Azərbaycan xəbərləri
Xəzərdə zəlzələ
Noyabrın 30-u səhər saat 4.41 radələrində Xəzər dənizində 4.3 bal gücündə zəlzələ baş verib.
Respublika Seysmoloji Xidmət Mərkəzinin xəbərinə görə, yeraltı təkanın ocağı 60 kilometr dərinlikdə yerləşib.
Zəlzələ hiss olunmayıb.
Bütün xəbərləri izləyin
28 May-Müstəqillik Günü
Cümhuriyyətin yaradılmasının 104-cü ilində Azərbaycandakı siyasi və ictimai təşkilat nümayəndələri, o cümlədən ayrı-ayrı vətəndaşlar Rəsulzadənin Novxanıdakı abidəsini ziyarət ediblər
Bu gün, mayın 28-i Azərbaycan Xalq Cümhuriyyətinin (XC) yaranmasından 104 il keçir. Müstəqillik Günü ilə bağlı bəzi siyasi partiyaların təmsilçiləri, ictimai fəallar Məhəmməd Əmin Rəsulzadənin doğulduğu Novxanı kəndindəki abidəsini ziyarət ediblər.
Ötən ildən fərqli olaraq bu dəfə pandemiya qadağalarının aradan qaldırlması səbəbindən abidənin ziyarətində insanların sayınaa hər hansı məhdudiyyətlər tətbiq olunmayıb. (Ötən il koronavirus pandemiyasi ilə bağlı elan edilən karantin üzündən ziyarətçi qruplar beş nəfərdən çox olmayıb. AR.)
İlk olaraq M.Ə. Rəsulzadənin abidəsini Ağ Partiya üzvləri ziyarət ediblər. Partiya sədri Tural Abbaslı Cümhuriyyət ənənələrinin sözdə yox, əməldə davamçıları olduqlarını deyib.
Azərbaycan Demokratiya və Rifah Hərəkatının nümayəndəsi Rüfət Məmmədov AXC-nin yaranmasın necə bir çətin dövrə təsadüf etdiyini xatırladıb. "...104 il bundan öncə Tbilisidə Cümhuriyyət elan olundu, ... o, Cümhuriyyət ki, hələ onun arxasında xalq belə formalaşmamışdı. Kimlər onu formalaşdırdı, başqa milli liderimiz M.Ə. Rəsulzadə olmaqla sayları bir-neçə onluğu təşkil edən kişilər..."
Gün ərzində M.Ə. Rəsulzadənin abidəsini Müsavat partiyası, Milli Şuranın rəhbər və üzvləri ziyarət ediblər.
Daha sonra Rəsulzadənin abidəsini Milli Şuraya daxil olan siyasi partiya və birliklər ziyarət edib. Abidəyə doğru hərəkət edənlər "Rəsulzadə", "Rəsulzadə" və "Azadlıq" şüarları səsləndiriblər.
Amma bu dəfə abidə önünüdə çıxış edən siyasi partiya nümayəndələrinin, ictimai fəlların səsgücləndiricilərdən istifadəsinə icazə verilməyib.
104 il əvvəl Tbilisidə elan olunan Azərbaycan Xalq Cümhuriyyəti (AXC) 23 ay fəaliyyət göstərə bilib və 1920-ci il aprelin 27-də Rusiyanın silahlı müdaxiləsi ilə süqut edib. Cümhuriyyətin bir çox qurucuları işğaldan sonra Azərbaycandan mühacirət etmək məcburiyyətində qalıblar.
1991-ci il noyabrın 18-də Azərbaycan öz müstəqilliyini yenidən bəyan edib. Həmin vaxt Azərbaycan Respublikası Xalq Cümhuriyyətinin varisi elan edilib.
1992-ci ildən Azərbaycanda mayın 28-i Respublika Günü- (Müstəqillik Günü-Milli Məclisin ötən il oktyabrın 15-də keçirilən plenar iclasında “Müstəqillik Günü haqqında” yeni qanun layihəsi qəbul edilib. Qanunun qəbul edilməsi ilə 28 May - Respublika Gününün və 18 Oktyabr - Dövlət Müstəqilliyi Gününün adı dəyişdirilib. Mayın 28-i Müstəqillik Günü, oktyabrın 18-i isə Müstəqilliyin Bərpası Günü elan edilib.)kimi qeyd edilir.
Ağdamda hərbçi minaya düşüb
Mayın 27-də səhər saatlarında Daxili Qoşunların hərbi qulluqçusu 1997-ci il təvəllüdlü Seyidağa Ömərovun Ağdam rayonunun işğaldan azad edilmiş ərazisində xidmətdə olarkən minaya düşdüyü və partlayış nəticəsində ağır bədən xəsarəti aldığı bildirilir.
Bu barədə Daxili İşlər Nazirliyinin Mətbuat Xidmətindən məlumat verilib. Məlumata görə, o, dərhal xəstəxanaya yerləşdirilib, sağ ayağının dizdən aşağı ətrafı amputasiyası edilib: "Hazırda vəziyyəti stabildir".
Xəritə mübahisəsi
Azərbaycan rəsmiləri deyirlər ki, 2020-ci il noyabrın 10-da üçtərəfli bəyanatın imzalanmasından sonra işğaldan azad edilən ərazilərdə 200-dən çox şəxs minaya düşüb. Onların 30-dan çoxunun həlak olduğu bildirilir.
Üçtərəfli bəyanatın imzalanmasından bir müddət sonra, Azərbaycan rəsmiləri Ermənistan tərəfini minalanmış ərazilərin xəritələrini onlara verməməkdə günahlandırırdı. Amma bir müddət əvvəl Azərbaycanda tutulan Ermənistan hərbçilərindən bir neçə qrupunun təhvil verilməsi əvəzi azad olunan bir sıra rayonlara aid mina xəritələrinin geri alındığı açıqlanmışdı. Sonradan da prezident İlham Əliyev həmin xəritələrin reallığı böyük ölçüdə əks etdirməməsi ilə bağlı narazılığını ifadə etdi.
Lakin buna cavab olaraq Ermənistanın baş naziri Nikol Paşinyan deyib ki, onlar xəritələrin "yaxşısını siyirmədə saxlayıb, pis keyfiyyətdə olanı verməyiblər".
Xatırlatma
2020-ci ildə İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf yeddi rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib.
Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik yeddi rayonu işğal edilmişdi.
Bloqerin həbsdə işgəncəyə məruz qaldığı deyilir
Mayın 20-də həbs olunan bloqer Rəşad Ramazanovun işgəncəyə məruz qaldığı bildirilir. Bloqerin yaxınları deyir ki, bu barədə onun özü mayın 27-də həbs qətimkan tədbirindən verilən apellyasiya şikayətinə baxılan zaman söyləyib. R.Ramazanov bildirib ki, o, saxlanan zamanı təzyiqə məruz qalıb: "Daha sonra Rəşad dedi ki, o, Sabunçu rayon 14-cü polis bölməsinə aparılıb, orada onun cibinə narkotik qoyulub və etirafedici ifadələrə qol çəkməsi üçün ona işgəncələr verilib".
