Son bir gündə Azərbaycanda koronavirus (COVID-19) infeksiyasına 359 yeni yoluxma faktı qeydə alınıb, bu virusa yoluxanlardan isə 263 nəfər sağalıb.

Bu məlumatı yanvarın 15-də Nazirlər Kabineti yanında Operativ Qərargah yayıb.

Qərargahdan vurğulanıb ki, COVID-19 üçün götürülən analiz nümunələri müsbət çıxan 8 nəfər vəfat edib.

Qurumdan həmçinin, bildirildiyinə görə, indiyə kimi ölkədə ümumilikdə 626 min 85 nəfər koronavirus infeksiyasına yoluxub, onlardan 608 min 777-i sağalıb, 8529-u vəfat edib, aktiv xəstə sayı 8779-ə yüksəlib.

Xatırlatma

2019-cu ilin sonlarında dünyada yeni koronavirus aşkar edilib.

2020-ci il martın 11-də Dünya Səhiyyə Təşkilatı koronavirusu pandemiya elan edib.

Dünyada sürətlə yayılan bu virusdan indiyə qədər 5.5 milyondan çox şəxsin vəfat etdiyi açıqlanıb.

xeberman.com saytının həbsdə olan rəhbəri Polad Aslanovun həyat yoldaşı Gülmirə Aslanova yanvarın 17-də Baş Prokurorluğun inzibati binasının qarşısında təkbaşına etiraz aksiyası keçirib. O, Baş prokuror Kamran Əsədovla görüş də tələb edib.

Aslanova bildirib ki, həyat yoldaşının 2 il yarımdır qanunsuz həbsdə saxlanılmasına etiraz edir və onun cinayət təqibinə son qoyulmasını istəyir.

Polis əməkdaşları onun qarşısını kəsiblər. G.Aslanovaya Qəbul otağına getmək təklif olunub, amma o, imtina edib. Son nəticədə Aslanova Səbail rayon 9-cu Polis Bölməsinə aparılıb və bir müddətdən sonra sərbəst buraxılıb.

G.Aslanova AzadlıqRadiosuna bildirib ki, həyat yoldaşı bu gün, yanvarın 17-də zəng edib və yanvarın 6-dan başladığı aclıq aksiyasını davam etdirdiyini deyib.

Bu açıqlamaya, hələlik, Baş Prokurorluq və başqa cavabdeh qurumdan münasibət almaq mümkün olmayıb.

Ombudsman nümayəndələri aclıq edən sayt rəhbəri ilə görüşüblər

Ombudsmanın Milli Preventiv Qrupunun (MPQ) üzvləri dünən, yanvarın 12-də həbsdə aclıq aksiyası keçirən xeberman.com saytının rəhbəri Polad Aslanovla görüşüblər.

Aparatın məlumatına görə, görüş Ədliyyə Nazirliyi Penitensiar Xidmətinin 1 saylı Cəzaçəkmə Müəssisəsində gerçəkləşib: "…Hazırda müəssisənin tibb-sanitar hissəsində saxlanılan Polad Aslanov konfidensial qaydada qəbul olunub. Qida qəbulundan imtina etməsi səbəbi ilə ayrıca palata ayrıldığı və Polad Aslanovun gündəlik həkim nəzarətində olduğu müşahidə edilib".

Qurumdan açıqlamaya görə, məhkumla söhbət zamanı o, qida qəbulundan imtina səbəbi kimi barəsində olan cinayət işi ilə bağlı birinci və apellyasiya instansiyaları üzrə məhkəmə qərarlarını göstərib: "Habelə hazırda Ali Məhkəmənin icraatında olan işinə ədalətli baxılmasına nail olmaq istəyini qeyd edib. MPQ üzvləri Polad Aslanovun səhhətinin nəzarətdə saxlanılması, gündəlik həkim nəzarətinin davam etdirilməsi ilə bağlı müəssisə rəhbərliyinə tövsiyələr verib. Məsələ diqqətdə saxlanılır".

Bu açıqlamaya, hələlik, Məhkəmə Hüquq Şurasından münasibət almaq mümkün olmayıb.

Sayt rəhbərinin xanımı DTX-da qəbul edilib

xeberman.com saytının həbsdə olan rəhbəri Polad Aslanovun həyat yoldaşı Gülmirə Aslanova yanvarın 12-də Dövlət Təhlükəsizliyi Xidmətinin (DTX) İstintaq İdarəsində qəbulda olub. O, AzadlıqRadiosuna bildirib ki, görüşdə vəkil Elçin Sadıqov da iştirak edib.

G.Aslanovanın sözlərinə görə, idarədə ona bildirilib ki, məhkəmə qərarı artıq qüvvəyə minib, iş Ali Məhkəmədə baxılma mərhələsindədir və məhkəmənin işinə müdaxilə mümkünsüzdür: "Biz vəkillə Poladın hüquqlarının pozulduğunu, onun günahını sübuta yetirən faktların olmadığını desək də, bu nəticə vermədi".

