Azərbaycan xəbərləri
Penitensiar xidmətin binasında yanğın söndürülüb
Bu gün, fevralın 20-də axşam saatlarında Ədliyyə Nazirliyinin Penitensiar Xidmətinin inzibati binasında yanğın başladığı bildirilir.
APA-nın xəbərinə görə, Nəsimi rayonu, Nizami küçəsində yerləşən binada yanğını söndürməkdən ötrü yanğınsöndürmə briqadaları cəlb olunub.
* * *
Ədliyyə Nazirliyinin Penitensiar Xidmətinin inzibati binasının ərazisində baş verən yanğının söndürüldüyü açıqlanıb.
APA-nın xəbərinə görə, Xidmətin ərazisində yerləşən yardımçı tikilidə baş verən qısaqapanma nəticəsində 10 kv/m sahədə stul və kağızlar yanıb.
Yanğın söndürülüb.
Hadisə nəticəsində təxliyə edilən və xəsarət alanların olmadığı bildirilir.
Bütün xəbərləri izləyin
Xanımı: 'Ombudsmanın nümayəndələri Polad Aslanovla görüşüblər'
Həbsdə olan jurnalist Polad Aslanov saxlanıldığı 15 saylı Cəzaçəkmə Müəssisəsindəki şəraitdən şikayət edir.
Bununla bağlı Ombudsman Aparatının nümayəndələrinin iyunun 15-də Aslanovla müəssisədə görüşdükləri bildirilir.
Bu barədə jurnalistin həyat yoldaşı Gülmirə Aslanova məlumat verib. O bildirib ki, Aslanov saxlanıldığı şəraiti Ombudsman Aparatının işçilərinə "əyani şəkildə" göstərib.
"Saxlanıldığı kamerada üç məhbus döşəmənin üzərində, məhbusların ayaqları altında yatır", - Aslanova deyir.
Xanımın sözlərinə görə, P.Aslanov səhhəti ilə də bağlı şikayət dilə gətirib. Onun vurğuladığına görə, nə düzgün müayinə edilir, nə də müalicə alır: "Polad onu da bildirib ki, qanunla aralarında konflikt, münaqişə olan iki məhbusun eyni cəzaçəkmə müəssisəsində saxlanılması qadağandır, qanun buna yol vermir".
P.Aslanov hesab edir ki, onu şərlənməyində iştirak edən məhbusla eyni müəssisədə saxlayırlar.
Hələlik, bu açıqlamaya Ombudsman Aparatı və Penitensiar Xidmətdən münasibət almaq mümkün olmayıb. Amma Penitensiar Xidmətdən bundan əvvəl oxşar şikayətlərə cavab olaraq bildiriblər ki, məhbuslar qanunvericiliyin və beynəlxalq normaların tələblərinə uyğun saxlanır.
P.Aslanov 2019-cu ilin iyununda saxlanılıb. O, Cinayət Məcəlləsinin 274-cü (dövlətə xəyanət) maddəsi ilə həbs edilərək 16 il azadlıqdan məhrum edilib. Aslanov ittihamları qəbul etmir və həbsini jurnalist fəaliyyəti ilə əlaqələndirir. Sonradan Ali Məhkəmə Aslanovun həbs müddətini 13 ilə qədər azaldıb.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 370-dən çox siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.
Azərbaycanın İrandakı səfirliyinin ailə üzvləri ölkələrinə keçiblər
Azərbaycanın İrandakı səfirliyi əməkdaşlarının ailə üzvləri də daxil olmaqla ilkin olaraq ümumilikdə 41 nəfər Azərbaycan vətəndaşının İran-Azərbaycan sərhədindən keçidi təmin olunub.
AZƏRTAC-ın məlumatına görə, bunu Xarici İşlər Nazirliyinin (XİN) mətbuat katibi Ayxan Hacızadə deyib. Onun sözlərinə görə, İrandakı səfirlik və Təbriz şəhərindəki Baş konsulluq, habelə İsraildəki səfirlik Azərbaycan vətəndaşlarının qaynar xəttlərə daxil olan müraciətlərini nəzərdən keçirərək zəruri tədbirlər görürlər. Amma A.Hacızadə indiyə kimi nə qədər Azərbaycan vətəndaşının müraciət etdiyini açıqlamayıb.
