Keçid linkləri

Təcili xəbərlər
2020, 26 Oktyabr, Bazar ertəsi, Bakı vaxtı 20:36

Kartofun gömrük rüsumunun artırılmasına rəsmi izahat


Kartof

«Nazirlər Kabinetinin kartof idxalına tətbiq etdiyi gömrük tarif dərəcələrinin artırılması ərzaqlıq kartofa şamil olunub. Burada məqsəd daxili bazarı qorumaq, yerli istehsalı dəstəkləmək, fermerlərin maraqlarını müdafiə etməkdir».

Bunu AZƏRTAC-a açıqlamasında Kənd Təsərrüfatı Nazirliyinin şöbə müdirinin müavini Vüqar Hüseynov deyib.

Yeni tarif dərəcələrinin toxumluq kartofa şamil olunmadığını bildirən V.Hüseynov qeyd edib ki, ölkədə kartof istehsalının həcmi daxili tələbatı tam təmin etməyə imkan verir. Onun iddiasına görə, hətta daxili tələbatdan daha çox kartof istehsal olunur: «Qonşu İran və Türkiyədə milli valyutaların dəyərdən düşməsi ixracatı stimullaşdırıb, sahibkarlar məhsullarını xarici bazarlarda satmağa üstünlük verirlər. Milli valyutası sabit olan Azərbaycan bazarı İran və Türkiyənin kənd təsərrüfatı məhsulları ixracatçıları üçün cəlbedicidir, lakin bu, yerli istehsalçıların maraqlarına ziddir. Yəni, fermer aylarla əziyyət çəkib kartof becərir, İran və Türkiyədən kartof idxalı isə onların əziyyətini heçə endirir. Dövlətin də vəzifəsi, ilk növbədə, yerli istehsalçıların maraqlarını müdafiə etməkdir. Nazirlər Kabinetinin qərarı da buna xidmət edir».

«Onlar İrandan ucuz kartof gətirməklə...»

Problemin təkcə xaricdən kartof idxalı ilə bağlı olmadığını vurğulayan nazirlik rəsmisi bildirib ki, söhbət vasitəçilərdən, fermerdən sahədə məhsulu ucuz alıb bazarlarda baha satan dəllallardan, işbazlardan gedir: «Onlar İrandan ucuz kartof gətirməklə yerli istehsalçını fakt qarşısında qoyur və onun məhsulunu dəyər-dəyməzinə satın alırlar. Nazirlər Kabinetinin qərarı isə vasitəçilərin qarşısında fermerin mövqeyini daha da gücləndirmiş olacaq».

V.Hüseynov onu da əlavə edib ki, Nazirlər kabinetinin qərarı cəmi iki ay müddətinə, yəni məhsul yığımının yekunlaşdığı, sahələrdən topdansatışların ən çox həyata keçirildiyi sentyabr-oktyabr aylarını əhatə edir: «Bu qərarın növbəti aylarda qüvvədə olması elə bir əhəmiyyət kəsb etmir, çünki kəndli öz məhsulunu bu iki ay ərzində artıq satmış olacaq. Qəbul olunan qərar kartofun yalnız topdansatış qiymətinə təsir etmiş olur, pərakəndə satışa isə təsir etmir. Çünki vasitəçilərin (işbaz, dəllal, fürsətcil və s.) kəndlidən sahədən aldığı kartofun qiyməti ilə bazarda pərakəndə satışda realizə etdiyi qiymət arasında 2-3, bəzən 4 dəfə fərq olur. İndiki situasiyada vasitəçi fermerdən məhsulu daha baha almalı olacaq, qiyməti az da olsa fermer diktə edəcək, pərakəndə satış qiyməti isə indiki səviyyədə qalacaq. Hətta məhsulun bolluğu pərakəndə satış qiymətlərini daha da ucuzlaşdıra bilər».

Xatırlatma

Azərbaycana idxal edilən kartofun gömrük rüsumu iki dəfə artırılıb.

Nazirlər Kabineti bununla bağlı «Azərbaycan Respublikasının xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri»ndə dəyişiklik edib.

Dəyişikliyə əsasən, ölkəyə idxal olunan kartof üçün tarif dərəcəsi 15%-dən 30%-ə qaldırılıb.

Qərar dərc edildiyi gündən (05.09.2018) qüvvəyə minir və 2018-ci il oktyabrın 31-dək qüvvədədir.

Bəzi ekspertlər bundan sonra kartofun bahalaşacağını istisna etmirlər. Üstəlik, rəsmilərin «ölkədə kartof istehsalının həcmi daxili tələbatı tam təmin etməyə imkan verir» kimi açıqlamalarına da şübhə ilə yanaşırlar.

Multimedia

XS
SM
MD
LG