Vəkil Elçin Sadıqov isə bildirib ki, R.Ramazanovun həbsindən verdiyi apellyasiya şikayəti təmin olunmayıb: "Rəşad Ramazanovun hər iki ayağında, başında izlər var. Ayaqlarındakı yaralar açıq (qanaxması olan) və qapalı (göyümtül qançır) izləridir".
Vəkil məsələ ilə bağlı prokurorluğa müraciət edəcəyini deyib.
DİN təkzib edir
Daxili İşlər Nazirliyi Mətbuat xidmətinin şöbə rəisi Elşad Hacıyev isə "Turan"a deyib ki, məhkəmə prosesi zamanı R.Ramazanov tərəfindən səsləndirilən iddialar əsassızdır: "Həmin iddialarla bağlı səsləndirilən fikirlər gözləniləndir. Onun polis orqanında təzyiqə məruz qalması ilə bağlı aidiyyət üzrə müraciət etmək hüququ var".
Bloqer R.Ramazanov mayın 20-də həbs olunub. Ona qarşı Cinayət Məcəlləsinin 234.4.3-cü maddəsi ilə ittiham irəli sürülüb. Sabunçu rayon Məhkəməsi R.Ramazanov barəsində 4 aylıq həbs-qətimkan tədbiri seçib.
Bu, onun ikinci həbsidir. R.Ramazanov birinci dəfə 2013-cü ilin mayında həbs olunub və daha sonra külli miqdarda narkotik vasitələrin qanunsuz dövriyyəsi ittihamı ilə 9 il azadlıqdan məhrum edilib. Yerli hüquq-müdafiə təşkilatları onun həbsinin sosial şəbəkələrdə hakimiyyəti tənqid etməsi ilə əlaqələndiriblər və onu siyasi məhbus kimi tanıyıblar. O, həbsindən əvvəl həm də dini mövzuda yazıları və tənqidləri ilə yadda qalıb. Beynəlxalq hüquq müdafiə təşkilatı "Amnesty International" R.Ramazanovu vicdan məhbusu kimi tanıyıb.
2019-cu ilin martında R.Ramazanov əfv fərmanı ilə vaxtından əvvəl azad edilib.
Amma rəsmilər ölkə həbsxanalarında siyasi məhbusların olması fikrini qəbul etmirlər. Onlar deyirlər ki, siyasi məhbus sayılan şəxslər sırf törətmiş olduqları əmələ görə məsuliyyətə alınıblar.
ABŞ prezidenti Azərbaycana yeni səfirin namizədliyini irəli sürüb
Amerika Birləşmiş Ştatlarının (ABŞ) Prezident Co Bayden mayın 25-də Mark Libbinin bu ölkənin Azərbaycandakı səfiri postuna namizədliyini irəli sürüb. Onun namizədliyinə Senatda baxılacaq.
Bu ilin iyulunda ABŞ-ın Azərbaycandakı səfiri Li Litzenberqerin səlahiyyət müddəti başa çatır.
Mark Libbi kimdir
M.Libbi Vaşinqtonda yerləşən Milli Hərbi Kollecində Dövlət Departamentinin müşaviridir. O, 2018-ci ilin iyulundan 2021-ci ilin iyununa kimi ABŞ-ın Brüsseldəki missiyasında rəhbər müavini və Avropa İttifaqındakı müvəqqəti işlər vəkili vəzifəsində çalışıb. ABŞ-ın Varşava, Nassau, Nikosiya və Bağdaddakı diplomatik missiyalarında siyasi məsləhətçi kimi fəaliyyət göstərib.
Sələfi onun haqqında nə deyir
"Mən şəxsən tanımasam da, onun böyük təcrübəsi var", - ABŞ-ın Azərbaycanda keçmiş səfiri (1994-1997) Riçard Kozlariç "Turan"ın Vaşinqton müxbirinə M.Libbinin namizədliyinin irəli sürülməsini şərh edərkən bildirib.
"Yaxşı ki, o, ABŞ Diplomatiya Xidmətinin kadr əməkdaşıdır", - Kozlariç əlavə edib.
"Mənim ona yeganə məsləhətim ABŞ-ı Azərbaycanda təmsil etməkdən zövq almaqdır", - sabiq səfir vurğulayıb.
Səlim Müslümov buraxılıb
Sabiq əmək və əhalinin sosial müdafiəsi naziri Səlim Müslümov barəsində seçilmiş həbs-qətimkan tədbirinin dəyişdirildiyi bildirilir.
Səbail rayon Məhkəməsindən "Turan"a verilən məlumata görə, o, mayın 26-da ev dustaqlığına buraxılıb. Məlumata görə, sabiq nazirin səhhəti səbəbi ilə ev dustaqlığına buraxılması ilə bağlı müraciətə baxılıb, məhkəmə müraciəti təmin edib.
S.Müslümovu ötən ilin fevralında Dövlət Təhlükəsizliyi Xidmətinin əməkdaşları həbs etmişdi. O, Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü (təkrar külli miqdarda rüşvət alma) maddələri ilə ittiham edilərək barəsində məhkəmənin qərarı ilə həbs-qətimkan tədbiri seçilmişdi. Bu maddələrlə təqsirləndirilən şəxsə 12 ilə qədər həbs cəzası verilə bilər. Hələlik, bu ittihamlara onun özündən və ya vəkilindən ayrılıqda münasibət almaq mümkün olmayıb.
Xatırlatma
S.Müslümov 2013–2018-ci illərdə əmək və əhalinin sosial müdafiəsi naziri postunda olub. Ondan əvvəl isə təqribən 11 il Dövlət Sosial Müdafiə Fonduna rəhbərlik edib.
Hələ ötən əsrin 90-cı illərində "Kapital Bank"ın Səbail filialından milyonların mənimsənilməsi ilə bağlı aparılan cinayət işinə dair mətbuatda gedən yazılarda onun da adı hallanmışdı. (Onda S.Müslümovun Maliyyə Nazirliyində çalışdığı qeyd edilirdi). Amma sonradan o, daha məsul vəzifələrə irəli çəkilmişdi. S.Müslümov buna qədər ona qarşı səslənən ittihamları qəbul etməyib.
Nazir: 'Nəzərdə tutulduğundan daha yüksək inflyasiya oldu'
Mayın 25-də Milli Məclisin İqtisadi siyasət, sənaye və sahibkarlıq komitəsinin iclasında "Azərbaycan Respublikasının 2021-ci il dövlət büdcəsinin icrası haqqında" Qanun layihəsi müzakirə edilib. İclasda çıxış edən Maliyyə naziri Samir Şərifov deyib ki, ötən il neftin qiyməti dövlət büdcəsində nəzərdə tutulanla müqayisədə 70 faizdən artıq yüksək olub, bu da icmal büdcənin kəsrsiz icra olunmasına münbit şərait yaradıb. Onun sözlərinə görə, 2021-ci ildə Azərbaycanın iqtisadi inkişafına mənfi təsirlər də var idi: "Bu təsirlər, əsasən, xarici faktorlarla bağlı idi. Söhbət inflyasiyanın artmasından gedir. Bizim ölkəmizdə də nəzərdə tutulduğundan daha yüksək inflyasiya səviyyəsi oldu".
