Azərbaycan xəbərləri
Sədr: ‘Təəssüf ki bəzi xoşagəlməz məlumatlar yayılır ki...’
Martın 3-də Respublika Narkoloji Mərkəzdə baş verən yanğınla bağlı prezident İlham Əliyevin sərəncamı ilə yaradılan dövlət komissiyasının ilk iclası keçirilib.
Toplantıdan sonra AzərTAC-a açıqlama verən komissiyanın sədri, baş nazirin müavini Abid Şərifov bildirib ki, yanğın baş verən zaman narkoloji mərkəzin həmin korpusunda 55 xəstə olub. Onlardan 25-i vəfat edib. Qalan 30 nəfər isə xilas edilib:
“Təbii ki, hamımız narkoloji xəstələrin vəziyyətini yaxşı bilirik və fikrimcə, bu barədə ətraflı danışmağa ehtiyac yoxdur. Belə xəstələrin özlərini sakit aparmaları üçün müəyyən iynələr vurulur. Ona görə də belə şiddətli yanğında otuz nəfəri xilas etmək çətinliklə mümkün olub. Təəssüf ki bəzi xoşagəlməz məlumatlar yayılır ki, guya xəstələr çarpayılara bağlı olublar. Bütün bunların hamısı əsassız fikirlərdir. Yanğın vaxtı bir həkim dünyasını dəyişib. Ancaq o, xəstəyə baxan həkim olmayıb. Sadəcə müalicə alan xəstələrdən biri 62 yaşlı həkim olub. Ölən 25 nəfərdən yalnız biri pensiyaçıdır”.
Buna da bax: Narkoloji dispanserdə yanğın. Prezident hadisə yerinə getdi [video]
Komissiyanın ilk iclasında müzakirə olunan məsələlərdən danışan Abid Şərifov bildirib ki, ölən şəxslərin, xüsusilə narkoloji xəstələrin şəxsiyyətlərinin müəyyənləşdirilməsi olduqca çətin məsələdir:
“Çünki elə xəstələr var ki, 15-20 ildir orada müalicə alır. İndiyədək doqquz nəfərin şəxsiyyəti müəyyənləşdirilib və onlar artıq, dəfn olunub. Qalanların şəxsiyyətlərinin müəyyənləşdirilməsi bir qədər vaxt tələb edən məsələdir. Bu məsələ ilə əlaqədar aidiyyəti qurumlar, o cümlədən Baş Prokurorluq, Daxili İşlər və Səhiyyə nazirlikləri ciddi işlər aparırlar. Onların da şəxsiyyətləri qısa müddətdə müəyyən olunacaq. İkinci məsələ yanğın zamanı sağ qalanların yerləşdirilməsidir. Artıq 30 nəfər ayrı-ayrı xəstəxanalarda yerləşdirilib. Onlardan 18-i evə buraxılıb”.
Buna da bax: Narkoloji Dispanserdə yanğın görüntüləri
“Digər versiyalar da araşdırılır”
Komissiya sədri deyib ki, vacib vəzifələrdən biri də yanğının səbəblərini araşdırmaqdır:
“Aidiyyəti qurumlar – Fövqəladə Hallar Nazirliyi, Baş Prokurorluq və Daxili İşlər Nazirliyi ilkin səbəb kimi elektrik naqillərində baş verən qısaqapanma versiyasını irəli sürüblər. Lakin digər versiyalar da araşdırılır. Yaxın günlərdə bu barədə ictimaiyyətə məlumat verəcəyik. Mən Komissiyanın iclasında aidiyyəti qurumlardan – Səhiyyə Nazirliyindən və Bakı Şəhər İcra Hakimiyyətindən xahiş etdim ki, müvafiq araşdırmalar başa çatdırıldıqdan sonra həmin bina tamamilə sökülsün. Ərazidə lazımi abadlıq işləri aparılsın... Prezidentin Sərəncamı ilə tanışsınız, - Sabunçu rayonunun ərazisində yeni mərkəz tikilir. Bu mərkəzin tikintisinə bir neçə il əvvəl başlanılıb. Prezident İlham Əliyevin təsdiq etdiyi investisiya proqramında yeni mərkəzin tikintisinin tamamlanması üçün 5,3 milyon manat vəsait ayrılıb. Səhiyyə Nazirliyinin məlumatına görə, bu müalicə müəssisəsinin may ayınadək istifadəyə verilməsi nəzərdə tutulur. Yeni Narkoloji Mərkəz hazır olana qədər xəstələrin müalicəsi hazırkı mərkəzin digər korpuslarında davam etdiriləcək”.
Buna da bax:
Xatırlatma
Martın 2-də Bakı şəhərinin Xətai rayonu ərazisində yerləşən Respublika Narkoloji Mərkəzində yanğın baş verib. Yanğın nəticəsində 25 nəfər həlak olub, 3 nəfər xəstəxanaya yerləşdirilib. Hüquq-mühafizə orqanları bildiriblər ki, yanğına elektrik naqillərində qısaqapanma səbəb olub.
Cinayət Məcəlləsinin 225.2 (yanğın təhlükəsizliyi qaydalarını pozma, ağır nəticələrə səbəb olduqda) və 308.2-ci (vəzifə səlahiyyətlərindən sui-istifadə, ağır nəticələrə səbəb olduqda) maddələri ilə cinayət işi başlanıb. Hadisənin baş vermə səbəblərinin müəyyənləşdirilməsi məqsədi ilə ekspertizalar təyin edilib.
Bütün xəbərləri izləyin
‘AbzasMedia’ işində bank hesablarına həbs qoyulduğu deyilir
"AbzasMedia" işində adı keçən şəxslərə və onların bir çoxunun ailə üzvlərinə məxsus bank hesablarına həbs qoyulduğu deyilir.
Bununla bağlı jurnalist Hafiz Babalı AzadlıqRadiosuna bildirib.
Onun sözlərinə görə, bu barədə qərarı Xətai Rayon Məhkəməsi verib.
H.Babalı qeyd edib ki, bundan əlavə məhkəmə həmin şəxslərin vergi odənişləri və hüquqi şəxslərdə pay sahibliyi barədə məlumatların Bakı Şəhər Baş Polis İdarəsinə təqdim olunması haqqında qərar çıxarıb:
"Mən araşdırma yazısı yazmışam, buna görə mənim kartıma blok qoyulmalıdır? Şahid qismində ifadə vermişəm. Düzdür, yoxladım, hələlik, kartımda blok yoxdur, amma məhkəmə qərarı var artıq".
Jurnalist qeyd edib ki, məhkəmə qərarından apellyasiya şikayəti verəcək.
Bu deyilənlərə, hələlik, Daxili İşlər Nazirliyi və Xətai Rayon Məhkəməsindən münasibət öyrənmək mümkün olmayıb.
Hafiz Babalı bir müddət öncə"AbzasMedia" işi üzrə Bakı Şəhər Baş Polis İdarəsində (BŞBPİ) şahid qismində dindirildiyini açıqlamışdı.