İran Azərbaycanla qonşu ölkədir. Koronavirus pandemiyası səbəb göstərilərək 2020-ci ilin yazında Azərbaycanın quru sərhədində qonşu ölkələrlə gediş-gəliş məhdudlaşdırılıb. 2023-cü il mayın 5-də Ümumdünya Səhiyyə Təşkilatı pandemiyanın başa çatdığını bəyan etsə də, sərhəddə məhdudiyyətlər götürülməyib. Nazirlər Kabineti məhdudiyyətlərin müddətinin uzadılmasını eyni səbəblə izah etsə də, rəsmilər çıxışlarında təhlükəsizlik amillərindən bəhs edirlər. Amma son günlər İranda yaranmış vəziyyətlə bağlı Azərbaycan dövləti xarici vətəndaşların təxliyələri üçün Astara sərhəd-keçid məntəqəsindən keçmələrinə şərait yaradır. Söhbət, əsasən, Rusiya vətəndaşlarından gedir.
İsrail iyunun 13-də İranın nüvə və hərbi obyektlərinə "qabaqlayıcı" zərbələr endirdiyini bildirib. Təl-Əviv xəbərdarlıq edib ki, hücumlar davam edəcək, məqsəd Tehranın nüvə silahı hazırlamasının qarşısını almaqdır.
Rəsmi Tehran da İsrailə cavab verməyə başlayıb. Artiq üç gündür tərəflər qarşılıqlı şəkildə bir-birlərinə zərbələr endirməkdədir. Hər iki tərəfdən itkilər var.
Bayramov: "Azərbaycan ərazisinin İrana qarşı istifadə edilməsi mümkün deyil"
İyunun 14-də Azərbaycan xarici işlər naziri Ceyhun Bayramov ilə İran İslam Respublikasının xarici işlər naziri Seyid Abbas Ərağçi arasında telefon danışığı olub.
Azərbaycan Xarici İşlər Nazirliyinin (XİN) açıqlamasına görə, telefon danışığı zamanı, “İsrailin İran ərazisinə başladığı əməliyyat nəticəsində yaranmış vəziyyət” müzakirə olunub.
“...Nüvə obyektlərinin ətrafında mövcud vəziyyətin narahatlıq doğurduğu vurğulanıb. Mövcud problemləri yalnız beynəlxalq hüququn norma və prinsiplərinə uyğun olaraq,... diplomatik yollarla həll etməyin vacib olduğu diqqətə çatdırılıb”, - məlumatda qeyd edilir.
XİN-in bildirməsinə görə, bununla yanaşı, “Azərbaycan ərazisinin hər hansı bir ölkə tərəfindən üçüncü ölkəyə, o cümlədən, qonşu və dost İrana qarşı istifadə edilməsinin mümkün olmadığı” vurğulanıb.
“İranın hava məkanının bağlı olduğu nəzərə alınaraq, Azərbaycanın quru sərhədindən istifadə etməklə müxtəlif ölkələrin və İranın nümayəndələrinə keçid üçün şərait yaradıldığı barədə məlumat verilib”, - məlumatda əlavə edilib.
Koronavirus pandemiyası səbəb göstərilərək 2020-ci ilin yazında Azərbaycanın quru sərhəddində gediş-gəliş məhdudlaşdırılıb. 2023-cü il mayın 5-də Dünya Səhiyyə Təşkilatı pandemiyanın başa çatdığını bəyan etsə də, sərhəddə məhdudiyyətlər götürülməyib. Nazirlər Kabineti məhdudiyyətlərin müddətinin uzadılmasını eyni səbəblə izah etsələr də, rəsmilər çıxışlarında təhülkəsizlik amillərindən bəhs edirlər.
Amma son günlər İranda yaranmış vəziyyətlə bağlı Azərbaycan dövləti xarici vətəndaşların təxliyələri üçün Astara sərhəd-keçid məntəqəsindən keçmələrinə şərait yaradır.
İsrail iyunun 13-də İranın nüvə və hərbi obyektlərinə "qabaqlayıcı" zərbələr endirdiyini bildirib. Təl-Əviv xəbərdarlıq edib ki, hücumlar davam edəcək, məqsəd Tehranın nüvə silahı hazırlamasının qarşısını almaqdır.
Rəsmi Tehran da İsrailə cavab verəcəyini bildirib. Artiq 2 gündür Tehran Təl-Əvivə və İsrailin digər şəhərlərinə raket zərbələri endirir.
İtkilər və xəsart alanlarla bağlı məlumatlar var.
AXCP: Daşkəsən şöbəsinin Məclis sədri 30 sutka həbs edilib
Azərbaycan Xalq Cəbhəsi Partiyasının (AXCP) Daşkəsən şöbəsinin Məclis sədri Ruzi Bağırovun inzibati qaydada həbs edildiyi bildirilir.
AXCP-dən iyunun 13-də yayılan məlumata görə, o, İnzibat Xətalar Məcəlləsinin (İXM) 535-ci (Polis işçisinin və ya hərbi qulluqçunun qanuni tələbinə qəsdən tabe olmama) maddəsi ilə təqsirləndirilərək məhkəmənin qərarı ilə 30 sutka inzibati qaydada həbs edilib. Partiya onun şərləndiyini hesab edir, amma, hələlik, başqa detalları açıqlamır.
