Keçid linkləri

Təcili xəbərlər
2020, 02 Dekabr, çərşənbə, Bakı vaxtı 22:07

İranın neft ixracına sanksiyalara məhdud istisnalar qoyula bilər


Arxiv fotosu

İrandan neft idxal edən ölkələr Vaşinqton ilin sonunda Tehrana sanksiyaları bərpa edənədək cərimələrdən yaxa qurtara bilərlər. Bundan ötrü onlar idxalda “əməlli ixtisarlar” etməlidirlər. Bunu Birləşmiş Ştatların aparıcı rəsmiləri deyib.

“Adamların neft alışını sıfıra endirməsini istəyirik, ancaq müəyyən hallarda bunu bir gecəyə edə bilmirlərsə, istisnalar nəzərdə tutacağıq”, – ABŞ-ın maliyyə naziri Steven Mnuchin iyulun 16-da yayılmış bəyanatında deyib.

İranın əsasən Asiyada olan alıcıları, məsələn, Yaponiya və Hindistan bildiriblər ki, Tehrandan idxalı öz iqtisadiyyatlarına ziyan vurmadan, dərhal dayandıra bilməzlər.

Steven Mnuchin
Steven Mnuchin

Mnuchin və dövlət katibi Mike Pompeo-nun bildirməsinə görə, İran neftindən asılı ölkələrə qarşı yumşaq mövqe tutmalarına baxmayaraq, prezident Donald Trump administrasiyası İrana mümkün qədər sərt sanksiyaların qoyulmasına qərarlıdır.

“HEÇ BİR GÜZƏŞT OLMAYACAQ”

Mnuchin deyib ki, Vaşinqton müttəfiqlərinin də İrana sanksiyaları qüvvəyə mindirməsinə gözləyir, “amma xüsusi şərait tələb edirsə, dinləməyə açığıq”.

O, heç bir güzəşt edilməyəcəyini, ancaq enerji bazarlarında adamlara vaxt veriləcəyini vurğulayıb.

“Bu barədə yanlış fikrə düşməyin. Sanksiyaları qlobal miqyasda, geniş şəkildə tətbiq etməyə qərarlıyıq”, – Pompeo bildirib.

Mike Pompeo (sağda) prezident Donald Trump-a qulaq asır
Mike Pompeo (sağda) prezident Donald Trump-a qulaq asır

Trump dəfələrlə İranı Yaxın Şərqdə sabitsizlik yaradan qüvvə adlandırıb, Tehranın Suriyada, İraqda, Yəməndə dəstək göstərdiyi şiə yaraqlı qrupları misal çəkib.

Pompeo-nun sözlərinə görə, sanksiyaların məqsədi İranın “dünyada terrorçuluğu qızışdırması, ziyanlı fəaliyyəti üçün” pul mənbəyini kəsməkdir.

Missiyanın hədəfi İranı normal ölkəyə çevirmək, onun adamları öldürməsini, dünyanın müxtəlif yerlərində raket atmasını önləməkdir”, – Pompeo söyləyib.

İranın xarici işlər naziri Mohammad Javad Zarif isə iyulun 16-da tvitində yazıb ki, İran Birləşmiş Ştatların bərpa etdiyi sanksiyalarla bağlı Haaqadakı Beynəlxalq Ədalət Məhkəməsində iddia qaldırıb.

Zarif sanksiyaların beynəlxalq hüququ pozduğunu vurğulayıb, Vaşinqtonu “diplomatiya və hüquqi öhdəliklərə sayqısızlıq”da ittiham edib.

XS
SM
MD
LG