Etika və milli təhlükəsizlik rəsmilərinin etirazlarına baxmayaraq, Ağ ev rəsmiləri Səudiyyə Ərəbistanıyla nüvə enerjisi texnologiyasını paylaşmaq planında israrlıdırlar. Bunu Konqresin yeni hesabatı üzə çıxarıb.
Nümayəndələr Palatasının demokratların rəhbərlik etdiyi Nəzarət və İslahat Komitəsinin hesabatı Prezident Donald Trump administrasiyasından mənbələrin informasiyası əsasında hazırlanıb. Daha bir mənbə administrasiya rəsmiləri ilə nüvə enerjisi şirkətləri arasındakı kommunikasiya sənədləridir.
Hesabatda məsələyə dair təhqiqatın “özəlliklə vacib” olduğu vurğulanır, çünki administrasiyanın Səudiyyə Ərəbistanına ABŞ-ın həssas nüvə texnologiyası ötürmək cəhdlərinin “davam etdiyi görünür”.
“ANORMAL FAKTLAR”
Komitə fevralın 19-da adı çəkilməyən bir neçə mənbənin iddiası üzrə təhqiqata başlayıb. Onlar Səudiyyə Ərəbistanında onlarla nüvə reaktoru tikilməsinə dair Ağ evin təklifini əks etdirən “anormal faktlar”ın şahidi olduqlarını deyiblər.
Komitə sədri Elijah Cummings Ağ evdən xahiş edib ki, Trump-ın prezident postuna keçməsindən iki ay öncə onun kürəkəni Jared Kushner ilə Səudiyyənin vəliəhd şahzadəsi elan olunmuş Muhammad bin Salman ilə görüşə dair sənədləri təqdim etsin.
Hesabatda deyilir ki, Səudiyyə Ərəbistanına həssas texnologiyanın ötürülməsinə “güclü özəl kommersiya maraqları” təsirini göstərir.
“Bu kommersiya qurumları Səudiyyə Ərəbistanında nüvə obyektlərinin tikilməsi və işlədilməsindən milyardlarla dollar qazanmağı hədəfləyir və görünür, onlar bu gün də Prezident Donald Trump və administrasiyası ilə daimi sıx təmasdadırlar”, – hesabatda vurğulanır.
Vaşinqtonun digər ölkələrə nüvə texnologiyası transfer etməyə icazəsi yoxdur, bundan ötrü enerjidən dinc məqsədlə istifadə olunacağına təminat verən 123-cü maddə çərçivəsində razılaşmalar əldə edilməlidir.
Hesabatda isə belə bir narahatlıq ifadə olunur ki, Səudiyyə Ərəbistanı Amerikanın nüvə texnologiyasından istifadə edərək atom bombası hazırlaya bilər.
