Azərbaycanlı hüquq müdafiəçisi, İşgəncələr Əleyhinə Komitənin rəhbəri Elçin Behbudov «Əl-qaida» silahlılarının saxlandığı «Quantanamo» həbsxanasına gedə bilər.
Cənab Behbudov deyir ki, martın 12-də bu məsələ ilə bağlı ABŞ-ın Azərbaycandakı səfirliyində olub. Səfirlik əməkdaşları onun «Quantanamo»ya getmək istəyinə hər hansı bir etirazları olmadığını və rəsmi razılıq əldə olunması üçün müraciətin Vaşinqtona göndərildiyini bildiriblər.
E.Behbudov deyir ki, indiyə qədər «Qırmız Xaç», «Human Right Watch» və digər bir sıra beynəlxalq təşkilatların nümayəndələri həmin həbsxanada olublar. Bu baxımdan onun da «Quantanamo»ya baş çəkməsi mümkündür. Amma bütün bu məsələlər Vaşinqtondan veriləcək rəsmi cavabdan asılıdır.