Sayt redaktorunun həyat yoldaşı qeyd edib ki, yanvarın 6-dan aclıq aksiyası keçirdiyini açıqlayan P.Aslanov bu gün, yanvarın 12-də evə zəng vurmalı olsa da, zəng etməyib: "Ona ya zəng vurmağa imkan verilməyib, ya da səhhətində ciddi problemlər yaranıb".

Bu deyilənlərə, hələlik, Penitensiar Xidmət və DTX-dan hər hansı münasibət almaq mümkün olmayıb.

G.Aslanova dünən, yanvarın 11-də DTX-nın inzibati binasının qarşısında təkbaşına aksiya keçirmişdi. Sonra o, DTX binasına dəvət edilmişdi.

Xatırlatma

xeberman.com saytının təsisçisi və baş redaktoru P.Aslanov 2019-cu il iyunun 12-də saxlanıb. O, Cinayət Məcəlləsinin 274-cü (dövlətə xəyanət) maddəsi ilə ittiham olunub.

Həmin ilin noyabrında P.Aslanov 16 il azadlıqdan məhrum edilib. Hökmə əsasən, P.Aslanov dövlətə xəyanətdə - İranın xüsusi xidmət orqanlarına casusluqda suçlu bilinib. O, özünü təqsirli bilmir.

P.Aslanovun yanvarın 6-da işinin yenidən araşdırılması tələbi ilə aclıq aksiyasına başladığı ilə bağlı yaxınları açıqlama vermişdi. Lakin həmin məlumatı rəsmi qurumlardan, hələlik, dəqiqləşdirmək mümkün olmayıb.

2021-ci ildə Azərbaycanda rəsmi açıqlanan inflyasiya 6.7 faiz olub.

Bu barədə bu gün, yanvarın 17-də Dövlət Statistika Komitəsi (DSK) məlumat yayıb.

Qurumdan vurğulandığına görə, ərzaq məhsulları, içkilər və tütün məmulatları 8.1, qeyri-ərzaq məhsulları 5.1, əhaliyə göstərilmiş ödənişli xidmətlər isə 5.8 faiz bahalaşıb.

DSK-mın açıqlamasına görə, 2021-ci ilin dekabrında inflyasiya 1.6 faiz, əvvəlki ilin dekabrına nisbətən isə 12 faiz təşkil edib.

İqtisadçı: "20 faiz civarında olub"

İqtisadçı Rəşad Həsənov isə hesab edir ki, rəsmi açıqlanan rəqəmlər real vəziyyətlə uzlaşmır. Onun sözlərinə görə, qiymət artımı daha yüksək olub: "Bizim hesablarımızla ərzaq və gündəlik tələbat məhsullarının qiymətlərində 2021-ci ilin dekabrı ilə 2020-ci il dekabrı arasında 18.5 faiz fərq var. Ümumi olaraq bir il ərzində inflyasiya səviyyəsi 20 faiz civarında olub".

Son bir gündə Azərbaycanda koronavirus (COVID-19) infeksiyasına 808 yeni yoluxma faktı qeydə alınıb, bu virusa yoluxanlardan isə 369 nəfəri sağalıb.

Bu məlumatı yanvarın 16-da Nazirlər Kabineti yanında Operativ Qərargah yayıb.

Məlumatda qeyd olunur ki, COVID-19 üçün götürülən analiz nümunələri müsbət çıxan 11 nəfər vəfat edib.

Qərargahın açıqladığı məlumata görə, indiyə kimi ölkədə ümumilikdə 625 min 726 nəfərin koronavirus infeksiyasına yoluxması faktı müəyyən edilib, onlardan 608 min 514-ü sağalıb, 8521-i vəfat edib, aktiv xəstə sayı 8691-ə yüksəlib.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib.

Dünyada sürətlə yayılan bu virusdan indiyə qədər 5.5 milyondan çox şəxsin vəfat etdiyi açıqlanıb.

Yanvarın 14-də Ukraynada işgüzar səfərdə olan Azərbaycan prezidenti İlham Əliyev və bu ölkənin prezidenti Volodimir Zelenski sənədlərin imzalanması mərasimindən sonra mətbuata bəyanatlar veriblər.

AZƏRTAC-ın xəbərinə görə, Prezident İlham Əliyev deyib ki, Ukrayna və Azərbaycan hər zaman bir-birini dəstəkləyiblər:

“Hər zaman bir-birinin müstəqilliyini, ərazi bütövlüyünü, suverenliyini dəstəkləmişlər və bu dəstək bu gün birgə imzaladığımız Birgə Bəyannamədə də öz əksini tapır.”

