Keçid linkləri

Təcili xəbərlər
2021, 02 Avqust, Bazar ertəsi, Bakı vaxtı 01:42

Azərbaycan xəbərləri

Müsavat başqanının müavini: 'Polis bölməsində söhbətlər mitinq barədə idi'

R.Əmiraslanlı

Müsavat Partiyası başqanının həbsdə olan müavini Razim Əmiraslanlının avtobus sürücüsünü söydüyünə, ondan intizamlı olmağı istəyən polislərin bu tələbinə tabe olmadığına görə cəzalandırıldığı iddia olunur. Amma R.Əmiraslanlı deyir ki, yalandır, Müsavat Partiyasının noyabrın 12-də Bakı şəhər İcra Hakimiyyətinin qarşısında keçirməyi planlaşdırdığı piketdə iştirakına imkan verməmək üçün onu bir gün əvvəl saxta ittihamla həbs ediblər. O, bu haqda noyabrın 20-də Bakı Apellyasiya Məhkəməsində danışıb. Orada R.Əmiraslanlının 15 günlük inzibati həbsi barədə Binəqədi rayon Məhkəməsinin qərarından verilən şikayətə baxılıb.

Müsavat başqanının müavini deyir ki, onu hələ noyabrın 10-da telefon vasitəsilə polis bölməsinə çağırmışdılar. Bildirdiyinə görə, noyabrın 11-də səhər saatlarında Binəqədi rayonu, 6-cı polis bölməsinə gedib, orada bölmənin rəisi və müavini ilə söhbətləri olub: «Polis bölməsində söhbətlər Müsavat Partiyasının təyin etdiyi mitinq və Bakı şəhər İcra Hakimiyyətinin qarşısındakı piket barədə oldu. Bir qədər sonra elə bölmədə guya dayanacaqda söyüş söyməyim barədə protokol tərtib edib, məhkəməyə apardılar, 15 sutkalıq həbs qərarı aldılar».

Müsavatçılar piketə cəhd edir
Gözlə

No media source currently available

0:00 0:08:12 0:00

R.Əmiraslanlının sözlərinə görə, Binəqədi rayon Məhkəməsində onun işinə baxılanda söyüş söydüyü iddia olunan ərazidəki kamera görüntülərinə baxış keçirilməsi, onu intizama dəvət etdiyi bildirilən polislərin telefonlarının anten dairəsi ilə bağlı məlumatların mobil operatorlardan alınmasını istəyib. Amma onun istəyi təmin olunmayıb.

Bakı Apellyasiya Məhkəməsində hakim Vaqif Mursaqulov da onun həm bu məsələlərlə bağlı vəsatətlərini, həm də qərardan verdiyi şikayəti təmin etməyib.

Vəkil Nemət Kərimli AzadlıqRadiosuna bildirib ki, inzibati işlərlə bağlı ölkə daxilində sonuncu hüquqi müdafiə vasitəsi apellyasiya məhkəməsidir. Ona görə də qərardan Avropa İnsan Haqları Məhkəməsinə şikayət edəcəklər.

Bütün xəbərləri izləyin

671 yeni yoluxma qeydə alınıb, 4 ölüm 

COVİD-19 xəstəsinin müalicə aldığı xəstəxana, İran, arxiv foto

Son gündə Azərbaycanda koronavirus (COVID-19) infeksiyasına 671 adam yoluxub, bu virusa yoluxanlrdan 202 nəfər sağalıb.

Bu barədə Nazirlər Kabineti yanında Operativ Qərargah bu gün, avqustun 1-də məlumat yayıb. Bu virusla bağlı analiz nümunələri müsbət çıxan 4 xəstənin də vəfat etdiyi qeyd edilir.

Operativ Qərargah məlumatına görə, Azərbaycanda indiyə qədər 344 520 nəfərin yeni koronavirus infeksiyasına yoluxduğu aşkarlanıb.

Onlardan 333 128 nəfərin sağaldığı, 5 027 pasiyentin vəfat etdiyi bildirilir. Hazırda aktiv xəstə sayının 6 365-ə yüksəldiyi açıqlanıb.

Bildirildiyinə görə, eyni zamanda, son sutkada yeni yoluxma hallarının müəyyənləşdirilməsi ilə əlaqədar ölkədə 9 400, indiyə qədər isə 4 043 740 test icra olunub.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 4,2 milyondan çox şəxsin vəfat etdiyi açıqlanıb.

Azərbaycan XİN Rusiyanın səfirinə nota verib-Jirinovskinin dediklərinə görə

XİN

Bu gün, avqustun 1-də Rusiya Federasiyasının Azərbaycandakı səfirliyinin müvəqqəti işlər vəkili Xarici İşlər Nazirliyinə dəvət olunub.

Bu barədə Azərbaycan Xarici İşlər Nazirliyi (XİN) məlumat yayıb.

Məlumatda yazılıb ki, Rusiya Dövlət Dumasının deputatı, Liberal Demokrat Partiyasının sədri Vladimir Jirinovskinin “Komsomolskaya Pravda” radiosu-nun 30 iyul buraxılışında Azərbaycanın dövlətçiliyi və rəhbərliyi ünvanına səsləndirdiyi qərəzli, təhqiramiz fikirləri ilə bağlı ciddi narahatlıq, etiraz çatdırılıb :

“... Deputat mandatı ilə təmsil olunan bir şəxsin bu davranışının qeyri-etik olmaqla yanaşı, dövlətlərimiz arasında mövcud olan dostluq, strateji tərəfdaşlıq münasibətlərinin ruhuna uyğun olmadığı, habelə bu münasibətlərə zərər gətirilməsinə hesablanmış məsuliyyətsiz və təxribat xarakterli ifadələrin səsləndirilməsinin qəbuledilməz olduğu vurğulanıb”

Sözügedən hal ilə bağlı qarşı tərəfə Azərbaycan Xarici İşlər Nazirliyinin notasının təqdim olunduğu bildirilir.

Bu məlumata, hələlik, Rusiya Federasiyasının Azərbaycandakı səfirliyindən münasibət almaq mümkün olmayıb.

“Komsomolskaya Pravda” radiosu-nun müxbiri söhbət zamanı Jirinovskiyə həm də Azərbaycan və Ermənistan arasındakı mövcud vəziyyətlə bağlı Rusiya hərbçilərinin iki ölkənin sərhəddinə göndərilməsi ilə bağlı suallar verib. O, Rusiyanın belə bir addım atmasının nə qədər doğru olduğunu soruşub.