Noyabrın 21-də “AbzasMedia” internet nəşrinin direktoru Ülvi Həsənli, baş redaktoru Sevinc Vaqifqızı, ictimai fəal Məhəmməd Kekalov və daha sonra da jurnalisti Nərgiz Absalamova həbs edilib.
Onlar Cinayət Məcəlləsinin 206.3.2-ci maddəsi, yəni qaçaqmalçılıqda şübhəli bilinirlər.Lakin ittihamı qəbul etmir, bunu jurnalist fəaliyyətləri ilə izah edirlər.
Xidmətə yararlı olub-olmamaq məsələsində son sözü bu qurum deyəcək...
Müddətli həqiqi hərbi xidmətə çağırılan vətəndaşların yararlı, yaxud yararsız olması barədə qərar verilməsi qaydası dəyişir.
Bu, Milli Məclisin müzakirəsinə çıxarılan və dekabrın 5-də üçüncü oxunuşda qəbul olunan "Hərbi vəzifə və hərbi xidmət haqqında" Qanuna təklif edilən dəyişiklik layihəsində öz əksini tapıb.
Prezident İlham Əliyev "Müddətli həqiqi hərbi xidmətə çağırılan vətəndaşların tibbi şəhadətləndirilməsi sahəsində fəaliyyətin təkmilləşdirilməsi ilə bağlı bəzi tədbirlər haqqında" bu il oktyabrın 6-da fərman imzalayıb. İndi qanun fərmana uyğunlaşdırılır.
Fərmana əsasən, 2024-cü il iyulun 1-dən həqiqi hərbi xidmətə çağırılan vətəndaşların tibbi şəhadətləndirilməsi zamanı yekun tibbi müayinəni Əmək və Əhalinin Sosial Müdafiəsi Nazirliyi həyata keçirəcək. Söhbət həmin nazirliyin tabeliyində olan Dövlət Tibbi-Sosial Ekspertiza və Reabilitasiya Agentliyindən gedir.
Bu prosesin Mərkəzləşdirilmiş elektron informasiya sisteminin "Hərbi-həkim ekspertizası və tibbi şəhadətləndirilmə" altsistemi üzərindən gerçəkləşdirilməsi nəzərdə tutulub.
Mövcud qanunvericilikdə xidmətə yararlı olub-olmamaq məsələsində əsas söz sahibi Səfərbərlik və Hərbi Xidmətə Çağırış üzrə Dövlət Xidməti (SHXÇX) nəzdində tibbi komissiyalar sayılır.
Azərbaycan və İran komandanları Xəzərdə birgə təlimdən danışıblar
Azərbaycan və İran komandanları Xəzərdə birgə təlim keçirilməsini vacib sayırlar.
Bu barədə dekabrın 5-də Azərbaycan Hərbi Dəniz Qüvvələri (HDQ) komandanı vitse-admiral Sübhan Bəkirovun bu ölkədə səfərdə olan İran İslam Respublikası Ordusunun HDQ komandanı kontr-admiral Şəhram İrani ilə görüşündə bəhs edilib.
Azərbaycan Müdafiə Nazirliyinin məlumatına görə, görüşdə iki ölkənin hərbi dənizçiləri arasında əməkdaşlığın inkişaf perspektivləri müzakirə olunub: "Hərbi qulluqçuların peşəkarlığının artırılması, eləcə də qarşılıqlı təcrübə mübadiləsi məqsədilə Xəzər dənizində birgə təlimlərin keçirilməsinin vacibliyi xüsusi qeyd olunub".
Hazırda İranla Azərbaycan arasında yaxınlıq müşahidə edilməkdədir. Halbuki yaxın aylara qədər bu iki ölkə arasında müəyyən gərginliklər yaşanmışdı.
Xatırlatma
Son illər hər iki ölkənin bir-birinin sərhədinə yaxın ərazidə hərbi təlimlər keçirməsi qarşılıqlı narazılıqlara səbəb olmuşdu. Hətta bu il yanvarın 27-də Azərbaycanın Tehrandakı səfirliyinə "Kalaşnikov" avtomatı ilə silahlı hücum da oldu. Hədisə nəticəsində səfirliyin bir əməkdaşının həlak olduğu, ikisinin isə xəsarət aldığı açıqlandı. Bundan sonra səfirliyin işçiləri Azərbaycana təxliyə edildi.
Ardınca da Azərbaycanda bir çox həbslər oldu. Saxlananlar ən müxtəlif ittihamlarla (ən çox da narkotiklə) üzləşsələr də, hökumətə yaxın media orqanlarında onlar "İran casusu" kimi təqdim edilirdilər. Hərçənd onların yaxınları da bununla dini kəsimdən olan bir çox şəxslərin şərləndiyini dedilər. Amma son aylar hər iki tərəfin rəsmiləri bir-biriləri ilə əməkdaşlığa aid fikirlər səsləndirirlər.
İctimai fəal narkotik ittihamı ilə saxlanıb
DİN-dən deyilənlər...
Daxili İşlər Nazirliyindən (DİN) "Turan" İlhamiz Quliyevin narkotik vasitələrin qanunsuz dövriyyəsində ittiham edilməsini təsdiqləyiblər: "Vətəndaş Quliyev İlhamiz bir qrup şəxslə əlbir olaraq narkotik vasitələrin qanunsuz dövriyyəsində şübhəli bilinir".
Bunu DİN-in Mətbuat xidmətinin əməkdaşı Nurlan Əliyev bildirib. Onun sözlərinə görə, İ.Quliyevin əvvəllər daxili işlər orqanlarında xidmət etməsi ilə bağlı iddialar əsassızdır: "O, heç vaxt polis əməkdaşı olmayıb".
İ.Quliyevin saxlanarkən döyülməsi ilə bağlı deyilənlərə DİN-dən cavab almaq mümkün olmayıb.
+++
İctimai fəalın yaxınları "Turan"a deyiblər ki, o, dekabrın 4-də evinin yaxınlığında saxlanıb: "Saxlananda İlhamiz zorakılığa məruz qalıb. Onu sürüyə-sürüyə maşına aparıblar, başından vurublar".
Onların sözlərinə görə, İ.Quliyev artıq bir neçə gündür ki, izlənilirdi: "İlhamiz oktyabr ayında polisə müqavimət və xırda xuliqanlıq ittihamı ilə 30 sutka inzibati həbs olunmuşdu. Bundan əvvəl isə o, AbzasMedia-ya keçmiş polis işçisi kimi narkotiklə bağlı müsahibə vermişdi. Yəqin, indiki məsələ də həmin müsahibə ilə bağlıdır".
Vəkil Zibeydə Sadıqova da "Turan"a İ.Quliyevin şübhəli şəxs qismində saxlandığını söyləyib: "O, Cinayət Məcəlləsinin 234.1-ci (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq əldə etmə,... daşıma) maddəsi ilə şübhəli şəxs qismində saxlanılıb. Hazırda Yasamal rayon Polis İdarəsində saxlanır. İlhamiz Quliyev özünü təqsirli bilmir".
