Rasim Qaraca. Noyabr şeirləri

Rasim Qaraca

NOYABR ŞEİRLƏRİ

Kimsə görmədi bizi gözümüz kor idi çünki

Bir qız gördüm sənə bənzəri vardı
Yoldan keçirdi, dönüb elə sənin kimi baxdı
Hava yağmurluydu və bir az sazaqdı
Aylardan oktyabrdı.

.

Bir an kimi keçdi illər gözlərimin önündən
Başıma tutdum plaşımı çıxarıb əynimdən
O yağışlı günü xatırladım yenidən
Fəsillərdən bahardı

.

Kimsə görmədi bizi gözümüz kor idi çünki
Dodağında atəş var idi gözlərində çınqı
O necə təlaş idi, o nə həyəcandı
Qollarımdakı candı

.

İşıqlar sönmüşdü elektriklər kəsilmiş
Bu nə aylar imiş, bu nə fəsilmiş
Demə ömür imiş keçib gedirmiş
Bir də ayıldıq ki film qurtardı

.

Buna da bax: Rasim Qaraca. Avqust şeirləri

Yalçın İslamzadəni şeirə dəvət

.

Şeirlə arası yoxdur dostum Yalçının
Şeir olmasa bir şey itirməyəcəkmiş bəşər
Yalanmış Fərahd ilə Şirin və Leyli-Məcnun
Məgərsə insan elm qazanında bişər

.

Şeirsiz həyatın varmıdır bir anlamı,
Sözlərdən qurulan bir ayrı dünyadır bu
Sözlərdədir yaşamın dadı və tamı
Sözlər olmadan deyin, nə olardı elmin sonu?

.

Axtarışdadır insan əzəldən
Bəzən öz tapdıqları dönüb yandırar onu
Qaçarkən savaşlardan, yanğınlardan, zəlzələdən
Şeirə sığınmamışmıdır insan oğlu
Acı çəkən insanların dünyasıdır poeziya
Təsəllidir, bəzən bir ümid qığılcımıdır
Tarixin qaranlığını yaran bir ziya
Təşnə dodaqlara bir içim sudur

Yalçın, quru rəqəmlərdə nə görmüsən, nə
Baxsana şeirlə doludur hər yan...
Eh, nə isbat edəcəm axı mən sənə,
Ey robot qafalı ürəksiz insan

Buna da bax: Qanad açmış avtobus, uçur buludlar arasında

Dostum Çe

Kim mənimlə gedəcək qurbağa əti yeməyə

indi bekaram, saat 3-ə qədər zamanım var

Natavan heykəlinin yaxınlığındayam

kim birinci arasa onunla gedəcəm...

.

Bu cür public dəvətlərdə birinci arayan

dünyanın ən bədbəxt insanı olur

ən sədaqətli olan da elə odur -

səninlə it əti yeməyə də gedər...

.

Qizardılmış qurbağaları vurub bədənə

ağzımızda kürdanla addımlayırıq bulvarda

dostum danışmağı sevmir və nəsə demək xatirinə

dillənir haçandan haçana

Fidel Kastro da öldü...

.

Müsəlmanlara çağırış

Siz ey əziz müsəlmanlar

ibadət ərkanı sadə insanlar

əyilib qalxarkən allahın qarşısında

unutmayın respublikanı

.

qanlar bahasına quruldu bu ölkə

qoymayın üzərinə düşsün kölgə

ərəbin öz qumu öz səhrası var

bizimki yamyaşıl respublika

.

qalmayın namazdan, sayqım var ibadətinizə

axirətə inanmaq da haqdır

ancaq bir qardaş kimi deyirəm sizə

mənim tanrım respublikadır

.

Camışların issisi

Camışların olduğu yerə gedəcəm,

orada doğaldır hər şey,

milçəklərin vızıltısı belə.

.

Ərəbcə “ğayn” deyən camışlara sökənib

duyacam ana təbiətin issisini,

zaman əsl zaman olacaq orada

və ürək döyüntüləri əsl ürək döyüntüsü...

.

Buna da bax: Rasim Qaraca: “Ay şair, eşqə dair...”

.

Güllü

Güllü çit pərdələr çəkilmiş evlərdə

güllü çit süfrələr salınmış otaqlar,

güllü çaydanlarda dəmlənmiş

və güllü nəlbəkilərdə,

kənarları güllü işləməli

armudu stəkanlara süzülmüş çay,

güllü palazların üstündə

güllü çit tumanlar geyinmiş qadınlar,...

Eh, hardasınız, güllü uşaqlıq illərim?