Tramp Ukrayna ilə bağlı 'çox vacib' qərarın anonsunu verdi
22 avqust
ABŞ prezidenti Donald Tramp yaxın iki həftə ərzində Rusiya və Ukrayna ilə bağlı mövqeyini müəyyənləşdirəcəyini bildirib. "Düşünürəm ki, iki həftədən sonra Rusiyanın və, düzünü desəm, Ukraynanın münasibətini anlayacağam.... Düşünürəm ki, nə edəcəyimizlə bağlı qərar verəcəyəm. Və bu, çox vacib bir qərar olacaq. İrimiqyaslı sanksiyalar da ola bilər, böyük tariflər də və ya hər ikisi. Ya da heç nə etməyəcəyəm və "bu, sizin müharibənizdir" deyəcəyəm", - Tramp Ağ evdə FIFA prezidenti Canni İnfantino ilə görüş zamanı jurnalistlərin suallarını cavablandırarkən deyib.
Onun sözlərinə görə, Putin və Zelenskinin sammitində iştirak edə bilərdi, lakin "çoxları bu görüşdən heç nə çıxmayacağını düşünür".
"Politico" yazır ki, Tramp danışıqlarda Moskvaya təzyiq göstərmək niyyətində deyil, hesab edir ki, Qərbin yardımından asılı olan Kiyev güzəştə getməli və sövdələşməyə razı olmalıdır.
Tramp Putinin Zelenskiyə münasibətindən danışıb
25 avqust
Rusiya prezidenti Vladimir Putinin ukraynalı həmkarı Volodimir Zelenskidən xoşu gəlmir. Bunu Amerika lideri Donald Tramp Ağ evdə fərmanlar imzaladıqdan sonra jurnalistin sualını cavablandırarkən deyib.
"Putin niyə Zelenski ilə görüşmək istəmir?", - jurnalist soruşub.
"O onun xoşuna gəlmir. Onu sevmir", - Tramp cavab verib.
Avqustun 19-da Tramp Putinin Zelenski ilə görüşünün razılaşdırıldığını və sammitə hazırlıqlara başlandığını açıqlayıb. Kreml görüşlə bağlı razılığı təsdiqləmir.
Tramp Ukraynaya da sanksiyaları mümkün sayır
27 avqust
ABŞ təkcə Rusiyaya deyil, Ukraynaya da sanksiyalar və gömrük rüsumları tətbiq edə bilər. Bunu ABŞ lideri Donald Tramp Ağ evdə prezident kabinetinin iclası zamanı jurnalistlərin suallarını cavablandırarkən deyib.
Rusiya ilə Ukrayna arasında sülh razılaşması olmasa, "ciddi tədbirlər görüləcək" deyən Tramp söhbətin iqtisadiyyatdan getdiyini və Birləşmiş Ştatların dünya müharibəsinə girmək istəmədiyini vurğulayıb. Bununla belə, o, sanksiyaları "iqtisadi müharibə" kimi xarakterizə edib.
"Zelenski də tamamilə günahsız deyil", - Tramp əlavə edib.
Makron Ukraynaya qoşun göndərməyə hazır ölkələrin sayını açıqlayıb
4 sentyabr
Birləşmiş Ştatların Ukraynaya təhlükəsizlik zəmanətləri ilə bağlı dəstəyinin yekun forması yaxın günlərdə müəyyənləşəcək. Bunu Fransa prezidenti Emmanuel Makron Parisdə "istəklilər koalisiyası"nın iclasından sonra deyib.
Sammit zamanı iştirakçılar ABŞ prezidenti Donald Trampa zəng ediblər.
"Bu söhbətin nəticələri sadədir: yaxın günlərdə biz Birləşmiş Ştatların dəstəyini və təhlükəsizlik zəmanətlərini qəti şəkildə müəyyənləşdirəcəyik. ABŞ, dediyim kimi, bu prosesin hər mərhələsində iştirak edib", - Makron mətbuat konfransında vurğulayıb.
Müharibə bitdikdən sonra Ukraynaya mümkün qoşun göndərilməsini şərh edən Makron bildirib ki, "istəklilər koalisiyası"nın 26 ölkəsi belə addımlara hazırdır.
Növbəti mərhələ Amerika və Rusiya nümayəndələri arasında təmaslar olacaq, - Fransa prezidenti əlavə edib.
Makronun sözlərinə görə, Ukrayna ordusunun sayı və ya gücü ilə bağlı heç bir məhdudiyyət olmamalıdır. "Biz Ukraynaya öz ordusunu bərpa etmək imkanı vermək istəyirik ki, o, istənilən potensial aqressiyanı strateji olaraq dəf edə bilsin", – o, görüşdən sonra bildirib.
Bundan əvvəl Böyük Britaniyanın baş naziri Kir Starmer demişdi ki, koalisiya üzvləri Ukraynanı uzaqmənzilli raketlərlə təmin etməklə bağlı "sarsılmaz vəd veriblər".