Şimali Koreya Seulla mayın 16-na planlaşdırılan yüksək səviyyəli danışıqları təxirə salıb və dövlət mediası buna səbəb kimi hərbi təlimləri göstərib.
Rəsmi KCNA xəbər agentliyi ABŞ-Cənubi Koreya təlimlərini “Koreya yarımadasında müsbət siyasi hadisələrə zidd provokasiya” adlandırıb.
Agentlik Şimali Koreya lideri Kim Jong Un-la ABŞ prezidenti Donald Trump-ın iyunun 12-nə planlaşdırılan sammitini də şübhə altına alıb.
“Birləşmiş Ştatlar planlaşdırılan sammitin taleyi ilə bağlı ehtiyatlı davranmalıdır”, – Cənubi Koreyanın Yonhap xəbər agentliyi KCNA-ya istinadla yazır.
Bir neçə saat sonra Şimali Koreyanın xarici işlər nazirinin müavini Kim Kye Gwan deyib ki, “bizim nüvə silahından əl çəkməyimizi istəyən birtərəfli tələbin irəli sürüldüyü danışıqda daha maraqlı deyilik”.
ABŞ Dövlət Departamenti isə intizarla gözlənən sammitə hazırlıqları davam etdirdiyini, Pxenyanın mövqeyində dəyişikliklə bağlı “bildiriş almadığını” vurğulayıb.
Mayın 11-də ikihəftəlik “Max Thunder” təlimləri başlayıb. Təlimlərə B-52 bombardmançıları və F-15K qırıcıları daxil olmaqla 100-dək hərbi təyyarə qatılıb.
Birləşmiş Ştatlar və Cənubi Koreya təlimlərin ancaq müdafiə məqsədli olduğunu deyir.