'Tramp yolu' Putinlə Trampın masasında – 'Qafqaz üçün yeni Ukrayna ssenarisi...'
Putin və Trampın Alyaskada planlaşdırılan görüşündən gözləntilər nədir? Azərbaycan və Ermənistan arasındakı Vaşinqton razılaşması da masada varmı? Təhlilçilər bunu istisna etmirlər.
Tramp Alyaska sammitindən sonra 'tez' üçtərəfli görüş istəyir
14 avqust
ABŞ prezidenti Donald Tramp deyib ki, rusiyalı həmkarı Putinlə görüşü "normal" keçərsə, dərhal Ukrayna lideri Zelenskinin də iştirakı ilə üçtərəfli sammit keçirmək istərdi. Ancaq xəbərdarlıq edib ki, istədiyi cavabları ala bilməsə, ikinci görüş olmayacaq.
"Birinci görüşdən daha məhsuldar olacaq ikinci görüşümüzü keçirmək şansımız çox yüksəkdir", - o vurğulayıb.
"Lazımi cavabları almadığım üçün məqsədəuyğun olmadığını hiss etsəm, ikinci görüş baş tutmaya bilər", - Ağ evin rəhbəri fikrini yekunlaşdırıb.
Zelenski: 'Tramp və Putin bizsiz Ukrayna ilə bağlı qərar verə bilməz'
12 avqust
Kiyev Alyaskada ABŞ-Rusiya sammitində Ukrayna ilə bağlı onun iştirakı olmadan qəbul edilən qərarları tanımayacaq.
Bunu Ukrayna prezidenti Volodimir Zelenski avqustun 12-də "Gənclər buradadır" forumunda çıxışı zamanı deyib.
"Ukraynasız Ukrayna haqqında danışmaq mümkün deyil və bunu heç kim qəbul etməyəcək. Ona görə də söhbət onların ikitərəfli gündəliyi üçün vacib ola bilər, lakin bizsiz Ukrayna ilə bağlı heç bir qərar qəbul edə bilməzlər. Ümid edirəm ki, ABŞ prezidenti bunu anlayır və nəzərə alır", - Zelenski vurğulayıb.
Onun sözlərinə görə, ABŞ, Rusiya və Ukrayna prezidentlərinin üçtərəfli görüşü də planlaşdırılır, lakin onun tarixi hələ müəyyən edilməyib.
Tramp Putinlə görüşün məqsədini açıqladı
12 avqust
Rusiya prezidenti Vladimir Putinlə görüşün məqsədi Ukraynadakı münaqişəni dayandırmaqdır. Bunu ABŞ prezidenti Donald Tramp deyib.
"Mən ona deyəcəyəm ki, "sən bu müharibəni dayandırmalısan"", - Tramp bildirib.
ABŞ prezidenti qarşıdakı görüşü "sınaq məqsədli" adlandırıb və konstruktiv söhbətə ümid etdiyini, bundan sonra Avropa liderlərinə zəng vuracağını bildirib. O, etiraf edir ki, Putinlə görüş həm "yaxşı", həm də "pis" ola bilər. ABŞ prezidentinin sözlərinə görə, o, görüşün ilk iki dəqiqəsində razılaşmanın mümkün olub-olmadığını anlayacaq.
Tramp vasitəçilik səylərini dayandırmağa qərar verəcəyini istisna etməyib, lakin bu halda, onun fikrincə, heç bir nizamlanma olmayacaq: ""Uğurlar!" deyib çıxıb gedə bilərəm - vəssalam... Putinin bütün Ukraynanı istədiyinə inananlar var. Yeri gəlmişkən, mən də onlardan biriyəm. Düşünürəm ki, mən olmasaydım, o, indi heç kimlə danışmazdı. Amma mən onunla görüşəcəm. Sövdələşmənin parametrlərini müzakirə edəcəyik. Sonra isə Volodimir Zelenski və Avropa liderlərinə zəng edəcəyəm".
Amerika prezidenti nizamlama çərçivəsində "bəzi" ərazi mübadiləsini mümkün hesab edir.