AXCP-nin bu açıqlamasına Daxili İşlər Nazirliyi və başqa rəsmi qurumlardan münasibət almaq mümkün olmayıb.
AXCP Daşkəsən şöbəsinin sədri Sahib Məmmədzadə də 1 il 3 aydır ki, narkotik ittihamı ilə həbsdədir. Ötən ilin dekabrında Gəncə Ağır Cinayətlər Məhkəməsinin hökmü ilə ona 6 il 6 ay həbs cəzası kəsilmişdi. Bu ilin martında apellyasiya məhkəməsi onun cəzanı 3 il 6 aya endirib. O, da şərləndiyini deyir.
Xatırlatma
Müxalifətdə olan AXCP-nin hazırda ümumilikdə 15 civarında üzvü uzunmüddətli həbsdədir. Üstəlik, bir çox fəalları inzibati qaydada həbs edilib. Onlar müxtəlif ittihamlarla üzləşsələr də, partiya onların hamısının siyasi sifarişlə həbs olunduğunu açıqlayıb. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
Bəzi hüquq müdafiəçilərinin hesablamalarına görə, hazırda Azərbaycanda 370-dan çox siyasi məhbus var.
Müsavat Partiyasının 3 üzvü həbs edilib
İyunun 11-də Müsavat Partiyasının iki Məclis və bir sıravi üzvü Biləsuvar rayon Məhkəməsinin qərarı ilə həbs edilib. Onlardan Müsavat Partiyasının Məclis üzvləri Ələddin Ələsgərli 2 il 3 ay, Qoşqar Nuralı 2 il, partiya fəali Cabir Vəliyev isə 2 il 3 ay azadlıqdan məhrum olunub. Həmin şəxslər Cinayət Məcəlləsinin 221.2.1 (bir qrup şəxs tərəfindən törədilən xuliqanlıq) maddəsinə əsasən həbs ediliblər.
Partiyadan verilən məlumata görə, cinayət işinin qaldırılmasının səbəbi rayon təşkilatının ötən il dekabrın 31-də ictimai iaşə obyektlərindən birində Dünya Azərbaycanlarının Həmrəylik Günü və Yeni il ilə bağlı bayram tədbiri keçirməsindən sonra baş verən insidentdir. İddiaya görə, yerli hakimiyyət orqanlarının sifarişi ilə həmin gün partiya fəallarına qarşı təxribat təşkil edilib. Partiyadan habelə vurğulandığına görə, təxribat zamanı Ə.Ələsgərliyə xəsarət yetirildiyi rəsmi tibbi ekspertizada təsdiq edilsə də, məhkəmə qarşı tərəfi cərimələməklə kifayətlənib, müsavatçılar barəsində isə "heç bir əsas olmadan azadlıqdan məhrum olunmaları barədə sifarişli hökm çıxarıb".
Müsavat Partiyası bu hökmü Azərbaycanda repressiyaların davamı kimi qiymətləndirir.
Hələlik, Müsavat Partiyasının bəyanatına Biləsuvar rayon Məhkəməsi, yerli hakimiyyət orqanları və başqa maraqlı tərəflərdən münasibət almaq mümkün olmayıb.
Xatırlatma
Bir sıra yerli hüquq müdafiəçilərinin hazırladığı siyahıya görə Azərbaycanda 370-dən çox siyasi məhbus var. Amma rəsmilər ölkədə siyasi məhbusların olması ilə bağlı fikirləri qəbul etmirlər. Rəsmilər hesab edirlər ki, siyasi məhbus siyahılarında yer alan şəxslər sırf törətdikləri əmələ görə məsuliyyətə cəlb olunublar.
Azərbaycanda siyasi məhbus hesab edilənlərin sayı artır
"Azərbaycan Siyasi Məhbuslarına Azadlıq" Birliyi ölkədə siyasi məhbus sayılan şəxslərin yeni siyahısını açıqlayıb. Siyahıya 375 nəfərin adı daxil edilib.
Bu rəqəm birliyin 2025-ci il fevralın 12-də təqdim etdiyi siyahı ilə müqayisədə 18 nəfər çoxdur.
Yeni siyahıya jurnalist Ülviyyə Əli, ictimai fəal Əhməd Məmmədli, vətəndaş cəmiyyətinin üzvləri Bəşir Süleymanlı, Məmməd Alpay, dini baxışlı insanlar, müxalifətçilər və digərləri əlavə edilib.
