Fevralın 26-da erməni genosidindən bəhs edən "Vəd" filmi Hollywoodda göstəriləcək. Nümayişin təşkilatçısı məşhur britaniyalı musiqiçi Elton John'dur.
Bu haqda ingiliscə yayımlanan "Asbarez" erməni nəşri məlumat verir. Xəbərə görə Elton John'un yaratdığı "Elton John AIDS Foundation" (Elton John QİÇS-lə mübarizə fondu) hər il Hollywood keçirdiyi ənənəvi axşamda, bu il erməni filmi "Vəd"i göstərəcək. Erməni mənşəlli amerikalı milyarder Kirk Kerkorian'ın maliyyə dəstəyi ilə rejissor Terry George tərəfindən 2016-cı ildə çəkilmiş film şəxsən Elton John tərəfindən təqdim olunacaq.
Buna da bax: Erməni milyarderin çəkdirdiyi "genosid" filmi dünyaya göstərilir
Elton John özü bu haqda medyaya danışarkən deyib ki, Erməni genosidi haqda dostluq etdiyi Manukian ailəsi və California Universitetində çalışan Eric Esraelian'dan öyrənib. "Vəd" filminin adı isə ona keçmişdəki dəhşətləri xatırlamaq və verdiyi sözə əməl etməklə bağlı olduğu üçün QİÇS-lə mübarizəni xatırladıb.
"Vəd" filmi Birinci Dünya müharibəsi ərəfəsində Osmanlı İmperiyasına səfər edən amerikalı fotojurnalist Christ, doğma kəndindən İstanbula tibb təhsili almağa gələn Michel adlı erməni gənc və bu iki gəncin Paristdə rəssamlıq təhsili alıb İstanbula gəlmiş erməni qız Annaya olan sevgisindən bəhs edir. Filmin arxa fonunda isə Osmanlı İmperiyasında ermənilərə qarşı törədilən qırğınlar təsvir olunur.
