Dağlara 40 sm qar yağıb
Yanvarın 25-i səhərədək ölkə ərazisində hava şəraiti kəskin dəyişib, yağış, sulu qar, qar yağıb, bəzi yerlərdə intensiv olub.
Düşən yağıntının miqdarı Lənkəran-Astara zonasında 3-24, Böyük Qafqazda 1-17, Kiçik Qafqazda 5-6, Mərkəzi-Aran rayonlarında 3-15, Qazax-Gəncə zonasında 3-9, Naxçıvan MR-da 1-7, Bakıda və Abşeron yarımadasında 1-6 mm olub.
Məlumatı Ekologiya və Təbii Sərvətlər Nazirliyinin Milli Hidrometeorologiya Departamenti yayıb.
Qar örtüyünün hündürlüyü hazırda dağlıq rayonlarda 12-41, dağətəyi rayonlarda 1-9 sm-ə çatıb. Şimal-qərb küləyi ayrı-ayrı yerlərdə güclənib.
2 ildir maaş ala bilmirlər
Yanvarın 25-də Daşkəsən Mədən Zavodunun onlarla işçisi Əmək və Əhalinin Sosial Müdafiəsi Nazirliyinə gəlib. Onlar 2 ildir əməkhaqqı ala bilmədiklərinə etiraz edirlər.
Etirazçılardan bir qismini nazirlikdə qəbul ediblər. Əraziyə Çevik Polis Alayının əməkdaşları gətirilib.
Lənkəranda 16 günlük xalq hakimiyyəti ... 1990-cı ilin yanvarı
Sovet ordusu 1990-cı il yanvarın 20-də Bakıda qırğın törətdikdən sonra Azərbaycanın bölgələrinə də keçdi. Cəlilabad rayonunda həbslər aparıldı, Neftçala rayonunda iki nəfər həlak oldu. Yanvarın 25-dən 26-na keçən gecə sovet ordusu Lənkəran şəhərinə girdi. Şahidlərin dediklərinə görə, şəhərin mühasirəsinə 4 minə yaxın hərbiçi cəlb edilmişdi.
“2016-cı ildə Azərbaycanda inflyasiya 10 -12% səviyyəsində proqnozlaşdırılır”.
Bunu maliyyə naziri Samir Şərifov ANS telekanalına müsahibəsində deyib.
Maliyyə nazirin sözlərinə görə, bu, ölkənin İqtisadiyyat Nazirliyi tərəfindən hazırlanmış yeni sosial-iqtisadi inkişaf konsepsiyasında nəzərdə tutulub: "Manatın devalvasiyası istehlak bazarında qiymətlərə təsir edib. Ona görə də bu il inflyasiya 10-12% səviyyəsində gözlənilir".
2015-ci ildə ölkədə inflyasiya 4%, 2014-cü ildə 1,4%, 2013-cü ildə 2,4%, 2012-ci ildə 1,1%, 2011-ci ildə 7,9%, 2010-cu ildə isə 5,7% olub. Ötən il ərzaq malları 6,1%, qeyri-ərzaq malları isə 3,8% bahalaşıb.
Pullu xidmətlər üzrə tariflər isə 1,2% bahalaşıb.