Nazir qeyd edib ki, inflyasiyanın artmasının əsas səbəblərindən biri də ərzaq məhsullarının qiymətinin dünya səviyyəsində artmasıdır: "Cari ildə də proses, təəssüf ki, davam edir və hətta daha da kəskinləşib".
Dövlət Statistika Komitəsinin məlumatına görə, son bir ildə Azərbaycanda inflyasiya 12, ərzaq inflyasiyası isə 17 faizdən yüksək olub. Halbuki, 2021-ci ilin əvvəlində rəsmilər Azərbaycanda həmin il inflyasiyanın 4 faiz diapazonunda formalaşacağını gözlədiklərini açıqlamışdılar.
Azərbaycanın 2021-ci il dövlət büdcəsinin gəlirləri 25 milyard 427 milyon manat, xərcləri 28 milyard 543 milyon manat təsdiq edilib. Neftin bir bareli orada 40 dollar götürülmüşdü. Hazırda Azərbaycan neftinin bir bareli 122 dollardan yüksək satılır.
Azərbaycanın 2022-ci il dövlət büdcəsinin gəlirləri isə 26 milyard 816 milyon manat, xərcləri 29 milyard 879 milyon manat proqnozlaşdırılır. Bu il isə neftin bir bareli büdcədə 50 dollar götürülüb.
Nazirliyin adı yenə dəyişdi və…
Mayın 24-də prezident Əliyev habelə Cavid Qəmbər oğlu Qurbanovu “Azərbaycan Dəmir Yolları” Qapalı Səhmdar Cəmiyyətinin sədri vəzifəsindən azad edib
Bugün, mayın 24-də prezident İlham Əliyev “Azərbaycan Respublikasında nəqliyyat, rabitə və yüksək texnologiyalar sahəsində idarəetmənin təkmilləşdirilməsi ilə bağlı bəzi tədbirlər haqqında” özünün 4 il əvvəl, 12 yanvar tarixli fərmanına dəyişiklik edib.
Dəyişikliyə əsasən nazirliyin adında “nəqliyyat, rabitə və yüksək texnologiyalar” sözləri “rəqəmsal inkişaf və nəqliyyat” sözləri ilə əvəz edilir.
Bu qurum 5 il əvvəl Nəqliyyat Nazirliyinin Rabitə və Yüksək Texnologiyalr Nazirliyinə birləşməsi nəticəsində yaradılıb. Ondan əvvəl də nazirliyin adında dəyişiklik edilib.
Mayın 24-də prezident Əliyev habelə Cavid Qəmbər oğlu Qurbanovu “Azərbaycan Dəmir Yolları” Qapalı Səhmdar Cəmiyyətinin sədri vəzifəsindən azad edib.
Cavid Qurbanov 2015-ci ildən bu vəzifəni tuturdu.
O prezidentin başqa bir sərəncamı ilə Azərbaycan rəqəmsal inkişaf və nəqliyyat nazirinin müavini təyin edilib.
Prezidentin mayın 24-də imzaladığı başqa sərəncamlarla daha iki şəxs də sözü gedən qurumda nazir müavini postuna təyin ediliblər.
Yeni fərmanla nəqliyyat, rabitə və yüksək texnologiyalar nazirinin müavinlərinin sayı artırılıb.
Azərbaycan və Ermənistan baş nazirlərinin müavinləri sərhəddə görüşüb
Bugün, mayın 24-də Azərbaycan baş nazirinin müavini Şahin Mustafayev və Ermənistan baş nazirinin müavini Mher Qriqoryan görüşüb.
Azərbaycan Xarici İşlər Nazirliyinin (XİN) məlumatına görə, bu, Ermənistan-Azərbaycan dövlətlərarası sərhədində iki ölkə arasında sərhədin delimitasiyası üzrə Komissiya formatında ilk görüş olub:
“Tərəflər, delimitasiya və digər məsələlər üzrə Komissiya çərçivəsində işləməyə hazır olduqlarını təsdiq ediblər. Komissiyanın birgə fəaliyyətinin təşkilati və prosedur məsələləri müzakirə edilib.”
Məlumata görə, tərəflər, dövlətlərarası sərhəddə görüşlərlə yanaşı, Komissiyanın növbəti iclaslarının fərqli yerlərdə keçirilməsinin məqsədəuyğunluğu barədə razılığa gəliblər.
Bildirildiyinə görə, ikinci görüşün Moskvada, üçüncü görüşün isə Brüsseldə keçirilməsi barədə razılıq əldə edilib.
Mayın 22-də Avropa İttifaqı Şurasının prezidenti Şarl Mişelin vasitəçiliyi ilə Brüsseldə Azərbaycan prezidenti İlham Əliyev Ermənistan baş naziri Nikol Paşinyanla görüşmüşdü.
Tərəflər sərhədlərin demarkasiyası komissiyasının işə başlaması üzrə razılığa gəlmişdilər.
Həmin görüşdən bir gün sonra – mayın 23-də iki ölkə liderləri sərhədlə bağlı komissiya yaradaraq onun tərkibini təsdiqləyiblər. Elə həmin gün prezident Əliyev türkiyəli həmkarı Recep Tayyib Erdoğana telefon zəngində deyib ki, Brüssel görüşündə “Zəngəzur dəhlizinin (Ermənistanın Sünik bölgəsindən keçməsinin nəzərdə tutulduğu bildirilir) açılması, o cümlədən həm dəmir yolu, həm də avtomobil yolunun çəkilməsi məsələləri ilə də bağlı tərəflər razılığa gəliblər”.
Amma öz növbəsində Ermənistan Təhlükəsizlik Şurasının katibi Armen Qriqoryan mayın 24-də “Armenpress” agentliyinin sualına cavabında bir daha ölkəsinin bu məsələdə mövqeyinin dəyişmədiyini deyib. Qriqoryanın sözlərinə görə, Ermənistan ərazisindən dəhliz məntiqi ilə yol, yaxud nəqliyyat marşrutu ola bilməz.
“Brüsseldə əldə olunan bütün razılaşmalar regional kommunikasiyaların açılmasıyla əlaqədardır...”, – Qriqoryan deyib.
Azərbaycan 2020-ci ildə, 44 günlük müharibə nəticəsində Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Laçın dəhlizinə (Azərbaycanın Laçın rayonundan keçir) və Qarabağdakı təmas xəttində Rusiya hərbçiləri yerləşdirilib.
Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.
'Tərtər işi'nə görə narazılıqlar davam edir
Mayın 24-də "Tərtər işi" çərçivəsində bəzi həbs olunan şəxslərin yaxınları Baş Prokurorluğun inzibati binasının yaxınlığında etiraz aksiyası keçiriblər. Onlar işin ədalətli araşdırılmasını, yaxınlarının azadlığa buraxılmasını və günahkarların cəzalandırılmasını tələb ediblər.
Aksiya iştirakçıları vurğulayıblar ki, iş üzrə istintaq yenilənsə də, prosesin əvvəlində baş verən özbaşınalıqlarda əsl günahkarlar hələ də həbs edilməyib. Onların sözlərinə görə, yeni həbs edilənlər elə əvvəldən işgəncələrlə bağlı haqlarında cinayət işi açılanlardır.