Jirinovski Cənubi Qafqazının Rusiyanın təsir dairəsi olduğunu deyib və bildirib ki, həm də Rusiya Qafqaza müharibə ilə getmir, ermənilər xahiş edirlər.

"Amma orda rus əsgəri ölməsin deyə biz əziz Azərbaycan rəhbərini çağırıb, təkbətək deyə bilərik ki, bax İlham, o ərazi ki, sən istəyirsən, sənin olsun, amma heç kimin rus əsgərinə gözünün ucu ilə belə pis baxmağa ixtiyarı yoxdur. O, yaxşı bilir ki, postunu itirə bilər, onda orda diktaturadı, orda müxalif qüvvələri doludur, əgər Bayden istəsə onu iki həftəyə devirərlər. Paşinyanı xilas etdiyimiz kimi onu da yalnız biz xilas edə bilərik..." deyə rusiyalı deputat bildirib.

Azərbaycan ikinci medalı qazanıb 

Tokio Olimpiya Oyunları, boks yarışması

Azərbaycan boksçusu Alfonso Dominqes Tokio-2020 Yay Olimpiya Oyunlarında növbəti döyüşünü keçirib.O, yarımfinalda kubalı Olimpiya və dünya çempionu Arlen Lopeslə üz-üzə gəlib.

İlk görüşdə özbəkistanlı Dilşotbek Ruzmetovu, ardınca türkiyəli Bayram Malkanı mübarizədən kənarlaşdıran Azərbaycan boksçusu bu dəfə məğlubiyyətə üzülüb. 81 kq çəki dərəcəsində qüvvəsini sınayan Dominqes rəqibinə 0:5 (28:29, 28:29, 28:29, 28:29, 28:29) hesabı ilə məğlub olub.

Nəticədə Alfonso Tokio-2020 Yay Olimpiya Oyunlarında bürünc medalını rəsmiləşdirib. Bu, Azərbaycan millisinin Yaponiyanın paytaxtında ikinci mükafatı olub. Onadək cüdoçu İrina Kindzerska (+78 kq) da Olimpiadanı 3-cü yerdə bitirib.

Tokioya 44 idmançı ilə yollanan Azərbaycanın heyətində artıq 26 atlet çıxışını bitirib. Azərbaycan idmançılarından 1-i mübarizəni davam etdirir, 17-si isə startı gözləyir.

"Tokio-2020" Yay Olimpiya Oyunları rəsmi olaraq iyulun 23-də başlayıb.Olimpiada avqustun 8-dək davam edəcək.

"Tokio-2020" Yay Olimpiya Oyunları adından da göründüyü kimi 2020-ci ildə keçirilməliydi.Amma koronavirus pandemiyası üzündən təxirə salınmışdı.

Xatırlatma

Azərbaycan yeddinci dəfədir Yay Olimpiya Oyunlarında iştirak edir. Onun Olimpiya komandası, həmçinin 6 Qış Olimpiya Oyunlarında gücünü sınayıb. Bu ölkənin Olimpiya Oyunlarında debütü “Atlanta-1996” Qış Olimpiya Oyunlarına təsadüf edib. Azərbaycan komandası medalların sayına görə ən böyük uğurunu “Rio-2016”da qazanıb. Həmin Olimpiadaya 56 idmançı ilə qatılan Azərbaycan 1-i qızıl, 7-si gümüş və 10-u bürünc olmaqla ümumilikdə 18 medala sahib olub.

633 yeni yoluxma qeydə alınıb, 1 ölüm

Koronavirus xəstəsi, Bosniya

Son gündə Azərbaycanda koronavirus (COVID-19) infeksiyasına 633 yeni yoluxma faktı qeydə alınıb, bu virusa yoluxanlardan 174 nəfər sağalıb.

Nazirlər Kabineti yanında Operativ Qərargahdan iyulun 31-də verilən məlumata görə, COVID-19 üçün götürülən analiz nümunələri müsbət çıxan 1 nəfər vəfat edib.

Açıqlamaya görə, indiyədək ölkədə ümumilikdə 343849 nəfərin koronavirus infeksiyasına yoluxması faktı müəyyən edilib, onlardan 332 926-ı sağalıb, 5023-ü vəfat edib, aktiv xəstə sayı 5900-ə yüksəlib.

Bildirildiyinə görə, son sutka ərzində yeni yoluxma hallarının müəyyənləşdirilməsi ilə əlaqədar ölkədə 10386, ötən müddət ərzində isə ümumilikdə 4034340 test aparılıb.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 4,2 milyondan çox şəxsin vəfat etdiyi açıqlanıb.

Azərbaycan  əsgəri həlak olub   

Müdafiə Nazirliyi

Azərbaycan ordusunun hərbi qulluqçusu əsgər Şamil Mais oğlu Aslanovun həlak olması ilə bağlı məlumat yayılıb.

Bu barədə məlumatı Müdafiə Nazirliyindən " Turan " İnformasiya Agentliyinə də təsdiqləyiblər.

Onun ilkin ehtimala görə, silahla davranış qaydalarının kobud şəkildə pozulması nəticəsində halak olduğu qeyd edilir.

Lakin bu məlumata, onun yaxınlarından, hələlik, münasibət almaq mümkün olmayıb.

Məlumata görə, faktla bağlı araşdırma aparılır.

Flora Kərimova ‘Şərəf’ ordeni ilə təltif edilib 

Flora Kərimova, oktyabr 2010

Flora Kərimova “Şərəf” ordeni ilə təltif edilib. Bununla bağlı bu gün, iyulun 31-də Azərbaycan Prezidenti sərəncam imzalayıb.

Sərancamda yazılıb ki, Azərbaycan musiqi sənətinin inkişafında xidmətlərinə görə Flora Ələkbər qızı Kərimova “Şərəf” ordeni ilə təltif edilsin.

Dövlət başçısının başqa bir sərəncamı ilə Flora Ələkbər qızı Kərimovaya habelə Azərbaycan Respublikası Prezidentinin fərdi təqaüdü də veriləcək.

Flora Kərimovanın bu günlər müsahibələrinin birində Azərbaycan ərazilərinin ötən il işğaldan azad edilməsi ilə bağlı dilə gətirdiyi "Daha müxalifətçiliyə yer qalmayıb" fikiri sosial şəbəkələrdə qızğın müzakirələrə səbəb olmuşdu.

Onunla razilaşanlar və razılaşmayanlar da var idi.

