Keçid linkləri

Təcili xəbərlər
2021, 23 Yanvar, şənbə, Bakı vaxtı 15:05

Əfqan Sadıqovdan yeni xəbər var


Ə.Sadıqov

Dekabrın 15-də Azel TV saytının həbsdə olan rəhbəri Əfqan Sadıqovun həyat yoldaşı Sevinc Sadıqova onunla görüşüb.

Bu barədə S.Sadıqovanın özü Azadlıq Radiosuna məlumat verib: "Əfqanla dünən (dekabrın 15-də) görüşdüm, artıq 43 gündür ki, aclıq edən Əfqanın vəziyyəti ağırdır".

Onun deməsinə görə, Ə.Sadıqov 1 saylı Bakı İstintaq Təcridxanasının tibb məntəqəsindədir. S.Sadıqova habelə bildirib ki, artıq həyat yoldaşının əl və ayaq oynaq hissələrində qıcolmalar baş verir: "Sərbəst hərəkət edə bilmir. Bütün bunlara baxmayaraq, aclığı dayandırmaq barədə təklifləri yaxına buraxmır. Onun vəziyyəti ilə bağlı müxtəlif instansiyalara etdiyimiz müraciətlərə cavab verilmir".

Ombudsman Aparatı: "Köçürülən andan səhhəti diqqət mərkəzindədir"

Ə.Sadıqovla bağlı həyat yoldaşının dediklərinə Penitensiar Xidmətdən münasibət öyrənmək mümkün olmayıb. Ombudsman Aparatından isə "Turan" agentliyinə bildiriblər ki, bu məsələ ilk gündən Ombudsmanın diqqət mərkəzindədir. Aparatdan həmçinin deyilib ki, Ombudsmanın tapşırığına əsasən, iki dəfə onların əməkdaşları Bakı İstintaq Təcridxanasında Ə.Sadıqovla görüşüblər, bu görüşlərdən biri müalicə müəssisəsində olub: "Köçürülən andan səhhəti diqqət mərkəzindədir. Baş həkimlə danışılır, məlumatlar alınır. Müalicə müəssisəsinin verdiyi məlumata görə, hazırda vəziyyəti orta-ağırdır, amma kritik deyil. Qıcolma halları yoxdur, huşu özündədir. Gündəlik vəziyyəti öyrənilir və ailəsinə məlumat verilir".

Qorumdan vurğulandığına görə, ona qida qəbulu tövsiyə edilib.

Aparatdan deyiblər ki, Ombudsman Səbinə Əliyevanın tapşırığı ilə hər gün Ə.Sadıqovun səhhəti ilə maraqlanırlar. Qurumdan əlavə edilməsinə görə, o, saxlanma şəraitindən narazılıq etmir, yalnız çıxarılan hökmdən şikayətçidir.

Azel TV saytının rəhbəri Ə.Sadıqov bu ilin mayında hədə yolu ilə pul tələb etmək ittihamı ilə həbs olunub. Noyabrın 3-də o, 7 il müddətinə azadlıqdan məhrum edilib.

Noyabrın 4-dən hökmə etiraz əlaməti olaraq onun aclıq elan etdiyi vurğulanırdı.

Xatırlatma

Ə.Sadıqov bundan öncə, 2016-cı il noyabrın 22-də də həbs edilmişdi. O, Cinayət Məcəlləsinin 127.2.3-cü (xuliqanlıq niyyəti ilə təhlükəli üsulla sağlamlığa qəsdən az ağır ziyan vurma) maddəsi ilə ittiham olunaraq 2 il 6 ay müddətinə azadlıqdan məhrum olunmuşdu. Sonradan onun cəzası 1 il azaldıldı. O, daha sonra da buna qədər bir neçə dəfə müxtəlif müddətlərə inzibati qaydada həbs edilib. Ə.Sadıqov bütün hallarda ittihamları qəbul etməyib və bunun jurnalist fəaliyyətinin məhdudlaşdırılmasına yönəldiyini bildirib.

Onu yerli hüquq müdafiəçiləri əvvəlki həbsi zamanı siyasi məhbus kimi tanımışdılar. Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, siyasi məhbus adlandırılan şəxslər sırf törətdikləri əmələ görə məsuliyyətə alınıblar.

XS
SM
MD
LG