Rusiyanın İstintaq Komitəsi Xaçaturyan bacılarının vəkilinə qızların atasına cinayət işi açılmasıyla bağlı imtina göndərib. Sənəddə atanın qızlarını incitməsi, onlara cinsi təcavüzü də sübuta yetirilib. Bu haqda TASS agentliyi və “Kommersant” qəzeti yazır.
“Qızlara qarşı mənəvi və cinsi zorakılıq faktlarını müstəntiqlər təsdiqləyir, imtinanın səbəbi isə formal xarakter daşıyır və gözlənilən idi”, – vəkil Sergey Parşin TASS agentliyinə deyib.
Vəkil ümid edir ki, müstəntiqlərin müəyyənləşdirdiyi faktlar onlara qızların özünümüdafiə məqsədilə hərəkət etdiyini sübuta yetirməyə kömək edəcək və cinayət işi bağlanacaq.
Üç bacını planlaşdırılan qətl maddəsi üzrə 8 ildən 20 ilədək həbs gözləyir. Prokurorluq ittihamnamənin son variantında yazıb ki, qətlin motivi atanın qızlarına qarşı qanunsuz zorakı hərəkətləri olub. Vəkillər isə qızların özlərini müdafiə etdiklərini deyirlər.
Mixail Xaçaturyanın cəsədi ötən ilin iyulunda Moskvadakı evində tapılıb. Onun bədənində çoxsaylı bıçaq yaraları, başında çəkic zədəsi aşkarlanıb. Polis qızları çağırıb və onlar qətli etiraf ediblər.
Mariya, Kristina və Angelina, onların anaları və qonşuları Mixail Xaçaturyanın övladları ilə qəddar davrandığını deyirlər. Xaçaturyanın digər qohumları isə onu müdafiə edir.