Həmin maddə üzrə şəxsə 3 ilə qədər həbs cəzası verilə bilər.
Qarabağın Azərbaycan sayılmasını kriminallaşdıran layihə Ermənistanda keçmədi
Qarabağın Azərbaycan ərazisi kimi tanınmasını kriminallaşdıran layihənin Ermənistan parlamentində gündəmə çıxarılmasına imkan verilməyib.
AzadlıqRadiosunun erməni xidməti yazır ki, parlamentdə səsvermə zamanı hakim "Mülki Müqavilə" Partiyası buna qarşı çıxıb. Layihənin lehinə 27, əleyhinə isə 57 nəfər səs verib.
"Ayakve" təşkilatı tərəfindən irəli sürülən qanun layihəsi dekabrın 4-də Ermənistan parlamentinin Hüquq komitəsində gərgin müzakirələrə səbəb olub. Müzakirələr 7 saat davam edib.
Qanun layihəsi 58 min imza ilə parlamentə təqdim edilmişdi. Buna əsasən, Qarabağın Ermənistan adından başqa dövlətin ərazisi kimi tanınması, eləcə də erməni soyqırımının tanınmasından imtina kriminallaşdırılmalı idi.
Ermənistanla Azərbaycan arasında 44 günlük müharibədən sonra sülh müqaviləsi üçün danışıqlar aparılır. Tərəflər arasında sülh sazişi ilə bağlı nəticə əldə olunmasa da, onlar bir-birinin ərazi bütövlüyünü tanıdıqlarını elan ediblər.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib. Azərbaycan, Rusiya və Ermənistan arasında razılaşma ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.
Bu il sentyabrın 19-20-də isə Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib.
Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb.
Sentyabrın 28-də tanınmayan qurum fəaliyyətini dayandıracağını elan edib.
Jurnalistləri Müdafiə Komitəsi Rüfət Muradlını azad etməyə çağırır
Azərbaycan hakimiyyəti jurnalist Rüfət Muradlını azad etməli, müstəqil mətbuata təzyiqlərə son qoymalıdır. Jurnalistləri Müdafiə Komitəsi (CPJ) dekabrın 4-də belə bir bəyanatla çıxış edib.
"Kanal 13"ün aparıcısı R.Muradlı dekabrın 2-də kiçik xuliqanlıq və polisin əmrinə tabe olmamaq ittihamları ilə saxlanılıb, 30 sutkalıq həbsə məhkum edilib. "Kanal 13"ün baş redaktoru Anar Orucov jurnalistin ittihamı rədd etdiyini deyir.
Orucov bu ittihamları "Kanal 13" və digər müstəqil mediaya davam edən təzyiqin tərkib hissəsi adlandırıb.
Ötən həftə "Kanal 13"ün direktoru Əziz Orucov, noyabrın 20-dən bəri isə AbzasMedia araşdırmaçı media orqanının dörd üzvü həbs olunub.
"İki həftədən az müddətdə saxlanan altıncı jurnalist olaraq Rüfət Muradlıya ittihamlar həmkarlarınkı kimi saxta və yalandır. Azərbaycan hakimiyyəti Muradlını və digər haqsız həbs olunmuş jurnalistləri dərhal azad etməli, müstəqil xəbər işinə təzyiqi dayandırmalıdır", – CPJ-nin proqram direktoru Karlos Martines de la Serna deyib.
Ağdərə rayonu yaradılır
Milli Məclisin bu gün, dekabrın 5-də keçirilən iclasında "Azərbaycan Respublikasının Ağdərə rayonunun yaradılması haqqında" qanun layihəsi müzakirəyə çıxarılaraq qəbul edilib.
Sənədə əsasən, Ağdam, Kəlbəcər və Tərtər rayonlarının inzibati ərazi bölgüsündə qismən dəyişikliklər edilərək mərkəzi Ağdərə şəhəri olmaqla inzibati sərhədlər daxilində Ağdərə rayonu yaradılacaq.
Ağdərə rayonu (Mardakert) 1992-ci ildə ləğv edilmişdi. Onda onun ərazisi inzibati qaydada Tərtər, Ağdam və Kəlbəcər rayonları arasında bölüşdürülmüşdü. Bu rayon keçmiş Dağlıq Qarabağ Muxtar Vilayəti (1923–1991) zamanı Mardakert adlanıb.
Qarabağ münaqişəsi yarandıqdan sonra Azərbaycan, bir sıra ərazilər kimi, bu rayona da nəzarəti itirmişdi. Amma 1992-ci ildə Azərbaycan ona nəzarəti bərpa etdi. Lakin bu, bir ildən çox çəkməmişdi.
Ağdərə şəhəri bir də bu ilin sentyabrında erməni işğalından azad edilib.
Xatırlatma
1988-ci ildə başlanan Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib. Azərbaycan, Rusiya və Ermənistan arasında razılaşma ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.
Bu il sentyabrın 19-20-də isə Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib.
Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb.
Sentyabrın 28-də tanınmayan qurum fəaliyyətini dayandıracağını elan edib. Separatçı qurumun bir çox liderləri saxlanaraq Bakıya gətirilib.
Gələn ilin dövlət büdcəsi qəbul edildi
Dekabrın 5-də Milli Məclis "Azərbaycan Respublikasının 2024-cü il dövlət büdcəsi haqqında" qanun layihəsini üçüncü oxunuşda qəbul edib.
Layihəyə görə, gələn ilin dövlət büdcəsinin gəlirləri 34 milyard 173 milyon manat, xərcləri 36 milyard 763 milyon manat təşkil edəcək.
İqtisadi siyasət, sənaye və sahibkarlıq komitəsinin sədri Tahir Mirkişili bildirib ki, (işğaldan azad edilən ərazilərə) Böyük Qayıdış Proqramının maliyyələşdirilməsi, ölkənin müdafiə qabiliyyətinin və milli təhlükəsizliyinin möhkəmləndirilməsi xərc istiqamətləri üzrə əsas prioritetlər kimi müəyyən edilib. O, bura "Azərbaycan Respublikasının 2022-2026-cı illərdə sosial-iqtisadi inkişaf Strategiyası"nın yerinə yetirilməsini də aid edib.
2023-cü ilin isə dövlət büdcəsinin gəlirləri 33 milyard 890.5 milyon manat, xərcləri 36 milyard 624.8 milyon manat proqnozlaşdırılıb.
Gələn ilin büdcəsində neftin bir bareli 60 dollar götürülüb. Elə bu il də bu rəqəm 60 dollar götürülmüşdü.
Blinkenin köməkçisi Azərbaycana gəlir
ABŞ dövlət katibinin Avropa və Avrasiya məsələləri üzrə köməkçisi Ceyms O'Brayen (James O'Brien) dekabrın 6-dan 8-dək Azərbaycanda və Rumıniyada səfərdə olacaq. Bu barədə ABŞ Dövlət Departamentinin mətbuat xidməti məlumat yayıb.