O, əlavə edib ki, ənənəvi əməkdaşlıq sahəsi olan energetika sahəsində yeni planlar var:

“Azərbaycan Dövlət Neft Şirkəti – SOCAR Ukraynada öz fəaliyyətini genişləndirmək əzmindədir və şadam ki, Ukrayna tərəfi də bunu dəstəkləyir. Hazırda SOCAR-ın Ukraynada geniş yanacaqdoldurma stansiyalarından ibarət şəbəkəsi var və əlbəttə ki, neft və neft məhsullarının ixracı və emalı ilə bağlı yeni addımların atılması bizim əməkdaşlığımızı daha da dərinləşdirəcək”.

Onun vurğulamasına görə, iki ölkənin ticarət dövriyyəsi pandemiyaya baxmayaraq, keçən il 20 faizdən çox artıb:

“Mən ümid edirəm ki, yaxın gələcəkdə 1 milyard dollar səviyyəsinə çatacaq, bəlkə də ondan çox.”

Sonra Ukrayna dövlətinin başçısı Volodimir Zelinski bəyanat səsləndirib. O, da birgə bəyanat imzalamaqlarına toxunub:

“Bunun sayəsində suverenlik və ərazi bütövlüyü məsələlərində ölkələrimiz arasında dəstək verəcəyik, bizim beynəlxalq səviyyədə müəyyən edilmiş sərhədlərimizin qorunması üçün çalışacağıq. O cümlədən biz təhlükəsizlik məsələləri - Xəzər və Qara dəniz hövzələrində təhlükəsizlik məsələləri ilə məşğul olacağıq, terrorçuluğa qarşı birgə mübarizə aparacağıq…”

Ukrayna Prezidenti deyib ki, bu ilin birinci yarısında hökumətlərarası birgə iqtisadi komissiyanın növbəti iclasının keçirilməsi ilə bağlı razılığa gəlinib. O, niyyət də dilə gətirib:

“… Aviasiya sahəsində istərdik əməkdaşlığımız genişlənsin. Bir sıra təşəbbüsləri irəli sürmüşük. Tutaq ki, nəqliyyat dəhlizlərinin GUAM çərçivəsində daha da genişləndirilməsində iştirak etməliyik. Burada Azərbaycan, Gürcüstan, Moldova və Ukrayna var, bildiyiniz kimi, bu əlaqələr genişlənməlidir. Kənd təsərrüfatı sahəsinə gəldikdə, biz əməkdaşlıq üzrə razılığa gəlmişik. Daha sonra titanın istehsalı sahəsində müzakirələr aparmışıq...”

***

Yanvarın 14-də Kiyevdə geniş tərkibdə görüş başa çatdıqdan sonra Azərbaycan Prezidenti İlham Əliyevin və Ukrayna Prezidenti Volodimir Zelenskinin iştirakı ilə Azərbaycan-Ukrayna sənədlərinin imzalanması mərasimi olub.

Ukrayna Nazirlər Kabineti ilə Azərbaycan Hökuməti arasında "Qida təhlükəsizliyi sahəsində əməkdaşlıq haqqında" Sazişə qol çəkilib. Habelə, "İkitərəfli ticarətdə təcili əməkdaşlıq haqqında" Anlaşma Memorandumu da imzalanıb. İmzalanan sənədlərə "Aqrar sahədə əməkdaşlıq haqqında", "Energetika sahəsində əməkdaşlıq haqqında" və "Torpaq münasibətləri, dövlət torpaqlarının idarə edilməsi və dövlət torpaq kadastrı sahəsində əməkdaşlıq haqqında" Anlaşma memorandumları da daxildir.

Prezidentlər əvvəlcə Birgə Bəyannamə imzalayıblar.

İlham Əliyev Ukraynaya gedib

Yanvarın 14-də Azərbaycan Prezidenti İlham Əliyev Ukraynaya işgüzar səfərə edib. Səfər Ukrayna Prezidenti Volodimir Zelenskinin dəvəti ilə gerçəkləşib.

AZƏRTAC-ın xəbərinə görə, Kiyevin Borispol Beynəlxalq Hava Limanında İ.Əliyevi Ukrayna Xarici Işlər nazirinin birinci müavini Əminə Caparova və digər rəsmi şəxslər qarşılayıblar.

Prezident İ.Əliyevin Ukrayna prezidenti, habelə digər rəsmi şəxslərlə görüşü və orada ikitərəfli əməkdaşlıqla bağlı bir sıra məsələlərə dair müzakirələrin aparılacağı gözlənir.

