İranın Təhsil Nazirliyinin Qərbi Azərbaycan vilayətindəki nümayəndəsi Həmid İbrahimi məktəblərin 70 faizində uşaqların səhiyyə xidmətindən məhrum qaldığını bildirib.
Qərbi Azərbaycan vilayətində məktəb uşaqlarının qida və səhiyyə şəraitini yoxlayan nazirliyin başqa bir işçisi Nazənin Gülzari qeyd edib ki, Qərbi Azərbaycanın 10 mahalının uşaq bağçaları və məktəblərində səhiyyə işçisi yoxdur. Bütün vilayətdə məktəb uşaqları üçün cəmisi 150 səhiyyə təlimatçısı var ki, onlar da 12 min uşağa baxmalıdır.
Oktyabrın 6-da vilayətin mərkəzi Urmiyədən «Fars» xəbər agentliyi»nə müsahibə verən xanım Gülzari bildirib ki, büdcə azlığı ucbatından məktəb uşaqlarının sağlamlıq durumu yoxlanılmır və valideynlərə də bu haqda lazımı təlimat verilmir.
Həmin hesabata əsasən vilayətin yoxsul məntəqələrində uşaqların çoxu dəri və göz xəstəliklərindən əziyyət çəkir. Xüsusi ilə məktəblilər arasında baş biti (pedikulus) geniş yayılıb.
İranın Təhsil Nazirliyinin Qərbi Azərbaycan vilayətindəki nümayəndəliyi bildirir ki, hazırda vilayətin 904 ucqar kəndi yalnız 275 məktəblə təmin edilir. Lakin, bu məktəblərin heç birisinin səhiyyə mürəbbisi yoxdur və gələn ilin büdcəsində də səhiyyə xidmətlərinin yüksəldilməsi üçün heç nə nəzərdə alınmayıb.