2017-ci ildə iş üzrə həbs olunmuş hərbiçi Seymur Həsənovun anası: "Gəlirik, bizə bir söz deyilir, digər tərəfdə isə ayrı söz eşidirik. Biz istintaq qrupundan tələb edirik ki, bu işləri düzgün, qanuni aparsın, görək ortalığa nə çıxır. Sübut etsinlər balalarımızın günahı var, ya yox. Bircə sübutu çıxarsınlar ortalığa, biz də çəkilib durarıq qıraqda, deyərik qoy cəza çəksin".
Aksiya iştirakçısı Əlibəy Əhmədov da iddia edir ki, istintaqın əvvəlində əsas həbs olunanlar ölkənin ərazi bütövlüyü uğrunda vuruşan hərbçilər olub: "Həmin uşaqları siyahıya alıblar, o uşaqlar siyahı ilə tutulub".
Aksiya iştirakçılarından altı nəfər Baş Prokurorluğa qəbula keçib.
Hələlik, aksiyada səslənən fikirlərə Baş Prokurorluqdan münasibət almaq mümkün olmayıb. Amma Baş Prokurorluq bir müddət öncə açıqlama yaymışdı ki, Tərtər hadisələri ilə bağlı cinayət işləri üzrə icraat ötən ilin dekabrında təzələnib, intensiv istintaq hərəkətləri aparılmaqdadır. Açıqlamada vurğulandığına görə, artıq yüzlərcə hərbi qulluqçu zərərçəkmiş kimi müəyyən edilib, bir çox işlər yenidən araşdırılır. Üstəlik, qurum işgəncələrlə bağlı həbs edilənlərin olduğunu da bildirir.
Xatırlatma
2017-ci il mayın 7-də Azərbaycanın hüquq-mühafizə orqanları bildirdilər ki, Ermənistan xüsusi xidmət orqanlarının xeyrinə casusluqda günahlandırılan bir qrup hərbi qulluqçu və mülki şəxs həbs edilib. Sonradan bir sıra media orqanları bu iş üzrə saxlanan bəzi şəxslərin dindirilmədə işgəncə nəticəsində ölməsi ilə bağlı məlumatlar yaydı. Baş Prokurorluq da həmin iddiaların yer aldığı bəzi sayt rəhbərlərini çağıraraq onlara rəsmi olmayan bu məlumatları yaydıqlarına görə xəbərdarlıq verdi.
Müdafiə tərəfinin açıqlamalarına görə, tutulanların əksəriyyəti özlərini təqsirli bilməyib və həbs olunarkən ağır işgəncələrə məruz qaldıqlarını, bu üzdən etiraf xarakterli ifadələrə imza atdıqlarını iddia ediblər.
Saxlanan hərbi qulluqçuların yaxınları deyirdi ki, sonradan işgəncə verilməsinə görə də mühakimə edilənlər olub. Üstəlik, onların vurğulamasına görə, işgəncə nəticəsində ölənlərin (Hüquq müdafiəçiləri onların sayının 10-dan çox olduğunu bildirirlər. Amma bu, rəsmən təsdiqlənməyib) bəzilərinə də sonradan bəraət verilib.
Bayramov və Lavrov telefonda danışıblar
Bu gün, mayın 23-də Azərbaycan xarici işlər naziri Ceyhun Bayramov və Rusiya Federasiyasının xarici işlər naziri Sergey Lavrov arasında telefon danışığı olub.
Azərbaycan Xarici İşlər Nazirliyinin məlumatına görə, telefon danışığında nazirlər bölgədə vəziyyət, üçtərəfli bəyanatların icrası ilə bağlı məsələlər, o cümlədən bütün kommunikasiya xətlərinin açılması, Azərbaycan və Ermənistan arasında dövlət sərhədinin delimitasiyası üzrə fikir mübadiləsi aparıblar.
“Tərəflər, həmçinin ikitərəfli gündəliyin aktual mövzuları və qarşılıqlı maraq doğuran digər məsələləri müzakirə ediblər” - nazirlik qeyd edir.
Bir gün əvvəl, mayın 22-də isə Avropa İttifaqı Şurasının Prezidenti Şarl Mişelin vasitəçiliyi ilə Brüsseldə Azərbaycan Prezidenti İlham Əliyev və Ermənistan Baş naziri Nikol Paşinyan arasında görüş olmuşdu.
Görüşdə iki ölkə arsında sülh sazişi, sərhədlərin müəyyən edilməsi və onların kommunikasiya infrastrukturu vasitəsilə beynəlxalq nəqliyyat daşımalarını tənzimləməsi kimi məsələlər müzakirə edilmişdi.
Bu formatda bundan əvvəl, aprelin 6-da keçirilən görüşdə də tərəflər arasında sülh sazişinin hazırlanması üçün işin başlanması, sərhədlərin delimitasiyası üzrə birgə komissiyanın yaradılması üzrə razılıq əldə olunmuşdu.
Amma İkinci Qarabağ Müharibəsindən sonra iki ölkə arasında aparılan danışıqlara əsasən Rusiya vasitəşilik edib.
2020-ci ildə 44 günlük İkinci Qarabağ Müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib.
Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib.
Ötən il də tərəflər arasında nəqliyyat və iqtisadi əlaqələrin bərpa edilməsi ilə bağlı daha iki bəyanat imzalanmışdı.
Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.
Bloqqer Rəşad Ramazanov yenidən həbs edilib
Bloger Rəşad Ramazanov 4 aylıq həbs edilib. Bu barədə "Turan" İnformasiya Agentliyi blogerin həyat yoldaşı Könül Ramazanovaya istinadla məlumat yayıb. Məlumata görə, Rəşad Ramazanov külli miqdarda narkotik vasitələrin qanunsuz dövriyyəsində ittiham olunur.
Həyat yoldaşının dediyinə görə, o, Rəşad Ramazova qarşı irəli sürülən ittiham və həbsindən dövlət hesabına təyin olunmuş vəkildən xəbər tutub.
Könül Ramazanova, yoldaşına qarşı irəli sürülən ittihamı uydurma hesab edir.
Hüquq müdafiəçisi Rüfət Səfərov da ittihamın doğruluğuna şübhə ilə yanaşıb.
O, Facebook səhifəsində Ramazanovun artıq bir dəfə - 2013-2019-cu illərdə siyasi məhbus həyatınl yaşadığını xatırladıb.
Hüquq müdafiəçisi əmindir ki, Ramazanov sosial şəbəkələrdə hakimiyyəti kəskin tənqid etdiyinə görə təqib olunur.
“Dəqiqləşdirməyə çalışıram, amma böyük ehtimal ki, əvvəl olduğu kimi, bu dəfə də cibinə narkotik maddəni yerləşdirib, sonra “aşkara çıxarıblar”, - Səfərov yazıb.
Daxili İşlər Nazirliyinin mətbuat xidmətindən məsələ ilə bağlı şərh almaq mümkün olmayıb.