Məlumatda deyilir ki, dövlət katibinin köməkçisi Azərbaycan rəsmiləri ilə ikitərəfli münasibətləri möhkəmləndirməyi, eləcə də Azərbaycan və Ermənistan arasında sülhə dəstəyi müzakirə edəcək.
O'Brayen Rumıniyada taxıl ixracı sammitinə qatılacaq. Sammitdə Rumıniya, Ukrayna, Moldova və Avropa Komissiyasının yüksək vəzifəli rəsmiləri iştirak etməlidir.
ABŞ diplomatının Bakıya səfərinə necə razılıq verildi
ABŞ diplomatının Bakıya səfəri barədə razılıq noyabrın 28-də dövlət katibi Antoni Blinkenin (Antony Blinken) Azərbaycan prezidenti İlham Əliyevə telefon zəngi zamanı əldə edilib. AZƏRTAC-ın yaydığı rəsmi məlumatda deyilirdi ki, Blinken ABŞ-Azərbaycan münasibətlərinin normallaşdırılması məqsədilə köməkçisi O'Brayenin Azərbaycana səfərinə icazə verilməsini rica edib. Məlumata görə, Əliyev "Blinkenin ricasına bir şərtlə müsbət cavab verib ki, Azərbaycanın yüksək səviyyəli rəsmilərinin ABŞ-a səfərlərinə qoyulan əsassız qadağan qaldırılsın". Ancaq ABŞ Dövlət Departamentindən AzadlıqRadiosunun #İzahla proqramına deyilib ki, bu məsələ ilə əlaqədar "nəzərdən keçiriləcək heç nə yoxdur".
O'Brayen noyabrın 15-də Konqresdə dinləmələrdə demişdi ki, Bakı və Yerevan arasında sülh sənədi imzalananadək Azərbaycanla münasibətlər əvvəlki kimi olmayacaq. Azərbaycan XİN isə onun dediklərini birtərəfli və qərəzli sayıb.
Son bir neçə həftədə Azərbaycanda hökumətə yaxın mediada Qərbə, xüsusilə ABŞ-a qarşı məqalələr dərc olunub. ABŞ səfirliyi noyabrın 27-də Bakıda planlaşdırılan məzun görüşünü təxirə salıb. Ötən həftəsonu ABŞ-ın Azərbaycana təyin etdiyi yeni səfir Mark Libbi (Mark Libby) Bakıya gəlib.
Sentyabrın ortasında Qarabağa nəzarətin bərpa olunması ilə nəticələnən birgünlük əməliyyatdan sonra Azərbaycanla Ermənistan arasında Qərb platformasına danışıq baş tutmayıb.
Ermənistan əsgərinin Azərbaycanla sərhəddə vurulduğunu deyir
Dekabrın 4-də Azərbaycanla sərhəddə xidmət edən ermənistanlı əsgər həlak olub. Yerevan Azərbaycanın sülh danışıqlarını pozmaq niyyəti ilə atəşkəsi pozduğunu desə də, Bakı bunu rədd edib.
Ermənistanın Müdafiə Nazirliyi hərbi qulluqçu Qerasim Arakelyanın Azərbaycanın Naxçıvan eksklavı ilə sərhəddə yerləşən Bardzruni kəndi yaxınlığındakı erməni hərbi postuna snayper atəşi nəticəsində öldürüldüyünü bildirib.
Azərbaycanın Müdafiə Nazirliyi bunu "provokativ informasiya" adlandırıb, qüvvələrinin atəşkəsi pozmadığını deyib.
Sərhəddə atışma səsləri
Bardzruni administrasiyasının başçısı Arsen Aleksanyan AzadlıqRadiosunun erməni xidmətinə deyib ki, yerli sakinlər sərhəddə atışma səsi eşidiblər. İndiyədək Azərbaycan-Ermənistan sərhədinin bu hissəsində atəşkəsin ciddi pozuntusuna nadir hallarda rast gəlinirdi.
Ermənistan XİN bəyanat yayaraq Azərbaycan tərəfinin "yeni eskalasiyanı təhrik etmək, sülh prosesini yubadaraq çıxmaza salmaq niyyəti güdən" hərəkətlərini pisləyib.
XİN Bakının Yerevanla danışıqlar üçün müxtəlif beynəlxalq oyunçuların təkliflərini davamlı rədd etdiyini deyib.
Bakı Yerevanı ittiham edir
Rəsmi Bakı isə Yerevanın özünü sülh danışıqlarını yubatmaqda ittiham edir. Azərbaycan XİN dekabrın 4-də axşam yaydığı şərhdə bildirib ki, "Ermənistan tərəfinin bu yalan açıqlaması silahlı qüvvələrində baş verən özbaşınalığı və hərc-mərcliyi ört-basdır etmək niyyəti daşıyır".
XİN Yerevanı sülh sazişi üzrə təklifləri 70 gündən artıq müddətdə yubatmaqda, indi isə "bu cür pozucu açıqlamaları" ilə normallaşma prosesinin perspektivlərinə xələl gətirməkdə suçlayıb.
Oktyabrda Azərbaycanla Ermənistan arasında Aİ-nin vasitəçiliyi ilə iki görüş baş tutmayıb. Tərəflər görüşün alınmamasına görə bir-birini ittiham ediblər. Daha sonra Azərbaycanın xarici işlər naziri Ceyhun Bayramov noyabrın 20-də Vaşinqtonda ermənistanlı həmkarı Ararat Mirzoyan ilə görüşə getməkdən imtina edib. Bakı Qərb dövlətlərini qərəzli davranmaqda ittiham edib, Yerevanla birbaşa danışıqlar təklif edib.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib. Azərbaycan, Rusiya və Ermənistan arasında razılaşma ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.
Bu il sentyabrın 19-20-də isə Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib.
Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb.
Sentyabrın 28-də tanınmayan qurum fəaliyyətini dayandıracağını elan edib.
Reportyorlar saxlanıb, buraxıldıqlarını deyirlər
Dekabrın 4-də reportyorlar Şəhla Kərim və Aytac Məmmədlinin çəkiliş edərkən saxlandığı bildirilir.
Bu barədə əvvəlcə onların yaxınları məlumat verib.
Jurnalistlərin Azərbaycanın cənub rayonlarından biri olan Lənkəranda saxlandığı deyilir: "Onlar çəkiliş edərkən polis tərəfindən saxlanıblar. Onlardan çəkdikləri materialları silmələri tələb edilir".
Bir qədər sonra isə Şəhla Kərim AzadlıqRadiosuna deyib ki, onları Lənkəranda vətəndaşlar arasında sorğu keçirərkən saxlayıblar: "Polislər və icra nümayəndəsi bizi Mənzil-Kommunal İstismar İdarəsinə apardılar. Bizə dedilər ki, qanunsuz fəaliyyətlə məşğulsunuz... Bildirdilər ki, vətəndaşları narahat edirsiniz, sizdən 11 şikayət daxil olub".
