Rövşən Qəmbərov
Sən o günü gözdə...
Bir gün balıqlar boğular,
batar dənizdə,
Göy üzü quş saxlamaz,
qanad salar, səpələnər çöllərə,
Ağaclar dik durammaz,
yıxılar meşələr böyrü üstə,
Sən o günü gözdə...
Bir gün daha ərə getməz atalar
qız köçürəndə,
arvad almaz analar
oğul evləndirəndə,
oğullar nəvə əkməz,
nəvə doğmaz gəlinlər,
oğul yox, övlad istər,
Sən o günü gözdə...
Bir gün Gün də çıxmaz,
səhər açılmaz,
kəsilər Yerin işığı,
Allahın da işi çıxar,
unudar bu dünyanı,
Hamının başı qarışar,
kimi lampa gəzər,
kimi cib kəsər,
Onda əl-ələ verib
qaçarıq bu dünyadan biz də,
Sən o günü gözdə...