Bloqqerin ittiham olunduğu CM-nin 234.4.3-cü maddəsi 5 ildən 12 ilədək azadlıqdan məhrumetmə cəzası nəzərdə tutur.
Rəşad Ramazanov birinci dəfə 2013-cü ilin mayında həbs olunub və daha sonra külli miqdarda narkotik vasitələrin qanunsuz dövriyyəsi ittihamı ilə 9 il müddətinə azadlıqdan məhrum edilib. Yerli hüquq müdafiə təşkilatları onun həbsinin əsl səbəbini sosial şəbəkələrdə hakimiyyəti tənqid etməsilə əlaqələndiriblər və onu siyasi məhbus kimi tanıyıblar. O, həbsindən əvvəl həm də dini mövzuda yazıları və tənqidləri ilə yadda qalıb.
Beynəlxalq hüquq müdafiə təşkilatı Amnesty International Rəşad Ramazanovu “vicdan məhbusu” kimi tanıyıb.
2019-cu ilin martında Rəşad Ramazanov əfv fərmanı ilə vaxtından əvvəl azad edilib.
Azərbaycan ərazilərinin ətaşə tutulduğunu, Ermənistan isə sakitlik olduğunu deyir
"Ermənistan silahlı qüvvələrinin bölmələri mayın 20-si axşam saatlarında dövlət sərhədinin Basarkeçər (Vardenis)rayonunun Aşağı Şorca (Nerkin Şorja)yaşayış məntəqəsi istiqamətində yerləşən mövqelərindən Ordumuzun Kəlbəcər rayonunun Yellicə yaşayış məntəqəsi istiqamətində yerləşən mövqelərini atəşə tutub".
Mayın 21-də Azərbaycan Müdafiə Nazirliyinin yaydığı məlumatda belə deyilir.
Nazirlik əlavə edir ki, Azərbaycan Ordusunun bölmələri tərəfindən adekvat cavab tədbirləri görülüb.
Ermənistanın Müdafiə Nazirliyi isə bildirir ki, məlumat doğru deyil və sərhəddə nisbi sakitlikdir.
İran sərhədçilərinin Azərbaycan vətəndaşını öldürdüyü bildirilir
İran sərhədçilərinin sərhədi pozmaq istəyən Azərbaycan vətəndaşını güllələyərək öldürdüyü bildirilir.
Dövlət Sərhəd Xidmətinin məlumatına görə, mayın 16-da İran sərhəd nümayəndəliyi xətti ilə Azərbaycan vətəndaşı Mircavad Musayevin İrandan Azərbaycan istiqamətində dövlət sərhədini pozmaq istərkən atəşlə öldürülməsi barədə məlumat daxil olub: "Mayın 18-də Mircavad Musayevin cənazəsi prokurorluq orqanlarının nümayəndəsinin iştirakı ilə rəsmi qaydada qəbul edilərək ailə üzvlərinə təhvil verilib. Baş vermiş hadisənin araşdırılması və nəticələri barədə məlumat verilməsi üçün İran tərəfinə müvafiq sorğu göndərilib".
Rəsmi açıqlamada M.Musayevin hansı səbəbdən sərhədi qanunsuz keçməyə cəhd etməsi göstərilmir. Onun ailə üzvlərindən, hələlik, olaya münasibət öyrənmək mümkün olmayıb.
Məsələyə İranın Azərbaycandakı səfirliyindən də münasibət almaq cəhdləri nəticə verməyib.
Hərbçi valideynləri Prezident Administrasiyasına şikayətə gəliblər
Bu gün, mayın 19-da müxtəlif vaxtlarda naməlum şəraitdə həlak olduqları bildirilən bir neçə hərbçinin valideynləri Prezident Administrasiyasının qarşısında etiraz aksiyası keçirməyə cəhd edib. Onlar vəfat etmiş övladlarına status verilməsini tələb edirlər.
Valideynlərinin sözlərinə görə, illərdir onlara bununla bağlı söz verilsə də, məsələ həll edilmir. "Prezident Administrasiyasında da qəbulda olmuşuq, deputatların da. Söz verirlər, amma ortada bir nəticə yoxdur. Ad qoyublar ki, övladlarımız hərbi hissədə naməlum şəraitdə həlak olub, şəhidlik statusunu da vermirlər", -onlardan biri vurğulayıb.
Bu zaman prosesi işıqlandıran reportyorlar Fatimə Mövlamlını və Sevinc Sadıqovanı hüquq-mühafizə əməkdaşları saxlasalar da, sonra sərbəst buraxılıblar.
Aksiya iştirakçıları qəbula aparılıb.
Məsələ ilə bağlı, hələlik, Daxili İşlər Nazirliyi, Xüsusi Dövlət Mühafizə Xidməti və başqa rəsmi qurumlarla danışmaq mümkün olmayıb.
Salyanda 'Narkotikə yox' şüarı ilə yürüş keçirilib
Mayın 19-da Salyan rayon mərkəzində "Narkotikə yox" şüarı ilə yürüş keçirilib.
Bir qrup yerli sakin Salyan şəhərində son zamanlar narkotik vasitələr satanların sayının çoxaldığını iddia edərək rayon icra hakimiyyətinə qədər yürüş keçirməyə cəhd göstərib. Onlar bildirib ki, aidiyyəti orqanlar narkotiklə mübarizə aparmalıdır. "Uşaqlarımız niyə məhv olsunlar?! Rayonda narkomaniya çoxalıb. Açıq-aşkar alver gedir", - aksiyada vurğulanıb.
Aksiya iştirakçıların qarşısına çıxan Salyan Rayon Polis Şöbəsinin rəisi Nəzər Əsgərov bildirib ki, narkomaniya ilə mübarizə ilə bağlı dövlət səviyyəsində bütün tədbirlər görülür. O əlavə edib ki, əgər hər hansı konkret məlumat varsa, onları araşdırmağa hazırdırlar.
Rəis habelə qeyd edib ki, aksiya keçirmək üçün rəsmi müraciət olunmalıdır: "Sizin də hər hansı rəsmi müraciətiniz yoxdur".
Bundan sonra aksiya iştirakçıları polis şöbəsinə qəbula gediblər. Onlar aksiyanı baş tutmuş elan ediblər.
Rəsulzadə haqqında meyxana oxuyana narkotik ittihami ilə 7 il yarım həbs...
Mayın 18-də narkotik vasitələrin qanunsuz dövriyyəsində ittiham olunan Cavid Babaşov (Sumqayıtlı) Sumqayıt Ağır Cinayətlər Məhkəməsinin qərarı ilə 7 il 6 ay müddətinə azadlıqdan məhrum edilib.
2021-ci ilin may ayında həbs olunan və Azərbaycan Cümhuriyyətinin qurucularından Məhəmməd Əmin Rəsulzadə haqqında meyxananın müəllifi kimi tanınan Cavid Babaşov özünü təqsirli bilməmişdi.
Ailə üzvləri bildirmişdi ki, meyxanaçının ara-sıra narkotikdən istifadə etdiyi vaxtlar olub, amma narkotik satışının ona aidiyyəti yoxdur.