Hesabatda siyasi məhbus sayılanlar 12 kateqoriya üzrə bölünüb. Sənəddə onların 29-u jurnalist və bloqer, 6-sı hüquq müdafiəçisi, 39-u ictimai-siyasi fəal, 5-i milli azlıqların nümayəndəsi, 2-si müharibə əleyhdarı, 5-i deportasiya olunmuş siyasi mühacir, 241-i dini kəsimdən olan insanlar, 12-si isə ömürlük məhkum kimi təqdim edilirlər.
Bundan əlavə, müxtəlif işlər üzrə 36 nəfər də siyasi məhbus hesab edilib.
Amma Azərbaycanda siyasi məhbus sayılan şəxslərlə bağlı vahid siyahı yoxdur. Başqa təşkilatların hazırladığı siyahılarda isə, əsasən, daha az məhbus yer alır.
Beynəlxalq hüquq müdafiə təşkilatları Azərbaycanda siyasi məhbusların azad olunmasına çağırışlar edir.
Rəsmi Bakı isə, bir qayda olaraq, ölkədə siyasi məhbusların olmadığını bildirir, yerli və beynəlxalq təşkilatların mövqeyini rədd edirlər. Rəsmilərə görə, Azərbaycanda siyasi məhbus siyahılarına daxil edilən şəxslər sırf törətdikləri əmələ görə mühakimə olunublar.
Prezidentin imzaladığı son iki əfv sərəncamına siyasi məhbus hesab edilən bir şəxs belə düşməyib.
AMB uçot dərəcəsini sabit saxladı
Azərbaycan Mərkəzi Bankının (AMB) İdarə Heyəti uçot dərəcəsini dəyişməyib.
Bu gün, iyunun 11-də açıqlanan qərarı ilə uçot dərəcəsi 7.25, faiz dəhlizinin aşağı həddi 6.25, yuxarı həddi isə 8.25 faiz səviyyəsində dəyişməz saxlanılıb.
"Qərar faktiki inflyasiyanın proqnoz inflyasiya trayektoriyasına uyğunluğu, proqnozlaşdırılan inflyasiyanın hədəflə (4±2%) müqayisəsi, son qlobal iqtisadi proseslərin mümkün təsirləri, daxili makroiqtisadi vəziyyət, həmçinin pul siyasəti qərarlarının ötürücülüyü nəzərə alınmaqla qəbul edilib", - AMB bəyan edib.
Son bir ildə AMB uçot dərəcəsini sabit saxlayır.
Müstəqil iqtisadçılar isə hesab edirlər ki, Azərbaycanda uçot dərəcəsinin müəyyən edilməsi bir qədər formal xarakter daşıyır. Onlar deyir ki, uçot dərəcələri dəyişəndə belə bu bank faizlərinə təsir etmir. Əslində uçot dərəcəsi aşağı olarsa, kredit faizləri aşağı düşməlidir. Müstəqil ekspertlər vurğulayırlar ki, ölkədə iqtisadi institutlar zəif olduğu üçün Mərkəzi Bankın və onun faiz dərəcəsinin iqtisadiyyatda ciddi rol almasında problemlər var.
Qazın satışında yeni qaydalar. Qiyməti müəyyən edən dəyişir...
Qazın topdan və pərakəndə satışı ilə bağlı yenidən tənzimlənmə nəzərdə tutulur.
AZƏRTAC-ın xəbərinə görə, bu, Milli Məclisin Təbii ehtiyatlar, energetika və ekologiya komitəsinin iyunun 10-da keçirilən iclasında müzakirəyə çıxarılan "Qaz təchizatı haqqında" yeni qanun layihəsində öz əksini tapıb.
Qanun layihəsinə əsasən, qazın topdansatışını yalnız lisenziyalaşdırılmış topdan satıcılar həyata keçirəcək. Bu satış forması topdan satıcı ilə pərakəndə satıcı və ya iri istehlakçılar arasında bağlanmış müqavilələrə əsaslanacaq. Pərakəndə satış isə birbaşa pərakəndə satıcılarla istehlakçılar arasında imzalanan müqavilələr vasitəsilə gerçəkləşdiriləcək.
Qaz satıcılarının yalnız qaz təchizatı sahəsində fəaliyyət göstərmələri ilə bağlı müddəa da qanun layihəsində əksini tapıb. Layihədə qeyd olunan istisnalar xaricində qaz satıcılarının bu sektordan kənar fəaliyyətlə məşğul olmalarına yol verilməyəcək. Sözügedən məhdudiyyət 2027-ci il yanvarın 1-dən qüvvəyə minəcək.
Qiyməti müəyyən edən dəyişir
"Qaz təchizatı haqqında" yeni qanun layihəsi Azərbaycanda qazın qiymət tənzimlənməsi mexanizmində əhəmiyyətli dəyişikliklər və sektorun strukturlaşmasında yeniliklər vəd edir.