Azərbaycanın estrada, muğam, opera müğənisi, aktirisa Flora Kərimova 1941-ci ildə doğulub.
Onun 13 yaşından bədii özfaliyyət kollektivində fəaliyyətə başladığı deyilir. Flora Kərimova Azərbaycan Dövlət Opera və Balet Teatrında ( “Leyli Məcnun” “Üzeyir Hacıbəyov” ) çıxış edib, “qanun naminə” və bir sıra başqa filimlərə də çəkilib. O, habelə Azərbaycan Dövlət Televiziyasının solisti olub. Uzun illər ictimai fəaliyyət də göstərib.

Azərbaycanda ‘Aİ-95’ premium markalı benzin bahalaşıb 

Arxiv foto

İyulun 31-dən Azərbaycanda "Aİ-95" markalı benzinin qiyməti 1,40 manatdan 1,45 manata yüksəlib.

Bu məlumatı “Report”a açıqlamasında “SOCAR Petroleum” qapalı səhimdar cəmiyətinin mətbuat katibi Üzeyir Həbibbəyli də təsdiq edib.

Onun sözlərinə görə, buna səbəb bu marka benzinin istehsalçı ölkədə bahalaşmasıdır.

O, habelə bildirib ki, Azərbaycan “Aİ-95” premium markalı benzini əsasən Rumıniyadan idxal edir:

“Digər yanacaqlar markalarının satışı köhnə qiymətlərlə davam etdirilir”.

Azərbaycanda sonuncu dəfə, “Aİ-95” premium markalı benzinin qiyməti bu il iyunun əvvəlində 15 qəpik artaraq 1,40 manat olmuşdu.

Aİ-95 “premium” markalı benzin Azərbaycanda istehsal edilmir. Onun qiymətini də Azərbaycan Tarif Şurası tənzimləmir.

Bu il yanvarın 4-də Tarif Şurasının iclasında ölkədə istehsal edilən Aİ-92 markalı avtomobil benzininin pərakəndə satış qiyməti 1 litr üçün 1 manat, dizel yanacağının pərakəndə satış qiyməti isə 80 qəpik müəyyən edilmişdi. Onda Aİ-92 10, dizel 20 qəpik bahalaşmışdı.

Bəzi iqtisadçılar ölkənin "Aİ-95" premium və super markalı benzinlərlə bağlı idxaldan asılı olmasına görə hökuməti tənqid edirlər.

Yanğınsöndürənlər Türkiyəyə çatıb 

Türkiyədə meş yanğınları

Meşə yanğınlarının söndürülməsi məqsədilə Türkiyəyə yola düşən Azərbaycan Fövqəladə Hallar Nazirliyinin yanğınsöndürmə qüvvələrinin 100 nəfərlik ilk qrupu ora çatıb.

Bu barədə bu gün, iyulun 31 -də Fövqəladə Hallar Nazirliyi (FHN) məlumat yayıb.Məlumatda yazılıb ki, yanğınsöndürmə qüvvələrinin ilk qrupunu gətirən təyyarə iyulun 31-də Bakı vaxtı ilə saat 00:10 radələrində Muğla Dalaman Hava Limanına enib.

İyulun 30-da Azərbaycan Baş naziri Əli Əsədov ilə Türkiyə Vitse-prezidenti Fuat Oktay arasında telefon danışığı olmuşdu.

Telefon danışığında meşə yanğınları ilə mübarizədə Azərbaycanın Türkiyəyə hər cür yardım göstərməyə və bunun üçün bütün lazımi qüvvələri səfərbər etməyə hazır olduğu vurğulanmışdı.

"Azərbaycan Prezidentinin ... göstərişlərinə əsasən Fövqəladə Hallar Nazirliyinin 500 nəfərdən ibarət şəxsi heyəti, helikopterlər, həmçinin digər lazımi avadanlıq və ləvazimatlar ən qısa zamanda qardaş Türkiyəyə göndəriləcək", deyə bildirilirdi.

İyulun 28-i və 29-da Türkiyənin 20-dən çox vilayətində baş verən 60-dan artıq meşə yanğını nəticəsində azı bir neçə nəfərin həlak olduğu bildirilir. Xeyli heyvanın tələf olduğu, bir çox ev, iaşə obyektlərinin yararsız vəziyyətə düşdüyü deyilir.

Deputatla bağlı cinayət işi başlanıb 

Eldəniz Səlimov

Milli Məclisin deputatının polis əməkdaşına xidməti vəzifələrinin icrası ilə əlaqədar zor tətbiq etməsi iddası ilə bağlı cinayət işi başlanıb.

Bu barədə Baş Prokurorluq bu gün, iyulun 30-da məlumat yayıb.

Məlumatda qeyd edilib ki, iyul ayının 29-da saat 01 radələrində Xaçmaz şəhərində “Starıy Dvor” restoranında Azərbaycan Milli Məclisinin deputatı Eldəniz Səlimovun polis əməkdaşına xidməti vəzifələrinin icrası ilə əlaqədar zor tətbiq etməsi barədə Daxili İşlər Nazirliyindən daxil olmuş material Baş Prokurorluqda araşdırılıb :

" Toplanmış material üzrə Azərbaycan Respublikası Cinayət Məcəlləsinin 309.2-ci (vəzifə səlahiyyətlərini aşma) maddəsi ilə cinayət işi başlanmış və istintaqın aparılması Baş Prokurorluğun İstintaq İdarəsinə tapşırılmışdır.
Hazırda iş üzrə intensiv istintaq hərəkətləri aparılır. "

Açıqlamaya görə, istintaqın gedişatı barədə ictimaiyyətə əlavə məlumat veriləcək.

Hələlik, bu açıqlamaya Milli Məclisinin deputatı Eldəniz Səlimov və polisin mövqeyini almaq mümkün olmayıb.

Amma bundan əvvəl Daxili İşlər Nazirliyinin mətbuat xidmətindən "Turan" Agentliyinə bildirmişdilər ki, hadisə iyulun 29-da gecə yarısından sonra Xaçmaz rayonunun Nabran qəsəbəsində Səlimovun qohumunun obyektində baş verib

."Eldəniz Səlimov polisin karantin rejiminin ( Koronavirus pandemiyası ilə bağlı ötən ilin martından Azərbaycanda karantindir ) tələbinə uyğun olaraq obyekti bağlamaq tələbindən narazılığını bildirib.Fakt üzrə toplanmış materiallar Baş Prokurorluğun İstintaq İdarəsinə göndərilib",- Daxili İşlər Nazirliyinin mətbuat xidmətindən bildiriblər.

Hadisənin bu "Starıy Dvor" restoranda baş verdiyi bildirilir
Hadisənin bu "Starıy Dvor" restoranda baş verdiyi bildirilir

Amma bəzi melumatlara görə, deputatın yaxınları bildiriblər ki, bu hadisə təhrif edilmiş formada təqdim edilir.