O qeyd edib ki, bir müddət sonra onlar sərbəst buraxılıblar, hazırda sərbəstdirlər.
Məsələ ilə bağlı Daxili İşlər Nazirliyi (DİN) və Lənkəran rayon rəsmiləri ilə danışmaq mümkün olmayıb.
ABŞ-ın yeni səfiri Bakıya gəlib
Dekabrın 2-də axşam saatlarında Amerika Birləşmiş Ştatlarının (ABŞ) Azərbaycana yeni səfiri Mark Libbi (Mark Libby) Bakıya gəlib.
O, Azərbaycan dilində mətbuata qısa açıqlama verməklə kifayətlənib və Bakıya gəlişindən çox şad olduğunu bildirib: "Mən öz etimadnaməmi təqdim etmək, ABŞ-Azərbaycan əlaqələrini inkişaf etdirmək və regionda davamlı sülh naminə çalışmaq üçün işə başlamağı səbirsizliklə gözləyirəm. Həmçinin sizin gözəl ölkənizi daha yaxşı tanımaq istəyirəm".
ABŞ Azərbaycana yeni səfir göndərir
Amerika Birləşmiş Ştatları (ABŞ) Senatı noyabrın 8-də prezident Co Baydenin (Joe Biden) diplomat Mark Libbinin (Mark Libby) bu ölkənin Azərbaycandakı səfiri vəzifəsinə namizədliyini irəli sürməsini dəstəkləyib.
Ötən ilin yayından, Li Litsenberqerin (Lee Litzenberger) bu postdan getməsindən bəri ABŞ-ın Azərbaycanda səfiri olmayıb. Bayden Libbinin namizədliyini keçən ilin mayında irəli sürüb, o vaxtdan Senat onun namizədliyini təsdiqləməmişdi.
"Onu şəxsən tanımasam da, böyük təcrübəsi var, karyeralı diplomatıdır və bu, ona Bakıda kömək edəcək", - ABŞ-ın Bakıdakı keçmiş səfiri Riçard Kozlariç (Richard Kauzlarich) "Turan"ın müxbiri ilə söhbətində deyib.
İyunun 14-də Senatda dinləmələr zamanı Libbi Qarabağla bağlı sülh danışıqları, insan hüquqları və ABŞ-Azərbaycan arasında təhlükəsizlik sahəsində əməkdaşlığa dair suallarla qarşılaşmışdı.
Libbi son vaxtlara qədər Vaşinqtondakı Milli Hərbi Kollecdə Dövlət Departamentinin fakültə məsləhətçisi vəzifəsində çalışıb.
Bundan öncə Libbi Brüsseldə Avropa İttifaqı yanında ABŞ missiyası rəhbərinin müavini olub. Varşava, Nikosiya və Bağdadda ABŞ missiyalarında siyasi məsləhətçi olaraq çalışıb.
ABŞ Dövlət Departamenti İlham Əliyevin açıqlamasına münasibət bildirib
ABŞ Dövlət Departamenti dekabrın 1-də Azərbaycanla münasibətlərə dair açıqlama ilə çıxış edib. AzadlıqRadiosu Azərbaycan xidmətinin sorğusunu cavablandıran departament bildirir:
“Biz həm Ermənistan, həm də Azərbaycanla sülhün əldə olunması məqsədilə əməkdaşlıq edirik. Biz inanırıq ki, sülh prosesi irəlilədikcə Azərbaycanla ikitərəfli əməkdaşlığın dərinləşdirilməsi üçün imkanlar vardır”.
Noyabrın 28-də "Azərtac"ın yaydığı rəsmi məlumatda deyilirdi ki, ABŞ dövlət katibi Antoni Blinken Azərbaycan prezidenti İlham Əliyevə zəng edib.
Məlumatda bildirilirdi ki, Blinken ABŞ-Azərbaycan münasibətlərinin normallaşdırılması məqsədilə köməkçisi Ceyms O’Brayenin Azərbaycana səfərinə icazə verilməsini rica edib.
Məlumata görə, Əliyev “Blinkenin ricasına bir şərtlə müsbət cavab verib ki, Azərbaycanın yüksək səviyyəli rəsmilərinin ABŞ-a səfərlərinə qoyulan əsassız qadağan qaldırılsın”.
Lakin ABŞ Dövlət Departamenti sözçüsünün AzadlıqRadiosu Azərbaycan xidmətinin #İzahla proqramına açıqlamasında səfər məsələsi ilə bağlı yekun olaraq deyilir ki, bu məsələ ilə əlaqədar “nəzərdən keçiriləcək heç nə yoxdur”.
Son bir neçə həftədə Azərbaycanda hökumətə yaxın mediada Qərbə, xüsusilə ABŞ-a qarşı məqalələr dərc olunur. ABŞ səfirliyi isə noyabrın 27-də Bakıda planlaşdırılan məzun görüşünü təxirə salıb. Bundan öncə yerli mediada Birləşmiş Ştatların həmin tədbiri əslində ölkədəki "agentura"sı ilə görüşmək məqsədilə keçirdiyi iddia olunurdu.
Sentyabrın ortasında Qarabağa nəzarətin bərpa olunması ilə nəticələnən birgünlük əməliyyatdan sonra Azərbaycanla Ermənistan arasında Qərb platformasına danışıq baş tutmayıb.
Dekabrın 2-də Bakıya gələn ABŞ-ın Azərbaycana yeni səfiri Mark Libbi (Mark Libby) isə deyib ki, "ABŞ-Azərbaycan əlaqələrini inkişaf etdirmək və regionda davamlı sülh naminə çalışmaq üçün işə başlamağı səbirsizliklə" gözləyir.
1 yaşlı uşağın qızılcadan öldüyü açıqlandı
Sabirabad rayonunda bu gün, dekabrın 1-də 1 yaşlı uşağın qızılcadan vəfat etdiyi deyilir.
Tibbi Ərazi Bölmələrini İdarəetmə Birliyindən (TƏBİB) "Turan"a bildirilib ki, azyaşlı noyabrın 30-da saat 12:47 radələrində Sabirabad Rayon Mərkəzi Xəstəxanasının Təcili tibbi yardım şöbəsinə yerləşdirilib: "Ona qızılcanın ağırlaşmış forması, neyrotoksikoz, ensefalit, kəskin tənəffüs, ürək-damar çatışmazlığı (III dərəcə) diaqnozları qoyulub. Pasiyentin yanaşı diaqnozu qavrama zəifliyi olub".
Məlumata görə, azyaşlı reanimasiya şöbəsinə yerləşdirilib, amma həkimlərin səylərinə baxmayaraq, dekabrın 1-də saat 00:15 radələrində o, vəfat edib: "Azyaşlı doğum evində hepatit və vərəm əleyhinə peyvənd olunub".
Bu deyilənlərə uşağın valideynlərindən münasibət almaq mümkün olmayıb.
TƏBİB vətəndaşlara müraciət edərək vaksinasiyadan keçməyə çağırıb.
