Trampa görə, İran 'bir neçə gün əvvəl' təslim olmalı idi
ABŞ İranı tamamilə darmadağın edib, Tehran "bir neçə gün əvvəl" təslim olmalı idi, - ABŞ prezidenti Donald Tramp Mayamidəki otelində mətbuat konfransında bildirib.
"İran böyük və güclü ölkə olmalı idi. Biz onları dəhşətli dərəcədə darmadağın etdik. Nə vaxt "təslim oluruq" deyəcəklərini bilmirəm, amma bunu iki gün əvvəl etməli idilər, elə deyilmi?", - Tramp sual edir.
Onun sözlərinə görə, İranın "heç nəyi qalmayıb".
Bundan əvvəl, martın 6-da Tramp İranla qeyd-şərtsiz kapitulyasiyadan başqa heç bir razılaşma olmayacağını bildirmişdi.
Tramp Putinə zəng edib
Rusiya prezidentinin köməkçisi Yuri Uşakovun sözlərinə görə, ABŞ tərəfinin təşəbbüsü ilə baş tutan birsaatlıq söhbətdə əsas diqqət İran və Ukrayna ətrafındakı münaqişələrə, Venesueladakı vəziyyətə yönəlib.
Söhbət zamanı Putin "İran münaqişəsinin tezliklə siyasi-diplomatik həllinə yönəlmiş bir sıra fikir və mülahizələrini səsləndirib". O, Fars körfəzi ölkələrinin liderləri, İran prezidenti Pezeşkian və bir sıra digər ölkələrin liderləri ilə təmaslar barədə məlumat verib.
Təfərrüatlar məlum deyil. Amerika tərəfi hələlik söhbətlə bağlı məlumat yaymayıb.
Tramp CBS-ə müsahibəsində: 'Müharibə tezliklə bitə bilər'
ABŞ prezidenti Donald Tramp "CBS News" müxbiri Vey Cyana müharibənin tezliklə bitə biləcəyini söyləyib. Müxbir X hesabında ABŞ prezidentindən sitat gətirir: "Düşünürəm ki, müharibə, demək olar ki, bitib. Onların nə donanması, nə rabitəsi, nə də hava qüvvələri var".
Trampın İrandakı müharibənin "tezliklə" bitəcəyini deməsindən sonra "Brent" markalı neftin qiyməti 85 dollara düşüb.
Bu azərbaycanlıların Dubaydan təxliyə edilə bilmədiyi deyilir
Dubayda yaşayan Qəmər Babayeva təəssüflənir ki, heç də hər kəs təxliyə oluna bilmir. Təxliyə üçün yalnız AZAL və "Air Arabia" şirkətlərinə aid biletləri olanlar qeydiyyatdan keçə bilərlər: "Səfirlik, konsulluq vətəndaşların təhlükəsizliyi baxımından uçuş təşkil edirsə, bu, kommersiyayönümlü olmamalıdır".