AzadlıqRadiosunun Erməni xidməti Azatutuyun bildirir ki, Ermənistan prezidentinin martın 13-də keçirmək istədiyi dəyirmi masanın həyata keçirilməsi qeyri-mümkündür.
Bu barədə məlumatı prezident Armen Sarkisyanın ofisi yayıb.
Məlumatda deyilir ki, hakim “Mənim addımım” və parlament müxalifətindən “Maariflənmiş Ermənistan” partiyalarının fraksiyaları dəyirmi masa arxasında oturmağa razılıq veriblər.
Lakin “Çiçəklənən Ermənsitan” və “Vətənin xilası” partiyaları görüşdə iştirak üçün öz şərtlərini irəli sürüblər.
“Vətənin xilası” ön şərt qoyur
Prezident aparatından verilən açıqlamada deyilir ki, Armen Sarkisyan parlament fraksiyaları ilə parlamentdə təmsil olunmayan siyasi qüvvələri bir araya gətirməyə çalışır.
Məlumatda deyilir ki, Sarkisyan yaranmış böhrandan yeganə çıxış yolunun danışıqlar və dialoq olduğuna inanır.
Onun fikrincə, ölkədə sarsıntıların yaşanmaması üçün mümkün olan hər şeyi etmək lazımdır.
Bundan əvvəl prezident Sarkisyan bəyan etmişdi ki, baş naziri və siyasi partiyaların nümayəndələrini martın 13-də onun iqamətgahında keçiriləcək dəyirmi masaya dəvət edir.
Azatutyun yazır ki, Vazgen Manukyanın “Vətənin xilası” hərəkatı bu görüşə qatılmaq üçün gündəlikdə baş nazirin istefası məsələsinin olmasını tələb edib.
Manukyan onlarca partiyanı birləşdirən hərəkatın baş nazir vəzifəsinə vahid namizədidir.
Lakin son rəy sorğuları Nikol Paşinyanı elektoratın 33, müxalifəti isə 2-3 faizinin dəstəklədiyini göstərib.