Yerli mediada bundan bir neçə gün əvvəl də Azərbaycanda qızılcadan ölüm halının olması ilə bağlı məlumat yayılmışdı.
Distant tədrisə keçilib
Bakıdakı 195 nömrəli tam orta məktəbin ibtidai siniflərində qızılca səbəbindən distant tədris tətbiq olunub. Dərslər 14 gün distant formada keçiriləcək.
Bu barədə Bakı Şəhəri üzrə Təhsil İdarəsindən məlumat verilib.
Bildirilib ki, analoji vəziyyət, hələlik, başqa heç bir məktəbdə müşahidə edilmir.
AXCP üzvünün narkotik ittihamı ilə həbs olunduğu bildirilir
AXCP üzvü Elnur Həsənov barəsində Xətai rayon Məhkəməsinin noyabrın 30-da verdiyi qərar ilə 3 ay müddətinə həbs-qətimkan tədbirinin seçildiyi bildirilir.
Bu barədə AXCP-dən məlumat verilib.
Məlumatı, hələlik, məhkəmənin özündən dəqiqləşdirmək mümkün olmayıb.
***
Azərbaycan Xalq Cəbhəsi Partiyasının (AXCP) noyabrın 28-də saxlanılan üzvü Elnur Həsənov barəsində CM-in 234.4.3-cü (satış məqsədilə külli miqdarda narkotik əldə etmə, daşıma, saxlama) maddəsi ilə cinayət işi açılıb.
"İttihamlar saxtadır. Elnur Həsənov ardıcıl olaraq Dövlət Yol Polisini tənqid etdiyinə görə şərlənib", - AXCP-dən bildirilib.
Daxili İşlər Nazirliyi (DİN) Mətbuat xidmətindən "Turan"a E.Həsənov barəsində cinayət işinin başlanmasını təsdiqləyiblər. Amma nazirlikdən əlavə heç nə bildirilməyib. Buna qədər DİN insanların siyasi fəaliyyətinə görə şərlənərək həbs edilməsi ilə bağlı müxalif düşərgədə səslənən şikayətləri əsassız sayıb.
AXCP üzvü saxlanıb
Daxili İşlər Nazirliyi (DİN) Mətbuat xidmətindən "Turan"a Elnur Həsənovun saxlanılması ilə bağlı xəbəri təsdiqləyiblər. Qurumdan qeyd edilib ki, araşdırma aparılır, amma əlavə məlumat verilməyib.
+++
Azərbaycan Xalq Cəbhəsi Partiyasının (AXCP) üzvü Elnur Həsənov noyabrın 28-də saxlanılıb.
Bu barədə partiyadan məlumat verilib.
Məlumata görə, E.Həsənovu günorta saatlarında Bakıda avtomobil ehtiyat hissələri dükanında mülki geyimli şəxslər tutaraq aparıblar.
Vurğulanıb ki, fəal son vaxtlar sosial şəbəkələrdə Dövlət Yol Polisinin fəaliyyətini kəskin tənqid edirdi və saxlanmanın səbəbi bu ola bilər.
E.Həsənov bu ilin əvvəlində xuliqanlıq və polisə tabe olmamaqda ittiham edilərək 30 sutka həbs cəzası almışdı. Onda onun ittihamla razılaşmadığından bir neçə gün aclıq aksiyası da keçirildiyi bildirilmişdi.
Müxalifətdə olan AXCP-nin hazırda beşədək üzvü müxtəlif ittihamlarla uzunmüddətli həbsdədir. AXCP onların siyasi sifarişlə şərləndiyini bildirir. Amma rəsmilər ölkədə siyasi həbslərin olmadığını deyirlər.
Avropa Məhkəməsi Əli İnsanovun şikayəti ilə bağlı qərarını verib
Avropa İnsan Hüquqları Məhkəməsi (AİHM) noyabrın 30-da Azərbaycandan göndərilmiş ərizələrlə bağlı 10 yekun qərardadını elan edib. Onlardan bəziləri siyasətçilərin şikayəti ilə bağlıdır.
Bu barədə hüquqşünas Xalid Ağalıyev məlumat verib.
Ərizələrdən biri keçmiş səhiyyə naziri, hazırda Haqq Ədalət Partiyasının sədri Əli İnsanova aiddir. O, həbsdə olarkən-2016-cı ildə əlavə qanunsuz olaraq narkotik vasitələrin əldə edilməsi və cəzaçəkmə müəssisəsinin əməkdaşına zorakılıqla müqavimət göstərməkdə ittiham olunub. Nəticədə onun həbs müddəti uzadılıb. Apellyasiya instansiyası də həmin qərardan verilmiş şikayətləri rədd edib.
Hüquqşünasın vurğulamasına görə, "bu işdə tərəflər dostca anlaşıblar. Anlaşmaya əsasən, ərizəçiyə mənəvi zərər əvəzi 6600, hüquqi xərclər üçün 1500 avro ödəniləcək".
Ə.İnsanov 2005-ci il oktyabrın 19-da dövlət çevrilişinə cəhd ittihamı ilə həbs olunsa da, sonradan məhkəmə qarşısına vəzifə cinayətləri ittihamı ilə çıxarılıb. Dövlət əmlakının qanunsuz özəlləşdirilməsi, mənimsəmə kimi ittihamlarla 11 il azadlıqdan məhrum edilib. O, ittihamları qəbul etməyib. 2016-cı ilin avqustunda – cəza müddətinin başa çatmasına az qalmış Ə.İnsanov haqqında psixotrop dərmanlar saxlama və s. ittihamlarla yeni cinayət işi başlanıb, cəza müddəti daha 7 il uzadılıb.
Ə.İnsanov 2019-cu ilin martında prezidentin əfv sərəncamı ilə azadlığa buraxılıb.
Həbsdən buraxıldıqdan bir müddət sonra siyasi partiya yaratmaq qərarı verib. Onun tərəfdarları ilə yaratdığı Haqq Ədalət Partiyası dövlət qeydiyyatından keçib.
Afiəddin Məmmədov səhhətindən şikayət edir
İşçi Masası Həmkarlar İttifaqları Konfederasiyasının həbsdə olan sədri Afiəddin Məmmədovun sağlamlığında problem yarandığı bildirilir.
Vəkil Zibeydə Sadıqova bildirib ki, A.Məmmədov sümüklərin və bədənin sağ tərəfinin kəskin ağrılarından şikayət edir: "Afiəddin deyir ki, bununla bağlı artıq iki həftədir həkim müayinəsi və müalicə müəssisəsinə köçürülməsi üçün müraciət etsə də, müraciətə baxılmır".
A.Məmmədov hazırda 1 saylı Bakı İstintaq Təcridxanasında saxlanılır.
Vəkilin bu açıqlamasına, hələlik, Penitensiar Xidmət və başqa uyğun rəsmi qurumlardan münasibət almaq mümkün olmayıb.
