Keçid linkləri

2024, 29 Mart, Cümə, Bakı vaxtı 04:27

Açıq Hökumətin “Yol xəritəsi” müzakirə edilib


Bu gün, fevralın 27-də Bakıda Azərbaycanda Açıq Hökumətin təşviqinə dair 2019-2022-ci illər üzrə Milli Fəaliyyət Planının hazırlanmasından ötrü "Yol xəritəsi"nin müzakirəsi keçirilib.

Tədbirdə vurğulanıb ki, vətəndaş cəmiyyəti institutlarından ötrü əlverişli mühitin yaradılması, ədalət mühakiməsinin səmərəliliyinin və informasiyaya əlçatanlığın artırılması Milli Fəaliyyət Planının əsas prinsipləri olmalıdır. Bura habelə, maliyyə şəffaflığı, korrupsiya ilə mübarizədə qanunvericiliyin təkmilləşdirilməsi və bir sıra başqa məsələlər də aid edilib.

Tədbirə Korrupsiyaya Qarşı Mübarizə üzrə Komissiyanın katibi, Vətəndaş Cəmiyyəti Platformasının üzvüləri, müstəqil ekspertlər və beynəlxalq təşkilatların nümayəndələri qatılıblar.

Korrupsiyaya Qarşı Mübarizə üzrə Komissiyanın katibli Kamal Cəfərov deyib ki, Azərbaycan hökuməti Beynəlxalq Açıq Hökumət Təşəbbüsü çərçivəsində mühüm işlər həyata keçirib və yeni plan qəbul edildikdən sonra da bu sahədə işlər görəcək.

O vurğulayıb ki, Azərbaycanda elektron xidmətlərin yaradılması, təkmilləşdirilməsi, maliyyə şəffaflığının təmin edilməsi, açıq məlumat bazalarının yaradılması və korrupsiyaya ilə mübarizə sahəsində həyata keçirilən tədbirlər yüksək səmərə verir.

"Konstitusiya Araşdırmaları" Fondunun prezidenti Əliməmməd Nuriyev isə qeyd edib ki, Milli Fəaliyyət Planı açıq hökumət islahatlarının genişlənməsindən ötrü geniş platforma yaradır.

Onun bildirməsinə görə, dövlət orqanlarının fəaliyyətində şəffaflıq, hesabatlılığın artırılması, ASAN Xidmət təcrübəsinin daha geniş arealı əhatə etməsinə nail olunması və innovasiyaların tətbiqi yeni hazırlanacaq fəaliyyət planının əsas prioritetləridir.

2019-2021-ci illər üzrə Milli Fəaliyyət Planının “Yol xəritəsi” müzakirəyə təqdim olunub.

Müzakirələrdə qeyri hökumət təşkilatlarının qeydiyyatının asanlaşdırılması, qrant layihələri ilə bağlı mühütün liberallaşdırılması, azad medianın rolunun artırılması və başqa məsələlər diqqət mərkəzində olub.

Müzakirələrdən sonra Əliməmməd Nuriyev deyib ki, hazırda işçi qrupda 58 vətəndaş cəmiyyəti institutu iştirak edir.

Onun vurğulamasına görə, qarşıdakı müzakirələrdə işçi qrupda olan və ya olmayan vətəndaş cəmiyyəti institutları da iştirak edə bilər.

Xatırlatma

Açıq Hökumət Tərəfdaşlığı (Open Government Partnership - OGP) Rəhbər Komitəsi ötən il dekabrın 5-i və 6-da Vaşinqtonda keçirilən toplantısında Azərbaycanın qurumdakı üzvlüyünü qeyri-aktiv statusda saxlayıb.

Komitənin məlumatında bildirilib ki, Azərbaycana daha iki il vaxt verilir, həmin müddətdə hökumət fəaliyyət planı hazırlayıb icra etməlidir.

Sənəddə OGP-nin Azərbaycanın qurumda saxlanmasından ötrü 2 il ərzində icra edilməli olan 5 şərti sadalanır.

Birincisi, Azərbaycan OGP-nin ölçülərinə uyğun olaraq, 2019-2021-ci illəri əhatə edəcək fəaliyyət planı üçün “Yol xəritəsi” hazırlayıb təqdim etməlidir. Fəaliyyət planının hazırlanması prosesi bütün maraqlı tərəfləri əhatə etməlidir.

Qalan şərtlərdə də qeyd edilir ki, planın hazırlanması və onlara çatdırılması 2019-cu ilin sonuna kimi baş verməlidir. Sonuncu şərt fəaliyyət planının tam icra edilməsi ilə bağlıdır. Azərbaycan şərtlərə əməl etməzsə, onun OGP üzvlüyü məsələsinə baxılacaq.

OGP hökumətlərin hesabatlı və şəffaf idarə edilməsini hədəf götürən beynəlxalq təşəbbüsdür. Qurucuları arasında ABŞ və Böyük Britaniyanın da olduğu OGP 2011-ci ilin sentyabrında yaradılıb. Azərbaycan bu təşəbbüsə 2011-ci ildə, öz istəyi ilə ilk qoşulan ölkələrdən olub.

Təşəbbüsün tarixində birlikdəki statusu “qeyri-aktiv” elan edilən ilk ölkə də məhz Azərbaycandır. Bu, 2016-cı ilin martında baş verib.

OGP 2017-ci ilin iyununda Vaşinqtonda keçirilən toplantısında Azərbaycanın qurumdakı qeyri-aktiv statusunu daha bir illiyə uzatmışdı.

Buna səbəb kimi ölkədə vətəndaş cəmiyyətindən ötrü mühitin yaxşıya doğru dəyişməməsi göstərilirdi.Verilən tövsiyələr yerinə yetirilmədiyi halda ölkə qurumdan birdəfəlik çıxarıla bilər.

XS
SM
MD
LG