1976-cı ildə doğulan Eldəniz Səlimov 2010-cu il noyabrın 7-də baş tutan Azərbaycan Milli Məclisinə IV çağırış seçkilərinə qatılıb. Onun 55 saylı Xaçmaz şəhər dairəsindən hakim Yeni Azərbaycan Partiyasının namizədi kimi deputat seçildiyi açıqlanıb. O, daha sonra da iki dəfə parlament seçkilərindən qalib kimi ayrılıb.

668 yeni yoluxma qeydə alınıb, 3 ölüm 

Bosniyada xəstəxana, arxiv foto

Son gündə Azərbaycanda koronavirus (COVID-19) infeksiyasına 668 yeni yoluxma faktı qeydə alınıb, virusa yoluxanlardan 178 nəfər sağalıb.

Nazirlər Kabineti yanında Operativ Qərargahdan iyulun 30-da verilən məlumata görə, COVID-19 üçün götürülən analiz nümunələri müsbət çıxan 3 nəfər vəfat edib.

Açıqlamaya görə, indiyədək ölkədə ümumilikdə 343216 nəfərin koronavirus infeksiyasına yoluxması faktı müəyyən edilib, onlardan 332 752-i sağalıb, 5022-ı vəfat edib, aktiv xəstə sayı 54424-ə yüksəlib.

Bildirildiyinə görə, son sutka ərzində yeni yoluxma hallarının müəyyənləşdirilməsi ilə əlaqədar ölkədə 9881, ötən müddət ərzində isə ümumilikdə 4023954 test aparılıb.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 4,2 milyondan çox şəxsin vəfat etdiyi açıqlanıb.

Xanım mühacir sərbəst buraxıldığını deyir 

Yeganə Əmiraslanova, 28 yanvar 2011

Almaniyada yaşayan keçmiş deputatlığa namizəd və İctimai Palatanın üzvü Yeganə Əmiraslanovanın Azərbaycan paytaxtı Bakıda saxlanıb, sonra da buraxıldığı deyilir.

Bu barədə məlumatı o da təqsdiqləyib. Bakı Şəhər Prokurorluğunda 3-4 saat dindidildiyini söyləyən xanım, amma detallı danışmaq istəməyib.

O, yalnız əlavə edib ki, Bakıya xəstə ailə üzvünə baş çəkmək məqsədilə gəlib

Hələlik, onun dediklərinə Bakı Şəhər Prokurorluğundan da münasibət almaq mümkün olmayıb.

***

Mühacirin Bakıda saxlandığı deyilir

İllərdir Almaniyada yaşayan keçmiş deputatlığa namizəd və İctimai Palatanın üzvü Yeganə Əmiraslanovanı Azərbaycan paytaxtı Bakıda hüquq mühafizə orqanlarının saxladığı deyilir.

Bu barədə "Turan " İnformasiya Agentliyinə məlumat verən Y.Əmiraslanovanın yaxınları bildirib ki, o, dünən iyulun 29-da Almaniyadan Bakıya gələrkən Heydər Əliyev adına hava limanında saxlanıb. Yaxınları əlavə edib ki, Yeganə Əmiraslanova Almaniya vətəndaşıdır.

Hazırda yaxınları Y.Əmiraslanovanın harada olduğunu bilmirlər.

Məsələ ilə bağlı Azərbaycan Daxili İşlər Nazirliyi və Baş Prokurorluğundan münasibət öyrənmək, hələlik, mümkün olmayıb.

Azərbaycan Türkiyəyə 500 nəfər göndərəcək 

Türkiyədə yanğınlar

İyulun 30-da Azərbaycan Baş naziri Əli Əsədov ilə Türkiyə Vitse-prezidenti Fuat Oktay arasında telefon danışığı olub.

Bu barədə Azərbaycan Nazirlər Kabineti məlumat yayıb.

Məlumata görə, telefon danışığında meşə yanğınları ilə mübarizədə Azərbaycanın Türkiyəyə hər cür yardım göstərməyə və bunun üçün bütün lazımi qüvvələri səfərbər etməyə hazır olduğu vurğulanıb :

"Qeyd edilib ki, Azərbaycan Prezidentinin ... göstərişlərinə əsasən Fövqəladə Hallar Nazirliyinin 500 nəfərdən ibarət şəxsi heyəti, helikopterlər, həmçinin digər lazımi avadanlıq və ləvazimatlar ən qısa zamanda qardaş Türkiyəyə göndəriləcək"

İyulun 28-i və 29-da Türkiyənin 20-dən çox vilayətində baş verən 60-dan artıq meşə yanğını nəticəsində azı 4 nəfərin həlak olduğu bildirilir. Xeyli heyvanın tələf olduğu, bir çox ev, iaşə obyektlərinin yararsız vəziyyətə düşdüyü deyilir.

Saxta koronavirus sənədində şübhəli sayılanlar məsuliyyətə cəlb olunub

Baş Prokurorluğun binası

Azərbaycanda 101 nəfərə saxta koronavirus sənədi satmaqda şübhəli sayılan vəzifəli şəxslərin məsuliyyətə cəlb olunduğu bildirilir.

Bu barədə bu gün, iyulun 30-da Baş Prokurorluq məlumat yayıb.

Məlumatda qeyd edilib ki, “ƏSR” və “ARKAN TOUR” məhdud məsuliyyətlə cəmiyyətlərin (MMC) vəzifəli şəxslərinin hərəkətləri ilə bağlı Korrupsiyaya qarşı Mübarizə Baş İdarəsində cinayət işi başlanıb.

Açıqlamaya görə, “ƏSR” MMC-nin direktoru Əsgər Bayramovun “ARKAN TOUR” MMC-nin direktoru Tünzalə Əliyeva və qeyriləri ilə əlbir olaraq tanışı Seymur Mürsəlovun xahişi ilə 101 şəxsin Gəncə Hava Limanından Rusiyaya getmələri üçün onların tibbi müayinədən keçmədən COVID-19 testinin nəticələrinə dair saxta sənədlər hazırlamasına şübhə yaranıb :

"Əsgər Bayramov və Tünzalə Əliyevaya Cinayət Məcəlləsinin 308.2 (vəzifə səlahiyyətlərindən sui-istifadə etmə ağır nəticələrə səbəb olduqda), 320.1 (rəsmi sənədləri qanunsuz hazırlama və satma) və 320.2-ci (bilə-bilə saxta sənədlərdən istifadə etmə) maddələri ilə ittiham elan edilib. Əsgər Bayramovun barəsində məhkəmənin qərarı ilə həbs, Tünzalə Əliyeva barəsində isə polisin nəzarəti altına vermə qətimkan tədbiri seçilib. "
Amma bu məlumata, hələlik, Əsgər Bayramov, Tünzalə Əliyevaya, Seymur Mürsəlov və onların vəkillərindən münasibət almaq mümkün olmayıb.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 4,1 milyondan çox şəxsin vəfat etdiyi açıqlanıb. Azərbaycanda isə ümumilikdə 342 548 nəfərin koronavirus infeksiyasına yoluxması faktı müəyyən edilib, onlardan 5019-nun vəfat etdiyi bildirilib.

