Русия телевидениесендә тапшыру алып баручы, Русиянең Украинага каршы сугышын яклаган өчен Европа берлеге чикләүләре исемлегенә кертелгән Владимир Соловьев Италиядәге Комо күле буенда күп санлы кыйбатлы күчемсез милеккә ия һәм Италия хакимиятләре аларның кайберләрен әле кулга алмаган. Алексей Навальный такымы Popular Politics YouTube-каналында чыгарган тикшерү хисабында шул хакта белдерелә.
5 мартта Италия хакимиятләре әлеге күл буенда Соловьевның ике вилласын кулга алган иде инде. Монда тулырак.
Украина эчке эшләр министрлыгы оештырган матбуган очрашуында үзләрен Нияз Ахунов, Александр Морозов, Михаил Польщиков, Антон Савин һәм Андрей Поздеев дип танытучы биш егет рекрут буларак хәрби хезмәткә алынулары һәм Украина сугышына ничек җибәрелүләре турында сөйләде.
Үзен 2002 елның 17 гыйнварында туган Нияз Ахунов Мөнир улы дип таныштыручы егет 2021 елның 21 июнендә рекрут буларак хәрби хезмәткә алынуын, танкчы булуын белдерә.
Аның әйтүенчә, Украина җирендә беренче бәрелешләрдән соң батальон командиры танкларны калдырып җәяү урманга качарга карар иткән. Батальондагы хәрбиләр урманда 4 тәүлек кая барырга белми йөргәннән соң, аның сүзләренчә, Сумы өлкәсендәге Ромны шәһәре янында урманнан чыгып украиннарга әсирлеккә бирелгәннәр.
"Бу — мәгънәсез сугыш, безне, чын сугышны күрмәгән рекрутларны анда ташладылар. Күбебез аны алга таба да күрергә теләмидер дип өметләнәм", ди ул һәм Украинага корал белән бәреп кергән, шәһәрләрне бомбалаган өчен барлык Украина халкыннан гафу үтенә.
SpaceX ширкәтенә нигез салучы Илон Маск Русия президенты Владимир Путинны Украина өчен көрәшкә чакырды.
"Моның белән мин Владимир Путинны Украина өчен көрәшкә чакырам" дип язган Маск Twitter-да. Кыска гына твит инглизчә, русча һәм украинча язылган.
Шулай ук Маск, Русия президентының Twitter-ына сылтама куеп, Путиннан "Сез көрәшкә ризамы?", дип тә сораган.
Традицион интернет-челтәрләрне кулланганда проблемнар чыга калса дип, иярчен интернетны файдалану өчен, Маскның Украинага Starlink иярчен элемтәсе терминаллары бирә. Февраль ахырына Украинага Starlink станцияләренең беренче партиясе килде. Икенче партиясен Украина 9 мартта алды.
Украинадагы сугышта Татарстаннан тагын бер хәрбинең үлүе билгеле булды. Кукмарадан Айнур Измайлов контракт нигезендә хезмәт иткән. Аны якын көннәрдә туган ягына алып кайтып җирләргә тиешләр.