Xəbərə görə, bunu Energetika Nazirliyinin şöbə müdiri Rahid Əsədov Milli Məclisin komitə iclasında çıxışı zamanı söyləyib.
O bildirib ki, qanunun qəbulu ilə qaz tariflərinin müəyyən edilməsi səlahiyyəti indiki Tarif Şurasından tənzimləyici orqana keçəcək: "Layihədə qaz satıcısının hüquq və vəzifələri dəqiq şəkildə müəyyən edilib. Bundan əlavə, qaz təchizatı zəncirində fəaliyyət göstərən subyektlərin bölünməsi həyata keçiriləcək. Bu, qazın paylanması, satışı, nəqli, topdansatışı və idxalı ilə məşğul olan qurumun daxilində ayrı-ayrı hüquqi şəxslərin yaradılmasını nəzərdə tutur. Bu addımın sektorun daha şəffaf və səmərəli idarə olunmasına töhfə verəcəyi gözlənilir".
Nazirlik rəsmisinin sözlərinə görə, yeni qanun layihəsi qaz sektorunda rəqabətliliyi artırmaq və istehlakçıların maraqlarını daha yaxşı qorumaq məqsədi daşıyır.
Tənqidlər...
Amma yeni qanun layihəsi ilə bağlı sosial şəbəkələrdə tənqidlərə də rast gəlmək mümkündür. Bir sıra ölkə vətəndaşlarının fikrincə, qanunvericiliyə dəyişiklik qiymət artımına yol açacaq. Üstəlik, onların fikrincə, belədə qiymət artımları zamanı hökumət birbaşa tənqidlərdən də yayınmış olacaq.
Tarif Şurasına İqtisadiyyat naziri rəhbərlik edir.
Zamin Salayev həbsdə ürək ağrılarından şikayətlənir
Müxalifətdə olan Azərbaycan Xalq Cəbhəsi Partiyası (AXCP) Salyan rayon təşkilatının sədri Zamin Salayevin həbsdə səhhətinin pisləşdiyi bildirilir.
Bu barədə onun partiya dostları məlumat yayıb.
Onların vurğulamasına görə, Z.Salayev səhhətinin ağırlaşmasını özü telefonla bildirib: "Dedi ki, ürəyim tutub, nəfəs ala bilmirəm, boğuluram və həkimlər heç bir tədbir görmür. Hətta iki dəfə vəziyyəti kəskin pisləşib".
Yaxınlarının əlavə etməsinə görə, Z.Salayev əvvəllər də ürək ağrılarından şikayət edib.
Hələlik, bu məlumata Penitensiar Xidmət və başqa rəsmi qurumlardan münasibət almaq mümkün olmayıb.
2023-cü il mayın 22-də Qaradağ rayon Məhkəməsinin hökmü ilə Z.Salayev 4 il azadlıqdan məhrum edilib. Salayev həmin il fevralın 7-də saxlanmışdı və o, Cinayət Məcəlləsinin 221.3-cü (xuliqanlıq – silah və ya silah qisminə əşya tətbiq etməklə) maddəsi ilə ittiham edilirdi. AXCP fəalı ittihamı qəbul etmir.
Xatırlatma
AXCP-nin fəal üzvlərindən Z.Salayev bundan əvvəl - 2020-ci ilin aprelində isə Salyan rayon Məhkəməsində 2 il 3 ay azadlıqdan məhrum edilmişdi. O, həmin vaxt Salyan rayon Polis Şöbəsinin əməkdaşı Həmzə Əzizovun iddiası əsasında Cinayət Məcəlləsinin 147.2 (ağır cinayətdə ittiham etməklə böhtan atma) və 148-ci (təhqir) maddələri ilə məhkum edilib. Salayev həbsindən bir müddət əvvəl sosial şəbəkələrdə adıçəkilən polis əməkdaşı ilə mübahisəsinin videosunu yaymışdı. Həmin videoda Salayev Əzizovu rayonda yaşayan bir qadına qarşı təcavüzə görə ittiham edirdi. Video yayılandan sonra polis əməkdaşı Salyan rayon Məhkəməsində ona qarşı xüsusi ittiham qaydasında iddia qaldıraraq həbsini tələb etmişdi. Videoda haqqında bəhs olunan xanım isə Əzizova bıçaqla xəsarət yetirdiyinə görə 7 il azadlıqdan məhrum edilib. O, polisin zorakı hərəkətlərindən müdafiə olunmaq üçün ona xəsarət yetirdiyini bildirib. Polis əməkdaşı isə onun dediklərinin həqiqətəuyğun olmadığını söyləyib. Salayev 2022-ci il yanvarın 19-da - Amnistiya Aktı ilə əlaqədar vaxtından bir neçə ay əvvəl azadlığa çıxmışdı.
