«Azərbaycanda mətbuatın durumu ilə bağlı ötən ay Bakıda olmuş BMT baş katibinin xüsusi nümayəndəsinin hesabatını gözləyirik. Ölkədə söz azadlığı sahəsindəki vəziyyətlə bağlı bizim mövqeyimizi həmin sənəd əks etdirəcək».
BMT-nin Azərbaycandakı rezident əlaqələndiricisi Bruno Pueza «Azadlıq» radiosunun «Azərbaycanda mətbuatın vəziyyətini necə qiymətləndirirsiniz» sualını cavablandırarkən belə deyib.
Cənab Pueza həmçinin sığınacaq almaq istəyən jurnalistlərin BMT-dən yardım istəməsinə də aydınlıq gətirib. O, bu işlə BMT-nin Qaçqınlar üzrə Ali Komissarlığının məşğul olduğunu və jurnalistlərin də ora yönəldildiyini deyib.
Bu günlərdə siyasi sığınacaq almaq istəyən «Gündəlik Azərbaycan», «Realnıy Azerbaydjan», «Azadlıq» və başqa qəzetlərin 20-dən artıq əməkdaşı BMT-nin Azərbaycandakı nümayəndəliyinə müraciət etmiş, Azərbaycanda səfirliyi olmayan ölkələrin onlara sığınacaq verməsində yardım etmələrini istəmişdilər. Jurnalistlər hələlik qurumun onların müraciətlərinə cavab vermədiyini bildirirlər.