İnquşetiya sakini Murad Khazbiev oktyabrda Çeçenistanda sərhədlərin dəyişdirilməsinə etirazlara qatılıb. O, həmin günlərdə internetin kəsilməsinə görə Federal Təhlükəsizlik Xidmətini (FSB) və Daxili İşlər Nazirliyini (DİN) Maqas rayon məhkəməsinə verib. Bu haqda “Vedomosti” məhkəmə iddiasının surəti və “Agora” beynəlxalq hüquq müdafiə təşkilatının vəkili Andery Sabinin-ə istinadla xəbər verir.
Maqas və İnquşetiyanın digər şəhərlərində etirazlar zamanı internetin və mobil xidmətin kəsilməsindən aksiya iştirakçılarının çoxu şikayətlənirdi. Ümumilikdə Roskomnadzora 400-dən artıq şikayət verilib.
MOBİL İNTERNET AZI İKİ HƏFTƏ KƏSİLİB
İlkin olaraq, mobil operatorlar şikayətlərə reaksiya vermirdilər, sonra kəsintiləri texniki problemlərlə izah etdilər. Sonucda isə boyunlarına aldılar ki, hüquq-mühafizə orqanlarının sorğusuna əsasən İnquşetiyada mobil interneti azı iki həftəliyə kəsiblər. Amma belə bir sorğuyla hansı güc strukturları müraciət edib, Roskomnadzor bunu açıqlamayıb.
Khazbiev tələb edir ki, DİN və FSB-nin hərəkəti qanunsuz hesab olunsun.
Ötən il iyunun 8-də, oktyabrın 4-17-də və noyabrın 27-də və bu il martın 16-da İnquşetiya sakinlərinin interneti olmayıb. İddiada qeyd olunur ki, internet respublikada dinc aksiyaların keçirildiyi vaxtda kəsilib.
«Bu tədbirlərin iştirakçısıyam və tənqidi fikirləri, etirazçıların şüarlarını tamamilə bölüşürəm. Amma fikirlərimi sosial şəbəkələrdə açıq şəkildə bildirmək imkanım olmayıb, çünki mobil internetdə məhdudiyyətlə üzləşmişəm», – İnquşetiya sakininin məhkəmə iddiasında deyilir.
İddiada üçüncü tərəf kimi Roskomnadzor və Megafon göstərilib, çünki Khazbiev bu operatordan istifadə edir.
Ötən ilin sentyabrında Çeçenistan və İnquşetiya rəhbərləri regionlar arasındakı inzibati sərhədlər və qeyri-yaşayış ərazilərinin mübadiləsi üzrə razılaşma əldə ediblər. Ancaq bu razılaşma İnquşetiyada böyük etirazlar yaradıb, sakinlər deyirdilər ki, qonşu respublikaya torpaq verilməsi məsələsi ümumxalq referendumuna çıxarılmalıdır.
Etirazlara baxmayaraq, Rusiya Konstitusiya məhkəməsi bu razılaşmanı təsdiqlədi, İnquşetiya parlamentinin deputatları isə onu tezliklə ratifikasiya etdilər.
