-
Rasim Qaraca
Avqust şeirləri
*
Qoy keçmiş təkrar olsun,
maşından evə meyvələri daşıyan uşaq yıxılsın,
qucağındakı qovun yerə dəyib partlasın
*
Yenə savaş səhnələri hər yanda,
yenə qan gölünə döndü dünya,
utanmalıdır hər kəs
bəzən insan olduğuna...
*
İşıq və kölgə oyununa başladıq səninlə,
ağ-qara rənglərdəydi bütün toxunmaların,
təkcə dodaqların
al-qırmızıydı...
*
Bir dəfə öpdünsə bir qadını
nərdivanla enərkən,
bir daha ala bilməzsən o dadı –
qadın taparsan, amma, nərdivan yox...
*
Qanad çalıb uçmaz
bzim ölkədə quşlar,
çünki onların
qəfəsdə dostları var...
*
Pəncərələr çilik-çilk olub yerə tökülməyib,
evlər uçulmayıb daşları daş üstündədir nədənsə.
Ən gülməlisi,
oxla dəlinmiş o ürək şəkli də
hələ silinməyib...