A.Məmmədov bu il sentyabrın 20-də həbs olunub. Ona qarşı CM-in 126.1-ci (qəsdən sağlamlığa ağır zərər vurma) və 221.3-cü (xuliqanlıq-silah qismində istifadə olunan əşyalardan istifadə etməklə törədildikdə) maddələri ilə ittiham irəli sürülüb.
A.Məmmədov özünü təqsirli bilmir və həbsini fəaliyyəti ilə əlaqələndirir. Amma rəsmilər, bir qayda olaraq, deyirlər ki, hüquq-müdafiə fəaliyyətinə görə ölkədə hər hansı təzyiqlər yoxdur.
İşçi Masası Həmkarlar İttifaqları Konfederasiyasının daha iki üzvü - Elvin Mustafayev və Ayxan İsrafilov da həbsdədir. Onlara qarşı CM-nin 234.4.3-cü (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq əldə etmə və ya saxlama - küllü miqdarda) maddəsi ilə cinayət işi açıldığı deyilir. Onların da ittihamları qəbul etmədikləri bildirilir.
Mingəçevirdə zəlzələ olub
Bugün, noyabrın 29-da Azərbaycanın Mingəçevir şəhərində zəlzələ olub.
Bu barədə Respublika Seysmoloji Xidmət Mərkəzi məlumat yayıb.
Məlumata görə, zəlzələ yerli vaxtla 19:50-də qeydə alınıb.
Məlumatda deyilir ki, “zəlzələ Mingəçevir, Gəncə, Yevlax , Goranboy ərazilərində 4-3 bala qədər hiss olunub”.
Hələlik, dağıntı və təlafat haqqında məlumat verilmir.
Qarabağ Universiteti yaradılır
Xankəndidə Qarabağ Universiteti yaradılıb.
Prezident İlham Əliyev noyabrın 28-də bununla bağlı sərəncam imzalayıb.
+++
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycanın Qarabağ bölgəsi, ətraf 7 rayonu işğal edilib. 2020-ci ildə qısa müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa etmişdi. Azərbaycan, Rusiya və Ermənistan arasında razılaşma ilə Laçın dəhlizinə və Qarabağda Rusiya hərbçiləri yerləşdirilib.
Bu il sentyabrın 19-20-də Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib.
Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb.
Sentyabrın 28-də tanınmayan qurum fəaliyyətini dayandıracağını elan edib. Hazırda Xankəndi və Qarabağın digər ərazisində az sayda əhali qaldığı bildirilir.
Rza Səfərsoy həbs edilib
ALÖV Partiyasının sədri, Qarabağ müharibəsinin keçmiş iştirakçısı Rza Səfərsoy həbs olunub. Onun barəsində CM-in 228-ci (Qanunsuz olaraq silah..., partlayıcı maddələr... əldə etmə,.. satma) maddəsi ilə cinayət işi qaldırılıb.
Yaxınları R.Səfərsoyun həbsini onun tənqidi çıxışları ilə əlaqələndiriblər. Onların sözlərinə görə, R.Səfərsoy noyabrın 25-də saxlanıb, daha sonra isə Binə qəsəbəsindəki evində axtarış aparılıb: "Heç bir sənədləşmə aparılmadan Rza bəyə məxsus kompüter, mobil telefon götürülüb. Daha sonra özü Xəzər rayon Polis İdarəsinə aparılıb".
"Turan"ın xəbərinə görə, Daxili İşlər Nazirliyi (DİN) mətbuat xidmətinin əməkdaşı Nurlan Əliyev R.Səfərsoya qarşı qeyd olunan maddə ilə cinayət işi açıldığını təsdiqləyib.
Xatırlatma
R.Səfərsoy 2018-ci ildə Facebook səhifəsində bəzi statuslarına görə CM-in 214-2 (terrorçuluğa açıq çağırışlar) və 281.1-ci (dövlət əleyhinə açıq çağırışlar etmə və ya bu məzmunlu materiallar yayma) maddələri ilə təqsirli bilinərək 2 il azadlıqdan məhrum edilmişdi. O, hökmdən apellyasiya şikayəti verərək bəraət istəmişdi. 2019-cu il fevralın 11-də şikayət qismən təmin olunub, R.Səfərsoyun cəzası 2 ildən 7 ay 2 günə endirilib. O, həmin gün cəza müddəti tamam olduğuna görə məhkəmə zalından azadlığa buraxılmışdı. R.Səfərsoy ittihamı qəbul etmirdi.
ALÖV Partiyası dövlət qeydiyyatına alınmayıb.
ABŞ səfirliyi Bakıda tədbirlərini təxirə salmasına münasibət bildirdi
Amerika Birləşmiş Ştatları (ABŞ) səfirliyi bu ölkənin universitetlərinin məzunları ilə noyabrın 27-də Bakıda "Marriott Absheron" otelində keçirilməsi planlaşdırılan görüşü təxirə salıb.
Bu, BakuTV, Qafqazinfo saytında bu görüşlə bağlı bir sıra iddiaların yer aldığı məlumatların yayılmasından sonra baş verib. Həmin iddialarda tədbir "ABŞ-nin Bakıdakı agenturası ilə görüşü" kimi təqdim edilirdi.
Bundan əvvəl ABŞ və Azərbaycan münasibətlərində Qarabağ məsələsi ilə bağlı müəyyən soyuqluq müşahidə edilib. Ardınca da hökumət, ona yaxın kütləvi informasiya vasitələrində ABŞ əleyhinə yazılar, süjetlər hazırlanıb.
Son ittiham və görüşə münasibət bildirən ABŞ səfirliyi Turan-ın sorğusuna belə cavab verib: "Səfirlik iki qabaqcıl təhsil və mədəni mübadilə proqramımızın yubileylərini qeyd etməyi, həmçinin ABŞ-da təhsil almış məzunlardan ibarət Azərbaycan icmasının nailiyyətlərini, onların öz icmalarına töhfələrini vurğulamağı səbirsizliklə gözləyirdi. Bu yubileylər səfirliyin illik məzunlar tədbirini bu il daha da xüsusi edib. Tədbirdə hökumət, təhsil, qeyri-kommersiya və özəl sektorlar da daxil olmaqla müxtəlif təbəqələrdən olan 400-dən çox qonağın iştirakı gözlənilirdi. Tezliklə yenidən planlaşdırmağı səbirsizliklə gözləyirik".
Son illər ABŞ-da təhsil alan Azərbaycan vətəndaşlarının sayı artır.
2022-2023-cü tədris ilində ABŞ-da Azərbaycandan gedən 901 gənc təhsil alır. ABŞ səfirliyinin məlumatına görə, bu, əvvəlki illə müqayisədə 23.8 faiz çoxdur.
ABŞ-da təhsil almış və almaqda olanların bir çoxu Azərbaycan hökumətinin dəstəyi ilə ora gediblər.
Viktor Orban Azərbaycana gəlib
Macarıstanın baş naziri Viktor Orban noyabrın 23-də Azərbaycana gəlib.
O, noyabrın 25-də Bakıda keçiriləcək BMT-nin Mərkəzi Asiya İqtisadiyyatları üzrə Xüsusi Proqramının (SPECA) konfransında iştirak etməlidir.
