Украина эчке эшләр министрлыгы: Русия Харьковның берничә районын "Град" системы белән утка тотты
28 февраль көнне Харьков шәһәренең берничә районы күпсанлы ракет утына тотылды, дип язып чыкты үзенең фейсбук сәхифәсендә Украина эчке эшләр министры киңәшчесе Антон Геращенко. Русиянең "Град" системы белән ут ачуы нәтиҗәсендә дистәләрчә кеше һәлак, йөзләрчә кеше яраланган, ди ул.
Ут ачуны Харьков өлкәсе идарәсе башлыгы урынбасары Роман Семенуха да раслады. "Бу куркыныч, торак биналарга артиллериядән ут ачалар. Югалтуларны әлегә санап чыгу мөмкин түгел. Мөгаен, алга таба һөҗүм итәчәкләр", дип сөйләде ул "Украинская правда" басмасына. Харьковка һөҗүм видеосын УНИАН басмасы да чыгарды.
Русия саклану министрлыгы Украинадагы "махсус операция" вакытында бары тик хәрби инфраструктура юкка чыгарыла, тыныч халыкка берни янамый дип сөйли. Украина исә хәрбиләр арасында да, тыныч халык арасында да күпсанлы корбаннар һәм яраланучылар турында хәбәр итә.
Швейцария Европа берлегенең Русиягә каршы керткән барлык чикләүләренә дә кушыла
Бу турыда, ил президенты Иньяцио Кассис сүзләренә нигезләнеп, Reuters агентлыгы хәбәр итә. “Швейцария өчен бу — зур адым”, — дип белдергән Кассис. Гадәттә Швейцария нейтраль булып кала, һәм мондый гамәлләргә бик озак һәм теләми генә кушыла.
Узган якшәмбе Нидерланд башкаласы Амстердамда Русиянең Украинага каршы агрессиясенә протест җыенында Айдар Исмәгыйлев, "мин татар" дип үзенең Русия паспортын ерткалап ташлады. Ул элек Навальныйның Уфадагы штабының (Русия хакимияте "ят агент" дип саный) активисты иде, бер ел элек Нидерландта сәяси сыену хокукы алды.
Казанның Бауман урамы каршында Украинадагы сугышка каршы ялгыз пикет уза. Лиза исемле кыз "Кочаклашыйк" дигән язу тотып чыккан. Ул Украинада Русия алып барган сугышка каршы булган кешеләргә шул рәвешле ризасызлыкларын белдерергә тәкъдим итә.
Лиза Азатлыкка сөйләгәнчә, ул монда өч сәгать басып тора, һәм бер сәгать эчендә генә дә аның белән йөздән артык кеше кочаклашкан.
"Аннары инде мин санамый да башладым. Ләкин кешеләр бик күп килә", диде активист.
"Кайберәүләр сиңа берәр ярдәм кирәкмиме, Украинада кемең яши, дип сорый, кайда тууым белән кызыксына. Ләкин күбесе сүзнең ни турында баруын аңлый. Бу бик сөендерә", диде Лиза.
Аның күзәтүләренчә, сугышка каршылар күпчелекне тәшкил итә.