Azərbaycan XİN Putinin köməkçisinə cavab verib
Azərbaycan Xarici İşlər Nazirliyi (XİN) iyunun 9-da Rusiya prezidentinin köməkçisi Vladimir Medinskinin "Russia Today" kanalına müsahibəsi zamanı Ermənistan-Azərbaycan münaqişəsi ilə bağlı səsləndirdiyi fikirlərə cavab verib.
XİN vurğulayıb ki, Rusiya Federasiyası prezidentinin köməkçisinin "keçmiş Ermənistan-Azərbaycan münaqişəsi ilə bağlı faktların təhrif olunduğu, Qarabağ bölgəsini mübahisəli ərazi kimi təqdim edən" açıqlaması təəssüf və təəccüb doğurur.
XİN-ə görə, təəssüf ki, V.Medinski Rusiya-Ukrayna müharibəsini Qarabağda mövcud olmuş vəziyyətlə müqayisə edir. "Azərbaycan heç zaman heç bir ölkənin ərazi bütövlüyünü pozmadığına və heç bir ölkəyə qarşı aqressiv müharibə aparmadığına görə belə müqayisə yersizdir. Azərbaycan 2020-ci və 2023-cü illərdə öz suveren və beynəlxalq birlik tərəfindən tanınmış ərazilərində Vətən müharibəsi və antiterror tədbirləri həyata keçirib", - açıqlamada əlavə edilib.
Azərbaycan XİN-in bəyanatına səbəb olan müsahibəsində prezident Vladimir Putinin köməkçisi Medinskinin deyib ki, əgər Rusiya-Ukrayna münaqişəsi cəbhə xətti boyunca dayandırılarsa və sülh barədə razılığa gəlinməsə, "o zaman – bilirsiniz, Ermənistanla Azərbaycan arasında mübahisəli bölgə, Qarabağ var idi – bu bölgə nəhəng Qarabağa çevriləcək".
"Bir müddət sonra Ukrayna NATO ilə birlikdə, müttəfiqləri ilə (NATO-ya daxil olacaq) onu geri almağa çalışacaq və bu, planetin sonu, nüvə müharibəsi olacaq", - Medinski iddia edib.
Xatırlatma
Ötən əsrin 80-ci illərində kəskinləşən Qarabağ münaqişəsi üzündən Azərbaycan və Ermənistan arasında silahlı toqquşmalar baş verib. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə və 2023-cü ildə birgünlük hərbi əməliyyatla Azərbaycan bütün ərazisində suverenliyini bərpa edib. Ondan sonra bölgədən erməni əhali köç edib. Yerevan bunu "etnik təmizlənmə" kimi dəyərləndirib, amma rəsmi Bakı bunu qəbul etməyib. Son illər iki ölkə arasında müxtəlif formatlarda sülh danışıqları aparılsa da, hələlik, sülh sazişi imzalanmayıb.
Əsgərin ölümünə vəzifəli şəxsin laqeydliyi səbəb olub?
Dövlət Sərhəd Xidmətinin (DSX) müddətli hərbi qulluqçusu, əsgər Rasim Həsənlinin ölümü ilə bağlı cinayət işi açılıb.
Bu barədə yerli saytlara Hərbi Prokurorluğunun Mətbuat xidmətindən məlumat verilib.
Bildirilib ki, faktla bağlı Bakı Hərbi Prokurorluğunda Cinayət Məcəlləsinin 342.1-1-ci (Rəisin və ya vəzifəli şəxsin öz xidməti borcuna vicdansız və ya laqeyd münasibəti nəticəsində öz xidməti vəzifəsini yerinə yetirməməsi və ya lazımi qaydada yerinə yetirməməsi - ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanılaraq ibtidai istintaq aparılır.
"Hazırda ibtidai istintaq davam etdirilir, qanunvericiliyin tələblərinə uyğun olaraq bütün tədbirlərin görülməsi, o cümlədən hər bir əmələ və fakta hüquqi qiymət verilməsi təmin ediləcək", - qurumdan əlavə olunub.
Həmin maddə ilə 2 ildən 5 ilədək müddətə azadlıqdan məhrum etmə cəzası nəzərdə tutulur.
DSX bir gün əvvəl, iyunun 8-də bildirmişdi ki, hərbi qulluqçu R.Həsənli xəstəliyi ilə əlaqədar müalicə olunduğu tibb müəssisəsində vəfat edib. Amma qurum gənc əsgərin xəstəliyinin nə olduğunu açıqlamırdı.
Məsələyə, hələlik, əsgərin yaxınlarından da münasibət almaq mümkün olmayıb.
