İranda tanınmış müxalifətçilər Mir Hossein Musavi ilə həyat yoldaşı Zahra Rahnavard-ın sosial mediada yeni fotosu yayılıb. Onlar səkkiz ildir ev dustağıdırlar.
Fotonun ilk olaraq martın 3-də Kalameh müxalifət vebsaytı tərəfindən Telegram mesajlaşma əlavəsində dərc olunduğu bildirilir.
Foto sosial mediada geniş paylaşılıb. İslahatçı Etemadonline xəbər saytı onu Twitter hesabında heç bir izahat vermədən yerləşdirib. Amma vebsaytın özündə dərc olunmayıb.
Ölkədəki bir çox jurnalistlər və fəallar da fotonu, həmçinin Mir Hossein-in namaz qılan yerdə videosunu paylaşıblar.
Bu videonun Musavinin bacısının evində lentə alındığı bildirilir.
HAKİMİYYƏT YUMŞALIR?
Məlumatlara görə, hakimiyyət son aylar Musavi və arvadının yaxın qohumlarla görüşməsinə icazə verir.
Onlar 2011-ci ildə ev dustağı ediləndən medianın onların fotosunu yayması qadağan olunub. Musavi və islahatçı ruhani Mehdi Karrubi 2009-cu ilin prezident seçkisi zamanı müxalifət liderləri kimi tanınmışdılar.
77 yaşlı Musavi, 81 yaşlı Karrubi və universitet professoru olan 73 yaşlı Rahnavard 2011-ci ilin fevralında ev dustağı ediliblər. Onlar mübahisəli seçki, insan haqları pozuntuları məsələlərini dəfələrlə hakimiyyət qarşısında qaldırmışdılar.
İran Prezidenti Hassan Rohani 2013 və 2017-ci illərdə seçki kampaniyası zamanı vəd verməsinə baxmayaraq onları azad etməyib və buna görə islahatçıların tənqidləri ilə üzləşib.
ABŞ Dövlət Departamenti isə ötən ay onların ev dustaqlığının ildönümündə bəyanat yayaraq azad olunmalarına çağırıb.
“Onların dərhal buraxılmasını, bütün vicdan məhbuslarının azad olunmasını tələb edirik”, - Dövlət Departamentinin sözçüsü Robert Palladino fevralın 14-də yaydığı bəyanatda deyib.
