Keçid linkləri

Təcili xəbərlər
2020, 26 Oktyabr, Bazar ertəsi, Bakı vaxtı 22:36

Hariri-nin öldürülməsində əsas şübhəli ‘Hizballah üzvü olub’


Rafik al-Hariri-nin şəkli olan plakat

Livanın keçmiş baş naziri Rafik Hariri-nin 15 il öncə Beyrutda öldürülməsini araşdıran məhkəmənin hakimləri deyirlər ki, əsas şübhəli Hizballah üzvü olub, hücumda vacib amil sayılan mobil telefondan istifadə edib.

Hakimlər hökmün oxunmasına başlayıblar. Hakim David Re deyib ki, 2005-ci ildə törədilmiş partlayışda İranın dəstəklədiyi Hizballah qruplaşması rəhbərliyinin, yaxud Suriya hökumətinin əli olmasına dəlil var.

O, məhkəmədə əsas təqsirləndirilən olan Ayyash-ın qrupun üzvü olduğunu deyib. Dəlillər onun hücumda əsas bağlantı sayılan mobil telefonu işlətdiyini göstərir.

Hökmdən öncə Livan Prezidenti Michel Aoun bildirib ki, “qətldən 15 il keçir və belə uzun müddətdən sonra ədalət daha ədalət deyil”.

***

Avqustun 18-də BMT-nin dəstəklədiyi tribunal Livanın keçmiş baş naziri Rafik Hariri-nin 15 il öncə Beyrutda öldürülməsi işi üzrə hökm çıxarmalıdır. Qətldə dörd nəfər ittiham olunur.

Livanın Hizballah silahlı qruplaşmasının üzvü olmaqda şübhəli bilinən dörd nəfər Haaqanın kənarında yerləşən Livan üzrə Xüsusi Tribunal tərəfindən qiyabi mühakimə olunublar.

Salim Jamil Ayyash, Hassan Habib Merhi, Hussein Hassan OneissiAssad Hassan Sabra adlı təqsirləndirilənlərin harada olduqları bəlli deyil.

Hadisə baş verən dönəmdə özünü parlamentdə müxalifətə yaxın sayan deputat Hariri 2005-ci ilin fevralın 14-də avtomobil karvanında partlayış zamanı həlak olub.

İntiharçı hücumunda daha 21 nəfər öldürülmüş, 226 nəfər yaralanmışdı.

Sünni Hariri Suriyanın bu ölkədən hərbçilərini çıxarması çağırışlarını dəstəkləyirdi. Suriya 1976-cı ildə Livanda vətəndaş müharibəsi başlanandan ölkəyə girmişdi.

Hücumun səbəb olduğu yerli və beynəlxalq qəzəb Livanın Suriya-pərəst hökumətini istefa verməyə, Hizballah-ı dəstəkləyən Suriyanı isə Livandan əsgərlərini çıxarmağa məcbur etdi.

Silahlı qruplaşma və Dəməşq hökuməti hücumda əli olmadığını deyirdi.

Hücumdan sonra Hariri-nin oğlu Saad anti-Suriya və qərbyönlü siyasi qrupa rəhbərlik edərək üç dönəm baş nazir postunda çalışıb.

Onun Niderlandda məhkəməyə qatılacağı gözlənir.

XS
SM
MD
LG