Noyabrın 29-da Avropa İnsan Haqları Məhkəməsində (AİHM) Azərbaycanla bağlı daha bir şikayətə baxılıb. APA -nın məlumatına görə, özünü separatçı «Talış-Muğan Respublikası»nın prezidenti kimi təqdim edən Ələkrəm Hümmətovun şikayətinə baxılıb və qərar verilib.
AİHM Ə.Hümmətovla bağlı Avropa İnsan Haqları Konvensiyasının 3-cü (qeyri-insani rəftardan qorunmaq), 13-cü (şikayətə baxılan zaman ölkə daxili hüquq müdafiə vasitələri səmərəli deyil) və 6-cı maddəsinin 1-ci paraqrafının (ədalətli məhkəmə hüququ) pozulduğunu bildirir. Məhkəmənin qərarına görə, Azərbaycan dövləti Ə.Hümmətova mənəvi zərərə görə 12 min avro, çəkilmiş əlavə xərclərə görə isə 2090 avro təzminat ödəməlidir. Bu məbləğ məhkəmənin qərarından sonrakı 3 ay ərzində ödənilməlidir.
Ə.Hümmətov ərizəsində Azərbaycanda həbsdə olduğu dövrdə ona qarşı münasibətdə Avropa İnsan Haqları Konvensiyasının 3-cü (qeyri-insani rəftardan qorunmaq), 13-cü (şikayətə baxılan zaman ölkə daxili hüquq müdafiə vasitələri səmərəli deyil) və 6-cı maddəsinin 1-ci paraqrafının (ədalətli məhkəmə hüququ) pozulduğunu iddia edib. AİHM isə onun bu iddiasını təsdiqləyib.
Ə. Hümmətov 1993-cü ildə Lənkəranda separatçı «Talış-Muğan Respublikası» elan etdikdən sonra həbs olunub. O, 2005-ci ildə prezidentin fərmanı ilə əfv olunub və Azərbaycan vətəndaşlığından məhrum edildikdən sonra ölkəni tərk edib. Hazırda Ə.Hümmətov Hollandiyanın Haaqa şəhərində yaşayır.
Bu, Avropa İnsan Haqları Məhkəməsində Azərbaycanla bağlı çıxarılan sayca yeddinci qərardır.