Rəsmi məlumata görə, C.Babaşovun üzərinə baxış keçirilən zaman 206 qram narkotik vasitə heroin və elektron tərəzi aşkar edilib.
Ona qarşı Cinayət Məcəlləsinin 234.4.3 (satış məqsədilə külli miqdarda narkotik əldə etmə, daşıma, saxlama) maddəsi ilə ittiham irəli sürülmüşdü.
Sosial şəbəkələrdə Babaşovun Rəsulzadə haqqında 2016-cı ildə oxuduğu meyxanasına görə, şərlənərək cəzalandırılması barədə fikirlər yayılmışdı.
Həmin fikirlərin müəllifləri vurğulayırdılar ki, mövcud hakimiyyətin Rəsulzadəyə münasibəti mənfidir.Amma Daxili İşlər Nazirliyi (DİN) isə bu iddiaları təkzib etmişdi.
AZAL zərərlə işləyib
QSC-nin xalis zərəri 3 faiz azalaraq 76,4 milyon manat olub
“Azərbaycan Hava Yolları” (AZAL) qapalı səhmdar cəmiyyəti (QSC) 2020-ci il üzrə maliyyə hesabatını açıqlayıb.
QSC-nin xalis zərəri 3 faiz azalaraq 76,4 milyon manat olub.
2019-cu ildə şirkət 78,7 milyon manat xalis zərər açıqlamışdı. Ümumilikdə, AZAL-ın yığılmış zərəri 1,7 milyard manata çatıb.
2020-ci ildə COVID-19 pandemiyası ilə əlaqədar onun birbaşa gəlirləri 1 milyard 8,4 min manatdan (593,1 milyon dollar) 335,2 milyon manata (197,1 milyon dollar) qədər azalıb.
Pandemiya ilə bağlı itkiləri kompensasiya etmək üçün hökumət həmin il aviaşirkətə ümumilikdə 232 milyon manatdan çox subsidiya ödəyib.
Bununla yanaşı, 2020-ci il üçün AZAL-ın əməliyyat xərcləri 540 milyon manatı (317,6 milyon dollar) ötüb.
QSC-nin aktivləri 5 faiz azalaraq 1,978 milyard manata, öhdəlikləri də 1,5 faiz azalaraq 2,757 milyard manata enib.
Hesabatda bildirilir ki, 2021-ci ilin 10 ayı ərzində isə AZAL-ın gəlirləri 383,2 milyon manat təşkil edib.
İqtisadçı rəyi
İqtisadçı Natiq Cəfərli AZAL-ın zərərlə işləməsini qeyri-effektiv idarəetmə ilə əlaqələdirib.
O, deyib ki, bu şirkət Azərbaycanda inhisarçıdır, bilet qiymətləri də həddən ziyadə yüksəkdir.
“Halbuki 2020-ci ildə AZAL hökumətdən COVİD-19 ilə əlaqədar olaraq 232 milyon 82 min manat subsidiya da alıb.”- deyə o vurğulayıb.
Azərbaycan və Litva prezidentləri görüşüb
Mayın 18-də Azərbaycan Prezidenti İlham Əliyevin Litva Prezidenti Gitanas Nauseda ilə görüşü olub.
AZƏRTAC- ın xəbərinə görə, İ.Əliyev deyib ki, bu səfər çərçivəsində bir sıra tədbirlər baş tutacaq, onların arasında biznes-forum da var: "İşgüzar dairələrimiz arasında praktiki fəaliyyətlə bağlı qarşılıqlı böyük maraq var".
Onun vurğulamasına görə, siyasi dialoq və regional vəziyyət də müzakirə edəcəkləri məsələlər sırasındadır.
G.Nauseda öz növbəsində deyib ki, regional təhlükəsizlik və Avropa İttifaqı ilə münasibətlər mühüm əhəmiyyət kəsb edən məsələlər sırasındadır: "Litva hər zaman Qafqaz ölkələri ilə Avropa İttifaqı arasında daha sıx dialoqu dəstəkləyib".
O, iqtisadiyyatla yanaşı, mədəniyyət və təhsil sahələrində də əlaqələrin vacibliyini söyləyib.
Litva Prezidenti G.Nauseda mayın 17-də Azərbaycana rəsmi səfərə gəlib.
Cəbhəçi sərbəst buraxılıb
Mayın 17-də saxlanan Azərbaycan Xalq Cəbhəsi Partiyasının (AXCP) Mingəçevir şöbəsinin fəalı Ceyhun Rzayevin sərbəst buraxıldığı deyilir
Mayın 17-də saxlanan Azərbaycan Xalq Cəbhəsi Partiyasının (AXCP) Mingəçevir şöbəsinin fəalı Ceyhun Rzayevin sərbəst buraxıldığı deyilir.
Bu barədə Azadlıq Radiosuna AXCP-dən məlumat veriblər.
Onların deməsinə görə, C.Rzayevə qarşı ittiham təsdiqini tapmayıb.
Amma bu deyilənləri, hələlik, Daxili İşlər Nazirliyindən dəqiqləşdirmək mümkün olmayıb
***
Mayın 17-də Azərbaycan Xalq Cəbhəsi Partiyasının (AXCP) Mingəçevir şöbəsinin fəalı Ceyhun Rzayevin saxlandığı bildirilir.
Partiyadan verilən məlumata görə, onu mülki geyimli şəxslər saxlayıb:
"Ceyhun bəy qızını məktəbdən götürərkən 3 nəfər tərəfindən saxlanıb. Qızına isə deyiblər ki, sən get evə, atan tezliklə evə qayıtmayacaq".
AXCP-dən əlavə olunub ki, Ceyhun Rzayev mayın 14-də Bakıda ictimai fəalların "Kriminal dövlət istəmirik" adlı yürüşünə dəstək olaraq Mingəçevirdə təkadamlıq aksiya keçirib və saxlanıb, sonra isə sərbəst buraxılıb.
Daxili İşlər Nazirliyinin Mətbuat xidmətinin Kütləvi informasiya vasitələrinin (KİV) vəictimaiyyətlə əlaqələr şöbəsinin rəisi Elşad Hacıyev isə “Turan”a bildirib ki, Ceyhun Rzayev narkotik vasitələrin qanunsuz dövriyyəsində şübhəli bilindiyi üçün saxlanılıb:
"Hazırda onun barəsində müvafiq araşdırma aparılır. Araşdırma nəticəsindən asılı olaraq əməli tövsif olunacaq".
Hacıyev vurğulayıb ki, Rzayevin saxlanmasında heç bir siyasi motiv yoxdur.
3 gün əvvəl, mayın 14-də ictimai fəallar Bakının mərkəzində "Kriminal dövlət istəmirik" şüari ilə yürüş keçirərək bəzi fəal və jurnalstlərə qarşı cinayətlərin baş verdiyini bildirib, belə halların araşdırılmasını tələb ediblər.
Aksiya iştirakçılarının bir çoxu saxlansa da sonradan onların hamısı sərbəst buraxılıb.
Bələdçilər əmək haqlarının azaldılmasına etiraz edir
Bu gün, mayın 16-da bir qrup dəmiryol işçisi Bakıda "Azərbaycan Dəmir Yolları" QSC binası önünə toplaşaraq şikayətlərini dilə gətiriblər. Onlar deyiblər ki, əmək haqları azaldılıb.