615 yeni yoluxma qeydə alınıb, 5 ölüm 

İran, koronavirusa yoluxmuş xəstələrin müalicə aldığı xəstəxana, arxiv foto

Son gündə Azərbaycanda koronavirus (COVID-19) infeksiyasına 615 yeni yoluxma faktı qeydə alınıb, bu virusa yoluxanlardan 181 nəfər sağalıb.

Nazirlər Kabineti yanında Operativ Qərargahdan iyulun 29-da habelə verilən məlumata görə, bu virusla bağlı analiz nümunələri müsbət çıxan 5 nəfər də vəfat edib.

Açıqlamaya görə, indiyədək ölkədə ümumilikdə 342 548 nəfərin koronavirus infeksiyasına yoluxması faktı müəyyən edilib, onlardan 332 574-ü sağalıb, 5019-ı vəfat edib, aktiv xəstə sayı 4 955-ə yüksəlib.

Bildirildiyinə görə, son sutka ərzində yeni yoluxma hallarının müəyyənləşdirilməsi ilə əlaqədar ölkədə 10 423, indiyə qədər isə ümumilikdə 4 014 073 test icra olunub.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 4,1 milyondan çox şəxsin vəfat etdiyi açıqlanıb.

DIN-in qarşısında aksiya 

DİN

İyulun 29-da bir qrup fəal Daxili İşlər Nazirliyinin (DİN ) qarşısında aksiya keçirməyə cəhd edib.

Onlar son günlər ərzində 5 qadının qətlə yetirildiyini bildirərək, buna etiraz etdiklərini vurğulayıblar.

Fəallar hesab edir ki, qadınların ölümündə güc strukturların da məsuliyyəti var. "Qadınların qətlləri siyasidir. Ərinin zorakılığı ilə üzləşib hüquq-mühafizə orqanlarına müraciət edən qadınlara dəfələrlə "boşanma, döyübsə eybi yox" deyirlər, nəticə isə acınacaqlı olur"., fəallar iddia ediblər.

Aksiya iştirakçıları nazirliyinin qarşısına üstündə öldürüldüyü deyilən qadınların adları yazılmış tabutun maketini gətiriblər. Polis əməkdaşları isə həmin maketi onların əlindən alıb.

Aksiya iştirakçılarından 3 nəfər - Aytac Ağazadə, Gülnara Mehdiyeva və Sevgi İsmayılbəylinin saxlanıldığı, daha sonra buraxıldığı bildirilir.

DİN-in mövqeyi

Daxili İşlər Nazirliyinin Mətbuat xidmətinin Kütləvi informasiya vasitələri və İctimaiyyətlə əlaqələr şöbəsinin rəisi Elşad Hacıyev isə "Turan" İnformasiya Agentliyinə bildirib ki, aksiyada saxlanan yoxdur.

O, əlavə edib ki, "qadınların qətlləri siyasidir" ifadəsinin özü siyasi layihədi : "Azərbaycanda qadın hüquqları etibarlı qorunur, polisə daxil olan bütün müraciətlərə dərhal çevik reaksiya verilir. Hansısa formada qadınların zorakılığa məruz qalması, onun hüquqların pozulması ilə bağlı kimdəsə məlumat varsa, xahiş edirik həmin məlumatları müvafiq qaydada polis orqanlarına versinlər".

Hadrut meşələrində saxlananların son qrupu da 6 il həbs cəzası aldı

Hadrut meşələində saxlanılan erməni hərbçiləri, Bakıda məhkəmədə, 16 iyun 2021

Azərbaycanla Ermənistan arasında 10 noyabr razılaşmasından bir ay sonra Hadrut meşələrində saxlanılan ermənilərdən sonuncu qrupunun məhkəməsi yekunlaşıb. İyulun 29-da onlara hökm oxunub və hər birinə 6 il həbs cəzası verilib.

Bakı Ağır Cinayətlər Məhkəməsində çıxarılan hökmlə onlar Azərbaycanın dövlət sərhədini icazəsiz keçmə və qanunsuz silah-sursat saxlama kimi əməllərdə suçlu sayılıblar. Məhkəmə Ermənistan vətəndaşlarına Azərbaycan Cinayət Məcəlləsinin 214 (terrorçuluq) və 279 (qanunvericilikdə nəzərdə tutulmayan silahlı birləşmələrin tərkibində iştirak) maddələriylə verilən ittihamları əsassız sayaraq, onlara xitam verib.

Məhkəmə hökmünə görə, daha öncə mühakimə olunanlar kimi, budəfəkilər də cəzalarını başa vurandan sonra Azərbaycandan deportasiya olunmalıdılar.

Cinayət işinin materiallarında iddia olunur ki, Azərbaycan və Ermənistan arasındakı 10 noyabr razılaşmasından sonra Ermənistan vətəndaşları silahlanaraq, məşələrdə gizlənib və Azərbaycana qarşı terror-təxribatlar planlaşdırıblar. Dekabrın 12-də onları Azərbaycan silahlı qüvvələri saxlayıb.

Təqsirləndirilən şəxslər bu iddialarla razılaşmır və bildirirlər ki, rəsmi qaydada silahlı qüvvələrdə xidmətə çağrılıblar.

Xatırlatma

Hadrut meşələrində saxlanılanların işi 4 qrupa bölünüb. Hər qrupda 13-14 nəfər olmaqla, onlar Bakı Ağır Cinayətlər Məhkəməsində hakim önünə çıxarılıb. İlk 14 nəfərin mühakiməsi iyulun 2-də yekunlaşıb. Onlardan 12-nə 6 ay, 2-nə isə 4 il həbs cəzası verilib. Altı ay cəza alanlarla bağlı müddət dekabrdan hesablanıb, təqsirləndirilən şəxslərin cəzası başa çatmış sayılıb və onlar ölkələrinə göndərilib. Elə həmin gün Ermənistan Ağdamda basdırılan minaların xəritəsini Azərbaycana təqdim edib.