Konfransdan əvvəl Orban Azərbaycan prezidenti ilə ikitərəfli danışıqlar da aparmalıdır.
SPECA 1998-ci ildə yaradılıb. Ona üzv dövlətlər Azərbaycan, Qazaxıstan, Tacikistan, Qırğızıstan, Türkmənistan, Özbəkistan və Əfqanıstandır.
Proqramın məqsədinin üzv dövlətlər arasında əməkdaşlığın inkişafı və dünya iqtisadiyyatına inteqrasiyanın dəstəklənməsi olduğu açıqlanıb.
'Dərnəgül' taxta bazarında yanğının qarşısı alınıb, ölən var [video]
Yanğının qarşısı alınıb
Bakı şəhəri, Nərimanov rayonu, Ziya Bünyadov prospektində fəaliyyət göstərən inşaat materialları bazarında baş verən yanğın ərazisində bütün açıq alov mənbələri söndürülüb.
Bu barədə noyabrın 23-də, günorta saatlarına Fövqəladə Hallar Nazirliyindən bildiriblər:
“Hazırda bəzi tüstülənmə mənbələrinin tam söndürülməsi və soyutma işləri davam etdirilir”,məlumatda vurğulanır.
***
"...hadisə zamanı 1962-ci il təvəllüdlü sahibkar Razi Qasımovun vəfat etməsi müəyyən olunub. Fakta görə FHN-in Əməliyyat-istintaq idarəsində CM-in 225.2-ci (yanğın təhlükəsizliyi qaydalarını pozma) maddəsi ilə cinayət işi başlanıb", - Baş Prokurorluğun məlumatında bildirilir.
+++
Noyabrın 23-ü səhər saatlarında Bakının Binəqədi rayonu, Ziya Bünyadov prospektində inşaat materialları bazarında yanğın baş verib.
Bu barədə Fövqəladə Hallar Nazirliyi (FHN) məlumat yayıb.
Məlumata görə, "Havanın küləkli olması yanğının söndürülməsi işlərini mürəkkəbləşdirsə də, hazırda yanğınla mübarizə tədbirləri davam etdirilir".
Tibbi Ərazi Bölmələrini İdarəetmə Birliyindən (TƏBİB) isə "Turan"a bildirilib ki, yanğın zamanı bir nəfər həlak olub.
Hələlik, yanğının səbəbi açıqlanmır.
Azərbaycan və Ermənistanın sərhəd komissiyaları görüşəcək
Sərhəddə görüşü Azərbaycan da təsdiq edir
Azərbaycan Xarici İşlər Nazirliyi (XİN) də noyabrın 30-da sərhəddə Ermənistanla delimitasiya komissiyasının iclasının keçiriləcəyini təsdiqləyib.
Bu barədə Azərbaycan XİN-in Mətbuat Xidməti idarəsinin rəisi Ayxan Hacızadə bildirib.
***
Bundan əvvəl verilən xəbərdə deyilirdi ki, Ermənistan və Azərbaycan sərhəd delimitasiyası və demarkasiyası komissiyaları noyabrın 30-da iki ölkənin dövlət sərhədində görüşməyi planlaşdırır. Ermənistanın Xarici İşlər Nazirliyi (XİN) noyabrın 23-də yaydığı məlumatda bu barədə ilkin razılaşma əldə olunduğunu bildirib.
Azərbaycan XİN noyabrın 21-də Ermənistanla "qarşılıqlı məqbul" məkanda birbaşa danışıqlara çağırmışdı. Yerevan buna cavabında Bakı ilə danışıqları yenidən aparmağa hazır olduğunu təsdiqləyib, amma ən yüksək səviyyədə birbaşa danışıqlar məsələsinə toxunmayıb.
Sərhəd komissiyalarına Azərbaycan və Ermənistanın baş nazir müavinləri – Şahin Mustafayev və Mher Qriqoryan başçılıq edirlər. Komissiyaların ilk görüşü 2022-ci ilin mayında, ikinci görüşsə bu ilin iyulunda keçirilib.
Yerevan Aİ vasitəçiliyinə 'meyllidir'
Yerevan hələ də iki ölkənin liderləri səviyyəsində danışıqları Avropa İttifaqının (Aİ) vasitəçiliyi ilə aparmağa meyllidir. Bunu Ermənistan baş naziri Nikol Paşinyanın parlamentdəki müttəfiqi AzadlıqRadiosunun erməni xidmətinə deyib. Hökumətyönlü "Mülki müqavilə" fraksiyasını təmsil edən Sarkis Xandanyanın sözlərinə görə, belə danışıqlar Ermənistan-Azərbaycan normallaşmasının əsas prinsiplərinə əsaslanmalıdır. Bu prinsiplərə ərazi bütövlüyü və sərhədlərin 1991-ci il Almatı deklarasiyası əsasında qarşılıqlı tanınması, dövlətlərin öz ərazilərindən keçən nəqliyyat əlaqələri üzərində suveren yurisdiksiyası daxildir.
Sentyabrın ortasında Qarabağa nəzarətin bərpa olunması ilə nəticələnən birgünlük əməliyyatdan sonra Azərbaycanla Ermənistan arasında Qərb platformasına danışıq baş tutmayıb.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib. Azərbaycan, Rusiya və Ermənistan arasında razılaşma ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.
Bu il sentyabrın 19-20-də Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib.
Sentyabrın 20-də Qarabağ separatçıları Bakının şərtlərinə razılaşdıqlarını bildiriblər.
Daha sonra Qarabağdan Ermənistana əhali köçü başlayıb.
Sentyabrın 28-də tanınmayan qurum fəaliyyətini dayandıracağını elan edib.
Ancaq tərəflər sülh sazişi imzalamayıb. Danışıqlar həm Avropa İttifaqının, həm də Rusiyanın ayrılıqda vasitəçilikləri ilə aparılır.
Bərdədə evin döşəməsi çöküb, ölən və yaralananlar var
Noyabrın 23-də Bərdə rayonunda yas mərasimi keçirilən evin döşəməsinin çökdüyü, nəticədə ölən və xəsarət alanların olduğu bildirilir.
Verilən məlumatlara görə, evin ikinci mərtəbəsinin döşəməsi ağırlığa dözmədiyindən çöküb.
Tibbi Ərazi Bölmələrini İdarəetmə Birliyindən (TƏBİB) “Turan” Agentliyinə bildirilib ki, Bərdə rayonunun Yeni Daşkənd kəndində baş verən hadisə ilə əlaqədar olaraq rayon mərkəzi xəstəxanasına 23 nəfər yerləşdirilib.
Vurğulanıb ki, 1 nəfərdə xəstəxanayaqədər ölüm halı qeydə alınıb: "Digər şəxslərin ümumi müayinələri davam etdirilir. Əlavə məlumat veriləcək".
Hələlik, evin sahibi və xəsarət alanların yaxınları ilə danışmaq mümkün olmayıb
