Məhkəmə Sibirin Yakutiya regionundan olan və Rusiya prezidenti Vladimir Putini Kremldən qovmaq üçün dəfələrlə yürüş cəhdi edən şamanı rəsmən “ruhi xəstə” elan edib.
Bu o deməkdir ki, şaman Aleksandr Qabışev zorla ruhi xəstəxanaya yerləşdirilə bilər.
Açıq Rusiya müxalifət qrupunun hüquq üzrə koordinatoru Aleksey Pryanişnikov martın 18-də AzadlıqRadiosuna deyib ki, Qabışev onun psixi vəziyyətinə görə məntiqlə polis nəfərinə hücuma görə məsuliyyətə cəlb edilə bilməz.
Ötən ay Yakutsk şəhərinin polis idarəsi Qabışevə qarşı “polis zabitinə zorakı hücum” ittihamı irəli sürüb.
Şaman məhz bundan sonra məcburi qayadada ruhi xəstəxanaya aparılıb.
Pryanişnikov deyib ki, Qabışev barədə ruhi xəstə hökmündən apellyasiya şikatəi verilib-verilməyəcəyi hələ bilinmir.
Polis bildirir ki, Qabışevlə hüquq-mühafizə orqanları arasında yanvarın 27-də baş vermiş qarşıdurmadan üç həftə əvvəl şaman Vladimir Putini Kremldən qovmaq üçün yeni yürüş təşkil edəcəyini bildirmişdi.
Xatırlatma
Qabışev 2019-cu ilin martında Yakutiyadan Moskvaya ilk piyada yürüşünü təşkil edəndən məşhurlaşıb.
O bildirirdi ki, məqsədi “şər qüvvələrə” xidmət edən prezident Vladimir Putini Kremldən qovmaqdır.
Lakin o yolun bir hissəsini qət etdikdən sonra saxlanmış və ruhi xəstəxanaya yerləşdirilmişdi.
Eyni zamanda Qabışevi ekstremist fəaliyyətə çağırışda ittiham edirdilər. Daha sonra ondan yazılı iltizam alaraq sərbəst buraxmışdılar.
Şaman 2020-ci ilin yanvarında Moskvaya yeni yürüş elan etmişdi. O bu yürüşü ötən iyunda başlamaq niyyətində idi.
Lakin polis Qabışevi mayın 12-də bir daha saxlamışdı. O yenidən ruhi xəstəxanaya yerləşdirilsə də iyulun 22-də oradan buraxılmışdı.
