БМО: Сугыш башыннан бирле Украинада кимендә 3280 сивил кеше һәлак булган
6 майда БМО белгечләре Мәскәүнең Украинага сугыш башлавыннан бирле сивил корбаннар турында хисап чыгарды: кимендә 3280 сивил кеше үтерелгән, 3451 кеше яраланган. Корбаннарның 231енә 18 яшь тулмаган булган. 73 баланың җәсәдләре аларның кайсы җенестән булуын да танымаслык хәлдә булган.
БМО шулай ук “ДНР” һәм “ЛНР” дип аталучы фетнәчел төбәкләрдәге корбаннар саны турында да аерым хисап чыгарды: анда 105 кеше үтерелгән, 417 кеше яраланган.
“Сивил кешеләр үлемнәренең теркәлгән очакларының күпчелеге зур мәйданга тәэсир итүче шартлаткычлар, шул исәптән авыр артиллерия, дәррәү ут ачу реактив системнары, ракета һөҗүмнәре һәм һавадан һөҗүмнәр белән бәйле диелә.
БМО чынлыкта корбаннар саны күпкә зуррак булу да мөмкин дип белдерә.
Медиа: "Москва" крейсерына АКШ күзләве биргән мәгълүматлар ярдәмендә һөҗүм иткәннәр
Русиянең Кара диңгез флоты флагманы булган "Москва" крейсерына АКШ күзләве Украинага тапшырган мәгълүматлар ярдәмендә һөҗүм иткәннәр диелә. Бу хакта АКШның берничә аноним түрәсенә сылтама белән Американың CNN һәм NBC телеканналары, шулай ук Washington Post һәм New York Times басмалары хәбәр итте. Шул ук вакытта чыганаклар, Киевның бу күзләү мәгълүматларын ничек кулланачагын АКШ төгәл белмәгән, дип искәртә. Пентагонда исә крейсер координаталарын тапшыру турындагы хәбәрләрне кире кагалар.
Европа берлеге Русия нефтенә тулы эмбаргоны 9 айдан кертәчәк
Моны Европа берлегенең икътисад мәсьәләләре комиссары Паоло Джентилони белдерде. Әмма бу әлегә карала торган проект кына булырга һәм әлеге мәгълүмат үзгәрергә мөмкин.
Британ күзләү хезмәтләре: "Азовсталь"не яулау Русиягә зур югалтулар китерә һәм Донбассның көньягындагы планнарын тоткарлый
Британия саклану министрлыгы күзләү мәгъламатларына нигезләнгән көндәлек хисабын чыгарды. Бу юлы ул “Азовсталь”дәге вазгыятькә багышланган. Русия заводны “блоклавын” гына белдерсә дә, Украина ягы әйтүенчә, Русия көчләре инде ике көн буе аны яулап алырга тырыша. Британия күзләү хезмәтләре белдерүенчә, “Азовсталь”не яулап алу омтылышы 9 май бәйрәме алдыннан Путинның Мариупольне яулап алуны тәмамлау һәм шуның белән символик уңыш күрсәтү теләгенә бәйле булырга мөмкин.
Әмма бу омтылыш әлегә Русиягә хәрбиләрнең үлемен, техника һәм сугыш кирәк-яракларының юк ителүен генә китерә. Украиннарның каршылыгы бу югалтуларны арттыра һәм Русиянең көньяк Донбасстагы планнарын тоткарлый, диелә күзләү хезмәтләре хисабында.