Suriyanın şimalında Türkiyə qoşunlarının hücumu altında olan kürd anklavının əhalisi şəhərin mərkəzi hissəsindən ətraf kəndlərə köçməyə başlayıb .
Ərəb və Türkiyə telekanalları Afrinin mərkəzini maşınlarda və piyada tərk edən adamları göstərir.
Associated Press agentliyi xəbər verir ki, Türkiyə qoşunlarının hücumu martın 14-dən bəri şiddətlənib. Həmin gün Türkiyə prezidenti Recep Tayyip Erdoğan Afrinin axşamadək tam mühasirəyə alınacağına ümid etdiyini bildirmişdi.
Martın 14-də şəhər mərkəzinin atəşə tutulması nəticəsində 7 nəfərin həlak olduğu xəbər verilib.
Bu arada prezidnet Erdoğan Suriyadakı kürd anklavına hücumun dayandırılmasına Avropadan ucalan çağırışları rədd edib.
AP xəbər verir ki, Avropa Parlamenti Suriya ilə bağlı qətnamə layihəsinin müzakirəsinə hazırlaşır.
Türkiyə mediasında yayılan xəbərlərə görə bu qətnamədə Türkiyənin Suriyadakı hücumuna son qoymasının və Türkiyə qoşunlarının Afrindən çıxarılmasının tələb olunacağı gözlənilir.
Erdoğan Avropa Parlamentinə müraciətlə demişdi ki, Türkiyənin Suriyadakı hücum əməliyyatı məqsəd əldə edilənədək dayandırılmayacaq.
Türkiyə Afrin anklavı üzərinə hücum əməliyyatına yanvarın 20-də başlayıb.
