İranda keçirilən parlament seçkilərinin nəticələri göstərir ki, prezident Mahmud Əhmədinejadın müttəfiqləri qələbə çalıblar. Parlamentdə yerlərin 67-ni prezidentin müttəfiqləri, 46-nı isə onu tənqid edən mühafizəkarlar tutublar.
İslahatçıların 30 yeri var. Siyasi meylləri tam məlum olmayan müstəqillər isə 42 yerə sahib olublar.
İranın Daxili İşlər Nazirliyinin verdiyi məlumata görə seçicilərin 63 faizi iştirak edib. İslahatçıların liderləri və müstəqillər deyirlər ki, seçki ədalətli keçməyib.
Avropa Birliyi də seçkilərin demokratik olmadığı barədə bəyanat verib. Sənəddə bildirilir ki, səslərin sayılması proseduru beynəlxalq standartlara cavab verməyib.
İran parlamentinə seçkilər martın 14-də keçirilib və 4500 namizəd mübarizə aparıb.
Bu ölkənin məhkəmələri əksəriyyəti islahat meylli olan 1700 namizədin seçkidə iştirakına imkan verməyib.