Ardınca hökm çıxarılanların hamısı 6 il azadlıqdan məhrum edilib.

Ermənistan tərəfi Azərbaycanda mühakimə edilən vətəndaşlarının hərbi əsir olduğunu bildirir. Ombudsman Arman Tatoyan hərbi əsirlərin hər hansı formada məhkəməsinin beynəlxalq hüquq pozuntusu olduğunu deyib.

Ötən il 44 günlük müharibə nəticəsində Azərbaycan Qarabağın bir hissəsini və ətraf 7 rayonu işğaldan azad edib. Azərbaycan 10 noyabr atəşkəs razılaşmasından sonra öz ərazisində saxlanılan erməni hərbçilərin əsir deyil, terrorçu-diversant olduğunu iddia edir.

Kəlbəcər istiqamətində yenə atəşkəsin pozulduğu bildirilir

Azərbaycan-Ermənistan sərhəddində Azərbaycan əsgərləri, 10 fev 2021

Azərbaycan atəşkəsə riayət etdiyini deyir

Azərbaycan Müdafiə Nazirliyi (MN ) bu gün, iyulun 29-da cəbhədəki vəziyyətlə bağlı növbəti açıqlama yayıb.

Həmin açıqlamada isə qeyd edilir ki, Ermənistan tərəfinin atəşkəsi Azərbaycanın pozması haqqında yaydığı məlumat həqiqəti əks etdirmir :

" Bildiririk ki, Azərbaycan Ordusu Kəlbəcər istiqamətində iki ölkənin dövlət sərhədində atəşkəsə riayət edir."

***

Azərbaycan Kəlbəcər istiqamətində yenə mövqeylərinin vurulduğunu deyir.

Bu barədə iyulun 29-u Azərbaycan Müdafiə Nazirliyi (MN ) məlumat yayıb.

Məlumata görə, Ermənistan atəşkəsə riayət olunması haqqında razılaşmanı yenidən kobud surətdə pozub.

Nazirlik vurğulayır ki, iyulun 29-u saat 02:45-dən 03:40-dək Ermənistan silahlı qüvvələrinin bölmələri öz mövqelərindən Azərbaycan ordusunun Kəlbəcər rayonunun Zəylik kəndi istiqamətindəki mövqelərini avtomat və qumbaraatanlardan atəşə tutub.

Aşıqlamaya görə, Azərbaycan mövqelərinə tərəf 10-12 ədəd F-1 əl qumbarası da atılıb, qarşı tərəfə cavab atəşi açılıb.

Ermənistan bir həbçisinin yaralandığını bildirir

Ermənistan müdafiə nazirliyi iyulun 29-da qısa atəşkəs pozuntusu nəticəsində bir həbçinin yaralandığını bildirir və pozuntuya görə Azərbqaycanı ittiham edir.

Məlumatda bildirilir ki, iyulun 29-u səhər saat 3 radələrində Kəlbəcər və Qeqarkun istiqamətində Azərbaycan ordusu Ermənistan mövqelərinə atəş açıb. Açıqlamada səhər saat 7 radələrindən sonra vəziyyətin sakit olduğu vurğulanır.

Son aylar Azərbaycanla Ermənistan arasında yenidən gərginliyin artdığı müşahidə olunur.Artıq, tez-tez xüsusilə iki ölkə arasında sərhəddə atəşkəsin pozulması ilə bağlı qarşılıqlı iddilar səslənir.

Atəşkəsin pozulmasına görə, onlar bir-birlərini günahlandırırlar. Azərbaycan son günlər iki hərbi qulluqçusunun yaralandığını bildirib.Gərginliyə görə, öz növbəsində Azərbaycanı günahlandıran Ermənistanın da açıqlamasına görə, son gündə 3 hərbçisi ölüb, ikisi isə yaralanıb.

Hətta dünən, iyulun 28-də Azərbaycan Müdafiə Nazirliyi Rusiyanın təşəbbüsü ilə atəşkəs elan olunduğunu bildirmişdi.Amma sonra yenə atəşkəsin pozulması ilə bağlı qrşılıqlı iddialar səsləndi.

Xatırlatma

2020-ci il Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib.Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib.Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi Ermənistanın Azərbaycana ərazi iddiaları ilə 1988-ci ildə başlayıb.1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Yoluxmada artım

İyulun 28-də verilən məlumata görə, COVID-19 üçün götürülən analiz nümunələri müsbət çıxan 3 nəfər vəfat edib

Son gündə Azərbaycanda koronavirus (COVID-19) infeksiyasına 750 yeni yoluxma faktı qeydə alınıb, bu virusa yoluxanlardan 134 nəfər sağalıb.

Nazirlər Kabineti yanında Operativ Qərargahdan iyulun 28-də verilən məlumata görə, COVID-19 üçün götürülən analiz nümunələri müsbət çıxan 3 nəfər vəfat edib.

Açıqlamaya görə, indiyədək ölkədə ümumilikdə 341 min 933 nəfərin koronavirus infeksiyasına yoluxması faktı müəyyən edilib, onlardan 332 min 393-ü sağalıb, 5014 -ü vəfat edib, aktiv xəstə sayı 4526-ə yüksəlib.

Bildirildiyinə görə, son sutka ərzində yeni yoluxma hallarının müəyyənləşdirilməsi ilə əlaqədar ölkədə 11 min 058, ötən müddət ərzində isə ümumilikdə 4 milyon 3650 test aparılıb.

Son həftələr Azərbaycanda koronavirsa yoluxmada yeniden artim olduğu bildirilir.Dünən, iyulun 27-də 468, iyulun 26-da isə bu virusa 272 yeni yoluxma faktının qeydə alındığı açıqlanmışdı.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 4,1 milyondan çox şəxsin vəfat etdiyi açıqlanıb.

Azərbaycanlı əsirlərə işgəncədə suçlanan iki Ermənistan vətəndaşına 20 il cəza istənilib

Lüdviq Mkrtıçyan və Alyoşa Xosrovyan məhkəmədə, 2 iyun 2021

Ötən əsrin 90-cı illərində əsirlikdə olan azərbaycanlılara işgəncə verməkdə suçlanan iki nəfər Ermənistan vətəndaşının - Lüdviq Mkrtıçyan və Alyoşa Xosrovyanın mühakiməsi bitməkdədir. İyulun 28-də onların işi üzrə 3 ay sürən məhkəmə araşdırmasının tamamlandığı açıqlanıb.