Xəzər Hərbi Tədqiqatlar İnstitutunun (XHTİ) məlumatına görə, 2025-ci ilin təkcə ilk rübündə Azərbaycanda azı 14 hərbi qulluqçu qeyri-döyüş şəraitində həyatını itirib. Amma bu rəqəmi, hələlik, rəsmi qurumlar ayrılıqda təsdiqləməyiblər.
Naxçıvanda dönərdən zəhərləndiyi açıqlananların 9-u uşaq olub
Bu gün, iyulun 9-da Naxçıvan Muxtar Respublikasının Naxçıvan şəhərində 17 nəfərin qidadan zəhərləndiyi bildirilir.
AZƏRTAC-ın xəbərinə görə, muxtar respublikada Yoluxucu Xəstəliklər Mərkəzinin Təcili Tibbi Yardım Şöbəsinə 17 şəxs qida zəhərlənməsi diaqnozu ilə daxil olub.
Mərkəzin həkim-infeksionisti Nəzmin Allahverdiyeva deməsinə görə, xəstələrin vəziyyəti orta ağır, iki xəstənin vəziyyəti isə ağır qiymətləndirilib. Doqquz xəstə azyaşlı olub.
O əlavə edib ki, aparılan simptomatik yardımlar və dinamik müşahidə sonrası xəstələr tam klinik sağalma ilə evə buraxılıblar.
Qida Təhlükəsizliyi Agentliyindən isə bildirilib ki, təxirəsalınmaz tədbirlər həyata keçirilib, məhsullarından şübhə edilən bir dönərxananın fəaliyyəti dayandırılıb.
Qurumdan vurğulanıb ki, hadisə mövsümlə də əlaqədar ola bilər, məhsulların saxlanması, istifadə qaydalarının pozulması ilə də: "Hazırda bu istiqamətdə araşdırma davam etdirilir, ət, sous, ketçup və mayonezlərdən nümunələr seçilərək Qida Təhlükəsizliyi İnstitutunun laboratoriyasına təqdim olunub".
Məsələyə fəaliyyəti dayandırılan dönərxananın sahibindən münasibət almaq mümkün olmayıb.
Son vaxtlar Azərbaycanda belə oxşar hadisələr vaxtaşırı baş verməkdədir.
Amma ölkədə qida zəhərlənməsi ilə bağlı mərkəzləşmiş qaydada detallı rəsmi statistika açıqlanmır. Ekspertlər qida zəhərlənməsini, əsasən, əhalinin maddi durumu və keyfiyyətsiz ərzağın süfrələrə yol tapması ilə izah edirlər.
AXCP fəalının təkrar saxlandığı deyilir
Azərbaycan Xalq Cəbhəsi Partiyası (AXCP) Qaradağ şöbəsinin üzvü Rahil Quliyevin iyunun 7-də saxlandığı bildirilir.
Bu barədə AXCP-dən iyunun 8-də məlumat yayılıb.
Partiyadan vurğulandığına görə, onun haqqında cinayət işi açılıb. Amma partiyadan detallar açıqlanmayıb.
AXCP-nin açıqlamasına, hələlik, rəsmi qurumlardan münasibət almaq mümkün olmayıb.
R.Quliyev ötən ayın əvvəlində 30 sutka inzibati qaydada həbs edilmişdi. O, bir neçə gün idi ki, azadlığa çıxmışdı.
R.Quliyev AXCP sədri Əli Kərimlinin mühafizəçisi Elnur Quliyevin qardaşıdır. E.Quliyev özü də qardaşından öncə inzibati qaydada həbs edilmişdi.
Ə.Kərimli bu yaxınlarda bildirmişdi ki, son aylar ona ictimai əsaslarla mühafizəçilik edən və onu avtomobili ilə tədbirlərə aparan səkkiz partiya fəalı müxtəlif ittihamla həbs olunub.
Xatırlatma
Müxalifətdə olan AXCP-nin hazırda 15 civarında üzvü uzunmüddətli həbsdədir. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb. Üstəlik, AXCP fəallarından bəziləri inzibati qaydada da həbs edilir. Onlar isə, əsasən, polisə müqavimət və xırda xuliqanlıqda ittiham edilirlər.
Bəzi yerli hüquq-müdafiə təşkilatlarının hazırladıqları siyahıya görə, hazırda Azərbaycan həbsxanalarında 360-dan çox siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
Prezidentlər hazırkı dönəmi Azərbaycan-İran əlaqələrinin inkişafında dönüş sayırlar
İyunun 4-də Azərbaycan prezidenti İlham Əliyev ilə İran İslam Respublikasının prezidenti Məsud Pezeşkian arasında telefon danışığı olub.
Bu barədə Azərbaycan Prezidentinin Mətbuat Xidməti məlumat yayıb.