Dəmiryolçular vurğulayıblar ki, müqavilələri başa çatmamış əmək haqlarının azaldılması düzgün deyil. Onlar əlavə ediblər ki, əmək haqları 250 manata salınıb, halbuki, əvvəl 370 manat alıblar.
Şikayətçilər söyləyiblər ki, bu addım koronavirus pandemiyası ilə əlaqədar ölkənin quru yollarının bağlanması ilə izah edilir. Onlar deyirlər ki, indi yalnız daxildə qatarlar bəzi marşrutlar üzrə hərəkət edə bilir.
Şikayətçilərin qarşısına məsul şəxs çıxıb
Özünü "Azərbaycan Dəmir Yolları" QSC-nin Sərnişin daşımaları departamentinin rəisi Elyar Muradov kimi təqdim edən şəxs deyib ki, bu addım əmək məcəlləsinə uyğun atılıb. O da bildirib ki, koronavirus pandemiyası ilə bağlı dəmiryolda boşdayanmalar yaranıb. Rəis vurğulayıb ki, onlar iki il ərzində əmək haqlarını tam alıblar, indi isə, mayın 1-dən boşdayanmaya cəlb ediliblər.
E.Muradov deyib ki, boşdayanmada işçinin əmək məcəlləsinə uyğun olaraq əmək haqqının üçdə ikisi ödənilir. O, daha sonra şikayətçiləri qəbula çağırıb.
Şikayətçi dəmiryolçulardan bəziləri də vurğulayıb ki, əslində prezidentin də sərəncamı olmuşdu ki, pandemiyaya görə işləməyən işçilərin əməkhaqqına toxunulmasın. Onlar deyiblər ki, bunda məqsəd bəzi bələdçilərin yerinə özlərinə yaxın şəxsləri işə qəbul etməkdir.
Daha sonra hadisə yerinə polis də gəlib və şikayətçilər qəbula yola salınıblar.
Koronavirus pandemiyası ilə bağlı 2020-ci ilin martından Azərbaycanda karantindir. Bu müddət ərzində karantin bir xeyli yumşaldılsa da, ölkənin quru sərhədi hələ də açılmayıb.
ADY: Maaşlarının 5 misli müavinət ödəniləcək
Aksiyadan sonra "Azərbaycan Dəmir Yolları" (ADY) QSC ayrıca açıqlama yayıb.
Bildirilir ki, "Azərbaycan Dəmir Yolları" QSC-də 18 mindən çox işçi heyəti var: "Pandemiya müddətində yalnız 2000-ə yaxın işçi əmək fəaliyyətində olmayıb və həmin şəxslərə pandemiya başladığı tarixdən son dövrlərə kimi bütün aylar üzrə ümumilikdə 10 milyon manatdan artıq... əməkhaqqı ödənilib".
Məlumatda deyilir ki, hazırkı mühit işçilərin sayının işin həcminə uyğunlaşdırılmasını və kadr potensialının buna mütənasib optimallaşdırılmasını zəruri edib. Bildirilir ki, fəaliyyətsiz qalmış və sərbəstləşmə riski olan əməkdaşların DOST İş Mərkəzi tərəfindən müvafiq işlərə cəlb edilməsinə dair razılıq əldə edilib: "Sözügedən əməkdaşların DOST İş Mərkəzinə keçidi zamanı onlara vəzifə (tarif) maaşlarının 5 misli miqdarında birdəfəlik müavinətin ödənilməsi nəzərdə tutulub".
Nazirlər Kabineti, gec də olsa, siyahını təsdiqlədi
İdxalı Əlavə Dəyər Vergisindən (ƏDV) azad edilən kağız və çap məhsullarının siyahısını Nazirlər Kabineti təsdiqləyib.
Bu barədə mayın 13-də Nazirlər Kabinetindən məlumat verilib. Məlumata görə, idxalı, satışı ƏDV-dən azad edilən kütləvi informasiya vasitələri məhsullarının, kitablar, dərslik və həmin malların nəşri ilə bağlı rulon, yaxud vərəqə şəklində kağızın siyahısı təsdiq edilib.
Bu il yanvarın 1-dən Azərbaycanda kitablar və kağızlar 18 faiz ƏDV azad edilmişdi. Bununla bağlı Vergi Məcəlləsinin 164.1.7-ci və 164.1.8-ci (Vergi ödəməkdən azad edilmə) maddələri yeni redaksiyada təsbit edilib.
Prezidentin 2021-ci il dekabrın 29-da imzaladığı fərmanda Nazirlər Kabinetinə üç aya həmin məcəlləyə uyğun olaraq, kütləvi informasiya vasitələri məhsullarının və kitabların (elektron kitablar istisna olmaqla), habelə dərslik komplektlərinin siyahısını təsdiq etmək tapşırılmışdı. Lakin dörd aydan çox keçməsinə baxmayaraq, sözügedən siyahı təsdiq edilmirdi. İş adamlarının şikayətlərinə görə, Vergi Xidməti və Gömrük Komitəsində "yeni təlimat yoxdur" deməklə həm kitab satışı, istehsalından, həm də xaricdən gətirilən kağız məmulatlarından vergi tutulurdu.
Bu ilin əvvəlindən Azərbaycanda kağızın az qala iki dəfə bahalaşdığı bildirilir. Buna səbəb kimi Rusiyanın Ukraynaya təcavüzü və bununla bağlı Rusiyaya sanksiyalar göstərilir.
Ağdam sakininin sursat partlamasından öldüyü bildirilir
Qarabağ müharibəsində təmas xətti Ağdam rayonundan da keçib. Ağdam şəhəri daxil bu rayonun böyük bir ərazisi 27 il işğal altında olub
Bugün, mayın 12-si Ağdam rayon sakininin silah sursatın partlaması nəticəsində halak olduğu bildirilir.
Ağdam rayon Prokurorluğunun açıqlamasına görə, saat 16 radələrində 40 yaşlı Rəşad Bəxtiyarovun çoxsaylı qəlpə yarasından ölməsi barədə onlara məlumat daxil olub.
Rəsmi açıqlamada əlavə edilir ki, aparılmış araşdırmalarla kənd-təsərrüfatı fəaliyyəti ilə məşğul olan Rəşad Bəxtiyarovun rayonun Çəmənli kəndi ərazisində silah sursatın partlamasından aldığı xəsarətlərdən öldüyü müəyyən edilib:
"Hazırda faktla bağlı Ağdam rayon prokurorluğunda araşdırma aparılır".
Amma bu məlumata, hələlik, həlak olan şəxsin yaxınlarından münasibət almaq mümkün olmayıb.
Qarabağ müharibəsində təmas xətti Ağdam rayonundan da keçib. Ağdam şəhəri daxil bu rayonun böyük bir ərazisi 27 il işğal altında olub. Amma Çəmənli kəndi işğal edilməyib.