Məhkəmədə çıxış edən prokuror onların hər birinin cəzasının ilk yarısını qapalı həbsxana rejimində, qalanını ciddi rejimli cəzaçəkmə müəssisəsində çəkməklə, 20 il azadlıqdan məhrum edilməsini istəyib.

İşgəncə vermə, qanunsuz silahlı birləşmələrin tərkibində iştirak və başqa əməllərdə suçlanan L.Mkrtıçyanla A.Xosrovyan özlərini təqsirli bilmirlər. Məhkəmədəki ifadələrində də heç kimə işgəncə vermədiklərini söyləyiblər.

Onlar 2020-ci ilin oktyabrında saxlanılıblar.

Ermənistan tərəfi Azərbaycanda mühakimə edilən vətəndaşlarının hərbi əsir olduğunu bildirir. Ombudsmanı Arman Tatoyan deyib ki, hərbi əsirlərin hər hansı formada mühakimə olunması beynəlxalq hüququn kobud şəkildə pozulmasıdır. Azərbaycan onlarə hərbi əsir deyil, terrorçu-diversant sayır. Düzdür, onların bir qismi sonradan mina xəritələri qarşılığında azadlığa buraxılıb.

Azərbaycan bu il daha çox buğda alıb

Buğda tədarükü, Rusiya, arxiv foto

Bu ilin altı ayında Azərbaycana 401,5 min ton buğda idxal edilib.
Azərbaycan Dövlət Gömrük Komitəsinin (DGK) məlumatına görə, hesabat dövründə idxal edilən buğdanın dəyəri 102 milyon ABŞ dolları olub.

Ötən ilin eyni dövründə ölkəyə 78,4 milyon dollarlıq 358,5 min ton buğda idxal edilmişdi.

Son illər Azərbaycana buğda idxalının artdığı bildirilir.

Biləsuvarda suya görə aksiya-2 nəfərə 15 sutka

Saatlı rayonunda su ilə bağlı aksiya, 3 iyul 2020

Biləsuvarda saxlananlardan iksinə 15 sutka verilib

Biləsuvar rayon Polis Şöbəsindən dünən, iyulun 28-də aksiyada saxlanan və tez də buraxılmayan 4 şəxsin taleyinə aydinlıq gətiriblər.

"Turan" İnformasiya Agentliyinin xəbərinə görə, şöbədən onlara deyilib ki, həmin 4 şəxsdən ikisinə 15 sutka inzibati həbs verilib. Qalan iki nəfərin isə cərimələnib sərbəst buraxildığı bildirilib.

Amma qərarların detallarını öyrənmək və inzibati məsuliyyətə cəlb edilən şəxslərdən, onların vəkillərindən buna münasibət öyrənmək, hələlik, mümkün olmayıb.

***

İyulun 28-də Biləsuvar rayon mərkəzində bir qrup yerli sakinin su problemi ilə əlaqədar etiraz aksiyasına cəhd göstərdiyi bildirilir.

Yerli mənbələrdən verilən məlumatlara görə, rayonun Yuxarı Cürəli və Təzəkənd kənd sakinləri susuzluq problemini icra hakimiyyətinin yerləşdiyi küçəni bağlamağa diqqətə çatdırmaq istəyiblər.

Məlumatlara görə, polis etirazçılara xəbərdarlıq edib. Xəbərdarlığa əməl etməmələri iddiası ilə bir neçə etirazçı polis şöbəsinə aparılıb.

Bildirilir ki, şikayətçilərin bir qismini rayon İcra Hakimiyyətində qəbul ediblər, məsələlərin yoluna qoyulacağı vurğulanıb.

Bütün bu deyilənlərə, hələlik, Biləsuvar rayon İcra Hakimiyyətindən münasibət almaq mümkün olmayıb.

Amma«Turan» İnformasiya Agentliyinin xəbərinə görə, Biləsuvar rayon Polis Şöbəsindən onlara deyilib ki, bu gün, iyulun 28-də şöbəyə gətirilənlərin 6 -sı söhbət aparıldıqan sonra sərbəst buraxılıb. Daha bir neçə şəxslə bağlı isə araşdırma getdiyi qeyd edilib.

Ermənistan və Rusiya vətəndaşlarına Bakıda 15 il həbs verilib

Atəşkəs razılaşmasından sonra Qarabağda saxlanılan Ermənistan hərbçilərinin Bakıda məhkəməsi, 16 iyun 2021

Rusiya və Ermənistan vətəndaşları Gevorg Sucyanla David Davtyan Bakıda məhkəmənin hökmü ilə 15 il azadlıqdan məhrum ediliblər.

Erməni əsilli Rusiya vətəndaşı, bloger, “Yeni Ermənistan Vətən” diaspor təşkilatının rəhbəri Gevorg Sucyan və Ermənistandan olan David Davtyan Bakıda məhkəmənin hökmü ilə 15 il azadlıqdan məhrum ediliblər.

İyulun 28-də Bakı Ağır Cinayətlər Məhkəməsində onlara hökm oxunub. Hökmə görə, onlar casusluq, qanunsuz silahlı birləşmələrə qatılma, qanunsuz silah saxlama, Azərbaycanın dövlət sərhədini qanunsuz keçmə kimi əməllərdə suçlu sayılıblar.

İddia olunur ki, təqsirləndirilən şəxslər Ermənistan xüsusi xidmət orqanlarıyla əməkdaşlıq edib, onların tapşırığıyla hərbi məlumatlar toplayıb ötürməkdən ötrü Qarabağ bölgəsindəki Azərbaycan ərazilərinə qanunsuz gəliblər.

Hökmdə o da yazılıb ki, onlar cəzanın ilk 5 ilini həbsxana rejimində (Qobustanda-red.), qalanını ciddi rejimli cəzaçəkmə müəssisəsində çəkməlidir. Cəzaları başa çatandan sonra isə Azərbaycandan deportasiya olunmalıdırlar.

Davtyan və Sucyan məhkəməyə ifadələrində bu ittihamı qəbul etməyiblər

Onlar nə xüsusi xidmət orqanı ilə əməkdaşlıq etdiklərini, nə də casusluq məqsədilə Qarabağa gəldiklərini bildiriblər. Deyiblər ki, ötən il 44 günlük müharibə başlayandan sonra hərbçilərə və cəbhə bölgəsindəki mülki şəxslərə humanitar yardımların çatdırılmasıyla məşğul olublar.

Təqsirləndirilən blogerin sözlərinə görə, Xankəndidə yaşayanlara humanitar yardım aparanda Laçın dəhlizində saxlanılıblar.

