Belarusda yeddi ay öncəki mübahisəli prezident seçkisindən sonra 400-dən çox etirazçı məhkum edilib.
“Bu günədək müstəntiqlər qanunsuz kütləvi tədbirlər və ictimai asayişi pozan etirazlarda iştirakla əlaqədar 631 nəfərə qarşı 468 cinayət işini məhkəmələrə göndərib”, – Baş Prokurorluq martın 17-də bildirib. Qurum artıq “400-dən çox şəxsin məhkum edildiyini” açıqlayır.
Şübhəlilərin hüquq-mühafizə əməkdaşlarına qarşı “zorakılıq və təhdidlərdə”, onları açıq təhqir etməkdə, özəl mülkiyyətə ziyan vurmaqda, dövlət simvollarını ələ salmaqda suçlandığı qeyd edilir.
30 mindən çox saxlanan, yüzlərlə döyülən...
9 avqust seçkisinin qalibi Alyaksandr Lukaşenka elan olunandan sonra ölkədə hər gün etirazlar keçirilir. Müxalifət seçkinin saxtalaşdırıldığını deyir, Lukaşenkanın istefasını, yeni seçki keçirilməsini tələb edir.
O vaxtdan 30 mindən çox etirazçı saxlanıb, yüzlərlə insan döyülüb, öldürülənlər olub, jurnalistlər hədəfə alınıb.
1994-cü ildən Belarusu idarə edən Lukaşenka, eləcə də bir sıra aparıcı məmurlar Qərbin sanksiyaları ilə üzləşiblər. Qərb onu ölkənin legitim lideri kimi tanımayıb.
Müxalifət hazırda mühacirətdə yaşayan Svetlana Tixanovskayanı seçkinin qalibi hesab edir. O, seçkidən bir gün sonra təzyiqlərlə əlaqədar Litvaya gedib.
Tixanovskayanın martın 17-də ABŞ Nümayəndələr Palatasının Xarici Məsələlər Komitəsində dinləməyə qatılacağı, Belarusda demokratik hərəkatda qadınların “aparıcı” rolu haqda ifadə verəcəyi gözlənir.