Məlumata görə, telefon danışığında hazırda iki ölkənin aidiyyəti dövlət qurumlarının M.Pezeşkianın bu ilin aprelində Azərbaycana rəsmi səfəri zamanı qarşıya qoyulan tapşırıqların həyata keçirilməsi üçün səylərini davam etdirdikləri vurğulanıb. Səfərin nəticəsi olaraq Bakı-Təbriz aviareysinin bərpası və Bakı-Tehran istiqamətində təyyarə reyslərinin artırılması qeyd edilib.
Azərbaycan-İran əlaqələrinin inkişafında hazırda dönüş nöqtəsinin olduğu vurğulanıb və birgə səylərlə iki ölkə arasında münasibətlərin müxtəlif sahələrdə dinamik surətdə inkişaf edəcəyinə ümidvarlıq bildirilib.
3 iyun
Bakı–Təbriz–Bakı marşrutu üzrə reyslər bərpa edilir
Azərbaycanın milli aviadaşıyıcısı AZAL iyunun 15-dən etibarən Bakı–Təbriz–Bakı marşrutu üzrə reyslərə başlayacaq.
AZAL-dan verilən məlumata görə, bu istiqamət üzrə uçuşlar həftədə iki dəfə – çərşənbə və bazar günləri yerinə yetiriləcək.
AZAL İranın paytaxtı Tehran şəhərinə də reyslərin sayını artırır. Bakı–Tehran–Bakı marşrutu üzrə uçuşlar həftədə dörd dəfə – bazar ertəsi, cümə axşamı, cümə və şənbə günləri yerinə yetiriləcək.
İranla Azərbaycan arasında Təbriz-Bakı və əks istiqamətdə hava reysləri bundan əvvəl də olub, lakin dayanmışdı. Bu, koronavirus pandemiyası ilə izah edilmişdi.
Bakı-Təbriz, Təbriz-Bakı reysi ilk dəfə 2011-ci il sentyabrın 20-də açılmalı idi. Lakin bu yalnız bir il sonra gerçəkləşmişdi.
İranın Təbriz şəhərinin sakinləri, əsasən, Azərbaycan əsilli insanlardır.
Xatırlatma
Son zamanlar İran-Azərbaycan diplomatik münasibətlərində yaxınlaşma müşahidə olunur. Apreldə İran prezidenti Məsud Peşezkian Azərbaycana səfər edib.
Ancaq öncəki illərdə Bakı və Tehranın bir-birinin sərhədinə yaxın ərazilərdə hərbi təlimlər keçirməsi qarşılıqlı narazılıqlar doğurub. 2023-cü il yanvarında isə Azərbaycanın Tehrandakı səfirliyinə silahlı hücum nəticəsində səfirliyin əməkdaşları arasında ölən və yaralananlar olub. Bundan sonra səfirliyin işçiləri Azərbaycana təxliyə edildi.
Yalnız ötən ilin iyulunda Azərbaycanın İrandakı səfirliyinin fəaliyyəti bərpa edilib.
İran bu ilin mayında bildirib ki, Azərbaycan səfirliyinə qarşı törədilmiş ölümcül hücumda təqsirli bilinən şəxs edam edilib.
Suriyadan daha 13 nəfər Azərbaycana gətirilib
İyunun 3-də Suriya Ərəb Respublikasına getmiş 13 nəfər Azərbaycan vətəndaşının ölkələrinə repatriasiyası (vətənə qayıtma) həyata keçirilib.
Bu barədə iyunun 4-də Azərbaycan Xarici İşlər Nazirliyi (XİN) məlumat yayıb.
Nazirlikdən əlavə edilib ki, İraq və Suriyadan Azərbaycan vətəndaşlarının repatriasiyasına məsul olan müvafiq dövlət qurumlarının nümayəndələri Türkiyəyə ezam edilib, repatriantların ilkin tibbi, psixoloji müayinəsi həyata keçirilib.
Son dörd ildə - 2020-2024-cü illər ərzində Suriyadan Azərbaycana 224 ölkə vətəndaşı repatriasiya olunub. Onlardan 172 nəfəri uşaq və 52 nəfəri qadın olub.
Bu barədə XİN-in 2024-cü ilin yekunlarına dair mətbuat buraxılışında vurğulanıb.
Ötən il dövlət büdcəsindən Suriyada saxlanılan Azərbaycan vətəndaşlarının repatriasiyası üçün 44.7 min manat xərclənib.
2011-ci ildə Suriyada vətəndaş müharibəsi başlayıb. Yalnız ötən ilin sonunda Bəşər Əsədin devrilməsi ilə həmin ölkədə vəziyyət nisbətən sabitləşib.
