Avqustun 25-də Azərbaycanın müdafiə naziri Zakir Həsənov Bakıda səfərdə olan Rusiyanın müdafiə naziri Sergey Şoyqu ilə görüşüb.
Bu barədə Azərbaycan Müdafiə Nazirliyi (MN) məlumat yayıb. Məlumata görə, Z.Həsənov bildirib ki, Ermənistanın işğalçılıq siyasəti təkcə Azərbaycanda deyil bütün regionda sülhə, sabitliyə, təhlükəsizliyə əsas təhdiddir.
“Ermənistan-Azərbaycan Dağlıq Qarabağ münaqişəsinin həllində Rusiya Federasiyasının rolunu qeyd edən Azərbaycanın müdafiə naziri vurğulayıb ki, bütün beynəlxalq təşkilatlar kimi Rusiya da ölkəmizin ərazi bütövlüyünü tanıyır, onun müstəqilliyinə və suverenliyinə hörmətlə yanaşır” deyə açıqlamada qeyd olunur.
Məlumata görə, S.Şoyqu Rusiyadan Ermənistana təyyarələr vasitəsilə silahların daşınması barədə son zamanlar mətbuatda yayılan məlumatlara münasibət bildirib:
“Qeyd edib ki, bu hərbi daşınmalar Ermənistana silah və hərbi texnikanın, həmçinin digər hərbi əmlakın tədarükü üçün deyil, Rusiyanın bu ölkədəki 102-ci hərbi bazasına genişmiqyaslı tikinti işlərinin aparılması üçün nəzərdə tutulan tikinti materiallarının çatdırılması və həmin bazada xidmət edən çağırışçıların rotasiyası məqsədilə həyata keçirilib”
Açıqlamaya görə, tərəflər həmçinin beynəlxalq, regional təhlükəsizlik məsələləri, hərbi sahədə əməkdaşlığın mövcud vəziyyəti və əlaqələrin inkişaf perspektivlərini müzakirə ediblər, hərbi-texniki əməkdaşlıq sahəsində qarşılıqlı maraq doğuran digər məsələlər ətrafında fikir mübadiləsi aparıblar.
Rusiya Federasiyasının Müdafiə naziri Sergey Şoyqu bu gün, avqustun 25-də Azərbaycana gəlib. O daha əvvəl Prezident İlham Əliyevin qəbulunda olub. S.Şoyqunun "Beynəlxalq Ordu Oyunları-2020" yarışları çərçivəsində keçirilən "Dəniz Kuboku" beynəlxalq müsabiqəsinin açılışında (avqustun 25-i) iştirak etmək məqsədi ilə Azərbaycana gəldiyi bildirilir.
"Beynəlxalq Ordu Oyunları-2020" yarışlarının bu il avqustun 23-də başladığı açıqlanıb. Onun sentyabrın 5-dək davam edəcəyi gözlənir. Həmin oyunlar 11 ölkənin ərazisində keçirilməlidir. "Dəniz Kuboku" beynəlxalq müsabiqəsinin isə sentyabrın 4-dək davam etməsi planlaşdırılır.
Xatırlatma
Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilib. Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.