Prokuror təqsirləndirilən şəxslərə 16 il həbs cəzası verilməsini istəmişdi.

Xatırlatma

Bloger G.Sucyan 2020-ci ildə Azərbaycanla Ermənistan arasında müharibə davam edən ərəfədə - noyabrın ilk günlərində Kəlbəcərdən – İstisudan dostu ilə birlikdə video çəkib, özünün Facebook səhifəsindən paylaşmışdı. Həmin videoda o, azərbaycanlıların ünvanına kəskin ifadələr səsləndirmişdi.

“Scjyan müharibə vaxtı Qarabağdakı yerli əhaliyə humanitar yardım edirdi. Müharibədən sonra vəziyyətlə yerində tanış olmaq üçün ora gedib və Laçın-Şuşa yolunda əsir götürülüb”, - Ermənistanın Ombudsman Aparatından onun saxlanması belə şərh olunub.

Ermənistan tərəfi Azərbaycanda mühakimə olunan vətəndaşlarının hərbi əsir olduğunu bildirir. Ombudsmanı Arman Tatoyan deyib ki, hərbi əsirlərin hər hansı şəkildə mühakiməsi beynəlxalq hüququn kobud pozuntusudur.

Ötən il 44 günlük müharibə nəticəsində Azərbaycan Qarabağın bir hissəsini və ətraf 7 rayonu işğaldan azad edib. Azərbaycan 10 noyabr atəşkəs razılaşmasından sonra öz ərazisində saxlanan erməni hərbçiləri əsir deyil, terrorçu-diversant sayır. Amma onların bir qismi sonradan mina xəritələri qarşılığında azad olunaraq ölkələrinə göndərilib.

Rusiya atəşkəsə çağırıb-Azərbaycan razılaşdığını bildirir

Ermənistan hərbçiləri sərhəddə, 17 may 2021

"Ermənistan-Azərbaycan dövlət sərhədində Bakı vaxtı ilə saat 10:00-dan etibarən atəşkəsin elan olunması ilə bağlı Rusiya tərəfinin təşəbbüsü tərəfimizdən qəbul edilmişdir".

Azərbaycan Müdafiə Nazirliyinin (MN) iyulun 28-də səhər saat 10:37 radələrində yaydığı məlumatda belə deyilir.

Amma nazirlik Ermənistanı atəşkəsə əməl etməməkdə günahlandırır.

«Buna baxmayaraq, Ermənistan tərəfi əlavə olaraq tank və 120-millimetrlik minaatanlardan istifadə etməklə vəziyyəti gərginləşdirməkdə və mövqelərimizi atəşə tutmaqda davam edir. »

Bu məlumata hələlik, Ermənistan Müdafiə Nazirliyinin münasibəti bəlli deyil.

İyulun 28-də Azərbaycan və Ermənistan qarşılıqlı məlumat yayaraq Kəlbəcər istiqamətində döyüşlərin getdiyini bildiriblər. Azərbaycan Müadfiə nazirliyi atəşkəsin pozulması nəticəsində iki hərbçisinin yaralandığını, Ermənistan isə 3 hərbçisinin öldüyünü, iki hərbçisinin yaralandığını açıqlayıb. Bundan sonra Rusiya tərəfləri atəşə çağırıb.

Azərbaycan XİN Ermənistanı  danışıqlara  dəvət edir

Azərbaycan Xarici İşlər Nazirliyi

Azərbaycan Xarici İşlər Nazirliyi (XİN) də cəbhədəki vəziyyətlə bağlı açıqlama yayıb.
Açıqlamada Azərbaycan Müdafiə Nazirliyinə istinadən qeyd edilir ki, iyulun 28-də Ermənistan silahlı qüvvələri Azərbaycan ordusunun Kəlbəcər rayonu ərazisindəki mövqelərini intensiv atəşə tutub :

«Nəticədə iki hərbi qulluqçumuz yaralanıb. Vurğulayırıq ki, Ermənistan-Azərbaycan dövlət sərhədində növbəti təxribatı törədərək, vəziyyəti gərginləşdirmək məsuliyyəti tam olaraq Ermənistanın hərbi-siyasi rəhbərliyinin üzərindədir. »

XİN də öz açıqlamasında Ermənistanı bölgədə yaranmış yeni reallıqları qəbul etməyə, hərbi təxribatlara son verməyə və iki dövlət sərhədinin delimitasiyası üzrə danışıqlara başlamağa dəvət edir.

Hələki Ermənistan XİN-dən bu çağırışa münasibət bildirilməyib.

Bakıda qumbara partladığı, ölən və yaralananların olduğu deyilir

Məlumata görə, partlayış zamanı 4 polis əməkdaşı müxtəlif dərəcəli bədən xəsarətləri alıb

Azərbaycan Baş Prokurorlugu ilə Daxili İşlər Nazirliyi bugün, iyulun 27-də Bakıda qumbara partlaması və ölüm halı ilə bağlı açıqlama yayıb.

Rəsmi açıqlamaya görə, iyulun 27-də narkotiklərin qanunsuz dövriyyəsi ilə bağlı daxil olmuş əməliyyat məlumatı əsasında 1982-ci il təvəllüdlü Müseyib Ələsgərovun paytaxtın Yasamal rayonu ərazisində idarə etdiyi avtomaşın saxlanılarkən polis əməkdaşlarına itaətsizlik göstərərək qaçmağa cəhd göstərib :

"Bu zaman üzərində olan qumbara partlamış, nəticədə M.Ələsgərov ölmüşdür. Avtomaşında olan sərnişin,... 1993-cü il təvəllüdlü Elman Qurbanov isə qaçarkən saxlanıb. Şəxsi axtarış zamanı ondan külli miqdarda narkotik vasitə aşkar olunaraq götürülüb".

Məlumata görə, partlayış zamanı 4 polis əməkdaşı müxtəlif dərəcəli bədən xəsarətləri alıb :

"Avtomaşına baxış keçirilərkən əlavə silah-sursat aşkarlanıb. Faktla bağlı Yasamal rayon Prokurorluğunda Cinayət Məcəlləsinin müvafiq maddələri ilə cinayət işi başlanılıb, hazırda iş üzrə istintaq hərəkətləri və əməliyyat-axtarış tədbirləri davam etdirilir."

Hər iki şəxsin əvvəllər mühakimə edildiyi vurğulanır.

Amma bu məlumata, hələlik, nə saxlanan şəxsdən, onun vəkilindən, nə də Müseyib Ələsgərovun yaxınlarından münasibət öyrənmək mümkün olub.

Davamı

XS
SM
MD
LG