
Bu haqda onun xanımı Lalə Əmirli məlumat yayb.
L.Əmirli bildirib ki, həyat yoldaşı onunla telefon danışığı zamanı mədəsində kəskin ağrıların yenidən artdığını bildirib.
Vəkil Aqil Layıcov AzadlıqRadiosuna deyib ki, Faiq Əmirli mədə xorasından əziyyət çəkir:
"Bu xəstəlik daimi, sabit rejim və yüksək səviyyəli müalicə tələb edir. Belə xəstələr ev yeməyilə təmin edilməldir ki, xəstəlik hər hansı fəsad törətməsin. Bu şərait hələ ki, yoxdur. Ona görə xəstəlik özünü açıq-aşkar göstərir”.
A.Layıcov F.Əmirlinin Penitensiar Xidmətin müalicə müəssisəsinə getməməsinə də aydınlıq gətirib:
“Bu haqda F.Əmirlinin özü ilə danışdım. Dedi ki, ora gedib başqa bir xəstəliyə tutulmaq istəmir. Çünki məhbuslar arasında həmin müəssisədə yolxucu xəstəliyi olanlarla digər xəstələrin bir yerdə saxlanması xəbərləri dolaşır”.
A.Layıcov saysız müracətlərinə baxmayaraq, F.Əmirlinin maşının hələ də ailəsinə qaytarılmadığını da bildirib.
F.Əmirli avqustun 20-də saxlanılıb. Ona qarşı Cinayət Məcəlləsinin (milli, irqi, dini düşmənçilik salmaq) 283-2-ci maddəsilə ittiham irəli sürülüb. Avqustun 22-də isə 168.1-ci maddə ilə (dini məzhəbləri yaymaq) ittiham verilib.
F.Əmirli ittihamları qəbul etmir. Buna görə istintaqa hər hansı ifadə vermir.