ABŞ hökuməti elektron siqaretlərə tam verən minlərlə maddəni qadağan etməyi planlaşdırır. Bunu Prezident Donald Trump bu həftə deyib.
Son vaxtlar yeniyetmələr arasında elektron siqaretin yayılması valideynləri, siyasətçiləri, səhiyyə rəsmilərini narahat etməyə başlayıb.
“The Associated Press” agentliyi yazır ki, Ağ evin bu qəfil açıqlaması bir neçə milyard dollarlıq elektron-siqaret sənayesinin yenidən qurulması deməkdir.
Ərzaq və Dərman Administrasiyası (FDA) bazardan tütün xaric siqaretə tam verən bütün maddələrin çıxarılması qaydalarını hazırlayacaq. Bunu jurnalistlərə Səhiyyə və Sosial Təminat Naziri Alex Azar deyib. O, Oval ofisdə prezident, birinci ledi Melania Trump və FDA rəhbəri vəzifəsini icra edən Ned Sharpless ilə görüşüb.
Melania Trump oğluna görə narahatdır
Trump-ın oğlu Barron 13 yaşındadır. Prezidentin sözlərinə görə, elektron siqaret elə bir problemə çevrilib ki, o, valideynlərin nə baş verdiyindən agah olmasını istəyir. “Biz adamların xəstəyə çevrilməsinə, gənclərimizin təsirə məruz qalmasına imkan verə bilmərik”, – Trump vurğulayıb.
Melania Trump bu günlərdə uşaqların elektron siqaretə bağlılığından narahatlığını bildirib. Prezident görüşdə deyib ki, “Onun, bizim oğlumuz var, gənc, yaraşıqlı oğlandır və o (Melania Trump) bu məsələdən çox narahat olur”.
Bu arada səhiyyə orqanları elektron siqaret istifadəçilərində aşkarlanmış yüzlərlə nəfəs xəstəliyini araşdırırlar. Bu hallara ayrıca cihaz, yaxud maddənin səbəb olduğu müəyyənləşməsə də, bir çox hallarda marixuana ətirli elektron siqaretdən istifadə olunduğu bildirilir.
Trump rəsmilərinin elan etdiyi qadağalar yalnız nikotin tərkibli elektron siqaret məhsullara aid ediləcək.
FDA-nın elektron siqaret ətirlərini 2016-cı ildən qadağan etmək səlahiyyəti var, ancaq belə bir addım atmaq çağırışlarına cavab vermirdi. Agentlik rəsmiləri deyirdilər ki, bu xüsusi tamların siqareti tərgitməkdə köməyini öyrənirlər.
Federal qanunlara görə, elektron siqaretlər və digər tütün məhsullarının yaşı 18-dən az olanlara satılması qadağandır. Amma federal səhiyyə rəsmilərinin açıqladığı məlumata görə, bu il orta məktəb şagirdləri arasında hər dörd nəfərdən birindən də çoxu elektron siqaretdən istifadə edib. Ötən il bu rəqəm hər 5 şagird üzrə 1 nəfər idi. Səhiyyə rəsmiləri bu tendensiyanı “epidemik” adlandırıblar. Onlar bu yeniyetmələrin daha sonra siqaretə qurşanacağından ehtiyatlanırlar.
Yeniyetmələrin 80 faizdən çoxu elektron siqareti “xoşladığı tama görə” seçdiyini söyləyib. Bunu hökumətin rəy sorğuları üzə çıxarıb.