Azərbaycan 1988-ci ildə başlayan, sonradan da silahlı toqquşmalra keçən Qarbağ münaqişəsi nəticəsində Ermənistanın ümumilikdə 20 faiz ərazisini işağ etdiyini, iki il əvvəl 44 günlük yeni savaş və sonrakı danışıqlar nəticəsində həmin ərazilərin çoxuna nəzarəti bərpa etdiyini açıqlayıb.
Bloqerin inzibati həbs edildiyi deyilir
Mayın 9-da Azərbaycan Milliyyətçi Demokrat Partiyasının üzvü, bloqer Eyvaz Yahyaoğlunun Şirvanda həbs olunduğu bildirilir.
Bu barədə AzadlıqRadiosuna partiyanın funksioneri Qələndar Muxtarlı məlumat verib. Onun sözlərinə görə, E.Yahyaoğlu özü "Şirvan TV" adlı YouTube kanalında Şirvan şəhərində baş verən hüquq pozuntularını ictimailəşdirirdi: "Orada dövlət əmlaklarının qanunsuz dağıdılması, talanmasını çəkib göstərirdi. Dəfələrlə bununla bağlı ona xəbərdarlıqlar edilib. Sonra isə polis bölməsinə çağırılıb".
Partiya üzvü deyir ki, elə polis bölməsində onun barəsində İnzibati Xətalar Məcəlləsinin 535-ci (Polis işçisinin və ya hərbi qulluqçunun qanuni tələbinə qəsdən tabe olmama) maddəsi ilə protokol tərtib edilib:
"Prezident deyir ki…"
"Daha sonra o, Şirvan Şəhər Məhkəməsinin qərarı ilə 28 sutka inzibati qaydada həbs olunub. Eyvaz bəy həmişə Prezident İlham Əliyevin siyasətinə istinadən çəkilişlər edirdi. Prezident deyir ki, eybəcərlikləri çəkin, göstərin. Biz hesab edirdik ki, bu onu qoruyacaq, amma indi güman edirik ki, Prezident İlham Əliyevin adının çəkilməsi də onu xilas edə bilmir".
Q.Muxtarlının sözlərinə görə, Azərbaycan Milliyyətçi Demokrat Partiyası bu həbsi onun siyasi fəaliyyəti ilə əlaqələndirir: "Biz və ailəsi narahatıq ki, ona qarşı orda başqa iş açıla bilər. Biz onun azad olunmasını tələb edirik".
Bu deyilənlərə, hələlik, Daxili İşlər Nazirliyi və Şirvan Şəhər Məhkəməsindən münasibət öyrənmək mümkün olmayıb. Amma rəsmilər, bir qayda olaraq, tənqidi mövqe və dinc siyasi fəaliyyətə görə ölkədə insanlara təzyiqlərin olması ilə bağlı şikayətləri əsaslı saymırlar.
Xəzərdə aşkar edilən minalar zərərsizləşdirilib
Xəzər dənizində aşkar edilən minalar zərərsizləşdirilib. Bu barədə mayın 10-da Azərbaycan Müdafiə Nazirliyi məlumat yayıb.
Məlumatda bildirilir ki, Xəzər dənizinin Azərbaycan sektorunda 60 metr dərinlikdə aşkar edilən altı böyük gəmi minasının (КБ-1) zərərsizləşdirilməsi mayın 10-da uğurla başa çatıb.
Açıqlamaya görə, minaların zərərsizləşdirilməsi prosesinə ümumilikdə dörd hərbi gəmi, dörd kater və 133 nəfər hərbi qulluqçu cəlb olunub.
"Hazırda Xəzər dənizinin Azərbaycan sektorunda bütün fəaliyyətlər adi qaydada davam etdirilir", - nazirlik vurğulayır.
Xəzərdə gəmi minaları tapılıb
Xəzər dənizinin Azərbaycan sektorunda altı gəmi minası aşkar edilib. Bu barədə mayın 4-də Azərbaycan Müdafiə Nazirliyi (MN) məlumat yayıb.
Məlumatda bildirilir ki, "UMID BABEK OPERATING COMPANY" şirkətinin Xəzər dənizinin Azərbaycan sektorunda apardığı ərazi kəşfiyyatı zamanı suyun 60 metrədək dərinliyində naməlum obyektlər aşkar edilib.
Məlumata görə, dənizin həmin akvatoriyası SSRİ dönəmində poliqon kimi istifadə olunub, aşkarlanan obyektlərin isə həmin vaxt standartlara əməl edilmədən suya atılmış altı böyük gəmi minası (КБ-1) olduğu müəyyən edilib: "Aşkarlanmış minaların mayın 9-dan etibarən hava şəraitindən asılı olaraq təhlükəsizlik tədbirlərinə əməl edilməklə digər dövlət qurumları ilə qarşılıqlı əlaqədə zərərsizləşdirilməsi və axtarış tədbirlərinin davam etdirilməsi planlaşdırılıb".
Bildirilir ki, minaların aşkarlandığı ərazi təhlükəsizlik məqsədilə gəmi sürücülüyü üçün müvəqqəti bağlanıb: "Xəzər dənizinin Azərbaycan sektorunda mülki təyinatlı işlər adi qaydada davam etdirilir".
Xəzərin hövzəsi Azərbaycandan başqa Rusiya, Qazaxıstan, Türkmənistan və İranın payına düşür.
Azərbaycanda faşist Almaniyası üzərində qələbənin 77 illiyi qeyd edilir
Bu gün, Azərbaycanda mayın 9-u faşist Almaniyası üzərində qələbənin 77 illiyi rəsmi qaydada qeyd edilir. Əksər Avropa dövlətlərindən fərqli olaraq keçmiş SSRİ məkanındakı bir çox ölkələrdə bu qələbə mayın 8-i yox, 9-da xatırlanır.
Hitler Almaniyasının hərbi rəhbərliyi 77 il öncə müttəfiqlər qarşısında təslim olmaq haqqında saziş imzalayıb.
1939-cu ildə İkinci Dünya müharibəsi başlayıb. 1941-ci il iyunun 22-də isə Hitler Almaniyası Azərbaycanın da daxil olduğu Sovet Sosialist Respublikaları İttifaqına (SSRİ) hücum edib. Bu müharibə 1945-ci il mayın 8-də başa çatıb. İkinci Dünya müharibəsi isə tam olaraq həmin ilin sentyabrında yekunlaşıb.
Bu müharibə nəticəsində 60 milyona yaxın insanın həlak olduğu bildirilir.
1941-1945-ci illərdə Azərbaycanın 3 milyon yarım əhalisindən 600 mindən çoxu cəbhəyə gedib, onlardan təqribən yarısının döyüşlərdə həlak olduğu açıqlanıb. Hazırda Azərbaycanda bu müharibə veteranlarından 96-sının sağ olduğu bildirilir. Ötən il isə 150 müharibə veteranının yaşadığı açıqlanmışdı.
Azərbaycan tarixçilərinin bildirdiklərinə görə, həmin illərdə Bakı cəbhəyə 75 milyon ton neft göndərib, SSRİ-də benzin və sürtgü yağlarına olan tələbatın 75-90 faizini ödəyib.
Mayın 9-u Azərbaycanda rəsmi iş günü deyil.
Şərhlər
Daha çox şərh göstər