Fevralın 28-də Gəncə Apellyasiya Məhkəməsində AXCP sədrinin müavini Gözəl Bayramlının 3 il azadlıqdan məhrum edilməsinə dair hökmdən verilmiş şikayət üzrə ilkin baxış iclası keçirilib.
Məhkəmədə G.Bayramlının vəkili Elçin Sadıqov onun ev dustaqlığına buraxılması, onun saxlandığı sərhəd-buraxılış məntəqəsindəki müşahidə kameralarının görüntülərinin alınması və məhkəmədə baxış keçirilməsi, hal şahidi qismində tanınan şəxslərin apellyasiya məhkəməsində də dindirilməsi haqda vəsatətlər qaldırıb. Daha bir vəsatət isə AXCP sədri Əli Kərimli, partiyanın Qadınlar Şurasının sədri Solmaz Hüseynova, Milli Şuranın üzvü Gültəkin Hacıbəylinin məhkəmədə əlavə şahid qismində dindirilməsi olub. Vəkil bu vəsatətini belə əsaslandırıb ki, G.Bayramlı gömrük-keçid məntəqəsindən adları çəkilən şəxslərə zəng edərək, çantasına nəsə atıldığını söyləyib.
G.Bayramlı da vəkilinin vəsatətlərini dəstəkləyib.
Dövlət ittihamçısı Qalib Rizvanov isə əksinə, vəsatətlərin əleyhinə olub və təmin edilməməsini istəyib.
Teyyub Muxtarovun sədrlik etdiyi hakimlər kollegiyası vəsatətlərin heç birini təmin etməyib. Bu iş üzrə məhkəmə baxışı martın 12-nə təyin olunub.
Xatırlatma
AXCP sədrinin müavini G.Bayramlı mayın 25-i axşam saatlarında Gürcüstandan qayıdarkən saxlanıb. Dövlət Sərhəd Xidmətinin İstintaq və Təhqiqat İdarəsində Cinayət Məcəlləsinin 206.1-ci (qaçaqmalçılıq) maddəsi ilə cinayət işi başlanıb. Qazax Rayon Məhkəməsinin hökmü ilə 3 il azadlıqdan məhrum edilib.
Rəsmi açıqlamada Gürcüstandan qayıdarkən G.Bayramlının əşyaları arasında bəyan edilməmiş 12 min dollar pul tapıldığı iddia olunur. G.Bayramlı isə məhkəmədə deyib ki, həmin pulu hüquq-mühafizə əməkdaşları özləri onun əşyaları arasına atıblar, onun həbsi siyasi xarakter daşıyır. O, Gürcüstana müalicə məqsədilə getdiyini, son iki ildə Gürcüstanda dörd dəfə əməliyyat olunduğunu bildirib.
