Rusiya rəsmiləri Birləşmiş Ştatların Venesueladakı durumla bağlı mövqeyini tənqid edib, hakimiyyətini saxlamağa çalışan prezident Nicolas Maduroya dəstək vəd edib, Vaşinqtonu isə PDVSA dövlət neft şirkətinə sanksiya qoyduğuna görə sərt tənqid edib.
Xarici işlər naziri Sergei Lavrov yanvarın 29-da Vaşinqtonu müxalifət lideri Juan Guaido-nu Venesuelanın keçid dövrü prezidenti kimi tanımaqla “qanunsuz rejim dəyişikliyinə açıq-aşkar yol açmaqda” suçlayıb.
“Dünya ictimaiyyətinin digər məsuliyyətli üzvləri ilə birlikdə biz Prezident Maduronun qanuni hökumətini dəstəkləməkdən ötrü hər şeyi edəcəyik”, – Lavrov deyib.
Amma o, Maduro hökumətinə dəstəklə bağlı konkret addımları açıqlamayıb.
ABŞ ordusu Venesueladakı böhrana qarışarsa, Rusiya da Karakasa hərbi yardım göstərəcəkmi? Prezident Vladimir Putinin sözçüsü isə bu sualı cavablandırmayıb.
Dmitry Peskov onu da deyib ki, ABŞ-ın PDVSA-ya sanksiyaları Venesuelanın daxili işlərinə qanunsuz müdaxilə deməkdir, amma Rusiya özünün oradakı maraqlarını qorumaqdan ötrü bütün hüquqi mexanizmlərə əl atacaq.
Yanvarın 28-də qoyulmuş sanksiyalar PDVSA-nın ABŞ zavodlarına xam neft satışından maliyyə əldə etməsini önləyir. Bu da Maduroya təzyiqin artması deməkdir.
***Buna da bax: ABŞ Venesuelanın dövlət neft şirkətinə sanksiyalar elan edir
ROSNEFT AMİLİ
Maduro isə dövlət televiziyasında çıxışında deyib ki, sanksiyalara qarşı hüquqi addımlar atacaq.
Rusiyanın Rosneft dövlət neft şirkəti Venesuelada fəaliyyət göstərir, PDVSA-ya kreditlər ayırıb. Ötən ilin üçüncü rübünün sonunda şirkətin ona 3,1 milyard dollar borcu olduğunu bildirib.
Rosneftin fəaliyyəti Moskvanın Venesuela ilə münasibətlərində əsas elementdir.
Madurovun sələfi Hugo Chavez 20 il öncə hakimiyyətə gələndən bu ölkənin Vaşinqtonla münasibətləri gərgin olub, Rusiya isə Venesuelaya pullar axıdıb.
Guaido isə ABŞ-ın dövlət çevrilişi planlaşdırmasına dair Maduro və Moskvanın ittihamlarını rədd edib. O, Venesuela vətəndaşlarının öz konstitusion hüquqlarını gerçəkləşdirdiklərini deyir.
Ötən həftə Guaido minlərlə tərəfdarı qarşısında özünü Venesuelanın keçid dövrü prezidenti elan edib.
Onu 20-dən artıq ölkə tanıyıb. Onlar Maduronun ötən ilin mayında təkrar prezident seçilməsini qanunsuz sayırlar, onun ən güclü opponentlərinin seçkiyə buraxılmadığını deyirlər.
