Bu günki AzadlıqLive-da:
Transparency İnternational: "Azərbaycan Qafqazın korrupsiya çempionudur"
Human Rights Watch: "Amansız repressiyalar"
Freedom House: "Neftin qiyməti düşdükcə, azadlıq azalır"
Beynəlxalq hesabatlara Azərbaycanda reaksiyalar-
AXCP sədri Əli Kərimli: "Korrupsiya Azərbaycanda idarəçilik prinsipidir"
Korrupsiyaya Qarşı Mübarizə Fondunun icraçı direktoru Vasif Mövsümov: "Adamların korrupsiyaya qarşı müqaviməti artır"
Milli Məclisin vitse-spikeri Bahar Muradova: "Freedom House qərəzlidir"
Müsavat başqanı Arif Hacılı: "Son bir ildə vəziyyət daha da pisləşib"
Israildən Türkiyəyə İŞİD ittihamı
İsrailin müdafiə naziri Türkiyəni, özünü İslam Dövləti adlandıran təşkilatdan neft almaqla onu maliyyələşdirməkdə ittiham edib.
Afinada çıxış edən Moshe Yaalon deyib ki, İŞİD öz neftini Türkiyəyə çox uzun müddətdə satıb.
Türkiyə İŞİD-lə hər hansı neft sövdələşməsində olduğu barədə iddiaları rədd edir və ABŞ Rusiyanın belə ittihamlarının təkzib olunmasında Ankaranın tərəfini saxlayır.
“Terrora qarşı hər hansı formada iştirak edib-etməmək Türkiyənin, Türkiyə hökumətinin və Türkiyə rəhbərliyinin öz işidir” – deyib İsrailin müdafiə naziri.
"Azpetrol" işçisi danışdı
Başda general Məhərrəm Əliyevin idmançı qohumu İsa Əzizov olmaqla bir qrup idmançı tərəfindən yanvarın 26-da gecə iş yerində döyülən «Azpetrol» yanacaqdoldurma məntəqəsinin mühafizəçisi başına gələnləri azvizision.az saytına danışıb.
Deyib ki, «Bentley» markalı maşın yanacaqdoldurma məntəqəsinə gəlib. Sürücü 100 manatlıq benzin sifariş verib. Maşınlarına benzin doldurulsa da, ödəniş etməkdən boyun qaçırıblar: «Mən onlara yaxınlaşıb, nə baş verdiyini soruşdum. Onlardan sayğacda göstərilən məbləği ödəməyi xahiş etdim. Maşından düşən oğlanlar mənə hücum etməyə başladılar. POS-terminalı götürüb başıma vurdular. Onlar içkili idilər. Sürücü qışqırırdı ki, «siz kimsiniz bizi gözlədirirsiniz? Hamınızı güllələyərəm, Bakıda heç kim qabağımda duran bilməz. Sizi pulla basdıraram». Onları sakitləşdirməyə çalışırdım. Aramızda mübahisə düşəndən bir neçə dəqiqə sonra «Prado» markalı maşın gəldi. Maşından düşən idmançılar da mənə hücum etdi».
Bu hadisə prezident İlham Əliyevin harınlıq edən məmurlara və onların yaxınlarına etdiyi növbəti sərt xəbərdarlıqla eyni gündə baş verib.
Azərbaycan 4 milyard təcili borc alır?
Beynəlxalq Valyuta Fondu (BVF) və Dünya Bankının (DB) nümayəndələri 4 milyard dollar məbləğində mümkün təcili borc paketinin müzakirəsindən ötrü Azərbaycana rəsmi səfərə gələcəklər. Xəbəri «The Financial Times» qəzeti yayıb.
Xəbərdə vurğulanır ki, bu kredit neft qiymətlərinin düşməsi səbəbindən maliyyə yardımının göstərilməsi proqramı seriyasından birinci olacaq. BVF təmsilçisi bildirib ki, nümayəndə heyəti ölkə hakimiyyətinin xahişi ilə yanvarın 28-dən fevralın 4-nə kimi Bakıda səfərdə olacaq. Səfər zamanı «texniki yardım» və «mümkün maliyyə tələbatlarının qiymətləndirilməsi»nin müzakirə ediləcəyi deyilir. Müzakirəylə tanış mənbənin bildirdiyinə görə, 4 milyard dollarlıq paketdən söhbət gedir.