Qənimət Zahidlə həmrəylik üçün daha 4 jurnalist aclıq aksiyasına qoşulub. Bunlar «Yeni Müsavat» qəzetinin əməkdaşları Elşad Məmmədli, Aytən Həsənova, «Gündəlik Azərbaycan» qəzetinin şef redaktoru Şahvələd Çobanoğlu və «24 saat» qəzetindən Fikrət Fərəməzoğludur.
Bunu «Azadlıq» radiosuna «Yeni Müsavat»ın redaktoru Azər Ayxan deyib. Onun sözlərinə görə, dekabrın 10-dan aclığa başlayan «Yeni Müsavat»ın baş redaktoru Rauf Arifoğlu hələ də aksiyanı davam etdirir.
«Azadlıq» qəzetinin həbsdə olan baş redaktoru Q.Zahid dekabrın 8-dən aclıq aksiyasına başlayıb. Baş redaktor mətbuata basqılara son qoyulması tələbilə müddətsiz aclıq etmək niyyətindədir.
Qənimət Zahid qəsdən sağlamlığa az ağır zərər vurma və xuliqanlıq maddələri ilə ittiham olunur.