Yanvarın 13-də Azərbaycan Tarif Şurasının növbəti iclasında universal poçt rabitəsi xidmətləri üzrə mövcud qiymətlərdə dəyişiklik edilib. Buna əsas kimi Rəqəmsal İnkişaf və Nəqliyyat Nazirliyinin Şuraya müraciəti göstərilib. Qurumun vurğulamasına görə, universal poçt rabitəsi xidmətləri üzrə mövcud tariflər 2011-ci ilin yanvarında təsdiq edilib, ötən müddətdə "Azərpoçt" MMC-nin xərcləri artıb və fəaliyyəti iqtisadi baxımdan səmərəsiz olub.

Qərarla ölkə daxilində poçt kartın sadə göndərilməsi 20 qəpikdən 30 qəpiyə, sifarişli göndərilməsi 50 qəpikdən 90 qəpiyə, çəkisi 20 qrama qədər olan sadə daxili məktub 20 qəpikdən 30 qəpiyə, çəkisi 2 kiloqrama qədər olan poçt göndərişi 1.8 manatdan 3 manata qaldırılıb. Daxili poçtun sifarişlə göndərilməsi üçün qiymət də 30 qəpikdən 60 qəpiyə çatdırılıb.

Dünən, yanvarın 13-də sosial şəbəkələrdə dövlət müəssisələrinin birində azyaşlı uşağa fiziki təzyiqin göstərilməsi kimi təqdim edilən videogörüntülər yayılıb. Həmin kadrlar narazılıqlara səbəb olub.

Bu gün, yanvarın 14-də isə rəsmi qaydada bildirilib ki, bu hadisə İsmayıllı şəhəri 1 saylı Körpələr evi-uşaq bağçasında baş verib.

Daxili İşlər Nazirliyi Mətbuat xidmətinin Kütləvi İnformasiya Vasitələri və ictimaiyyətlə əlaqələr şöbəsinin rəisi Elşad Hacıyev "Turan"a bildirib ki, üçyaşlı uşağı vurmaqda günahlandırılan bağçanın tərbiyəçi – müəlliməsi Zülfiyyə Baxışovadır. Şöbə rəisinin əlavə etməsinə görə, o, təhqiqata cəlb edilib: "İsmayıllı rayonunda uşaq bağçalarının birində baş verən hadisə ilə əlaqədar rayon polis şöbəsinin təhqiqat qrupu bağçadadır, müvafiq sorğu və izahat işləri aparılır. Araşdırmanın nəticəsindən asılı olaraq, hüquqi tədbir görüləcək".

Təhsil Nazirliyindən…

Təhsil Nazirliyindən isə bildirilib ki, Z.Baxışova ilə bağlanmış əmək müqaviləsi ləğv edilib: "…Vəzifə səlahiyyətlərindən sui-istifadə etdiyinə, əmək müqaviləsi üzrə öhdəlikləri yerinə yetirmədiyinə, "Müəllimlərin etik davranış Qaydaları"nın tələblərini pozduğuna və azyaşlı ilə kobud rəftar etdiyinə görə Əmək Məcəlləsinə… əsasən, bu gündən (yanvarın 14-dən) əmək müqaviləsi ləğv edilib".

Amma, hələlik, bu rəsmi açıqlamalara sözügedən tərbiyəçi-müəllimə və uşağın valideynlərindən münasibət almaq mümkün olmayıb.

Dənizdə çalışan Azərbaycan Dövlət Neft Şirkətinin ( SOCAR) 82 əməkdaşı təxliyə olunub.

Bu barədə "Turan"a yanvarın 14-də SOCAR-dan məlumat verilib.

Şirkətdən qeyd olunub ki, təxliyənin səbəbi havanın kəskin dəyişməsidir: "Dəniz özüllərində aparılan işlər məhdudlaşdırılıb və təhlükəsizlik tədbirləri gücləndirilib".

Bakı və ölkənin bəzi bölgələrinə qar yağıb. Yanvarın 13-ü axşamdan şimal-qərb küləyi əsib. Milli Hidrometeorologiya Xidmətinin məlumatına görə, bu gün, yanvarın 14-də səhər küləyin arabir 28-33 m/s-dək güclənəcəyi, günün ikinci hissəsində isə nisbətən zəifləyəcəyi gözlənilir.

Yolu azaraq Azərbaycan ərazisinə keçən Surik Matevosyanın geri qaytarıldığı bildirilir.

Bu barədə Azərbaycan Müdafiə Nazirliyi məlumat yayıb.

Məlumatda qeyd edilir ki, yanvarın 13-də saat 16:00 radələrində Azərbaycan-Ermənistan dövlət sərhədinin Laçın rayonu ərazisində Surik Matevosyan adlı şəxsin yolu azaraq Azərbaycan sərhədini keçməsi müəyyən olunub:

“S.Matevosyan Rusiya sülhməramlılarına təhvil verilib”.

Bundan əvvəl AzadlıqRadiosunun Erməni xidməti – Azatutyun Sunik vilayətinin Teğ kəndindən Surik Matevosyanın qoyun otararkən azıb Azərbaycan tərəfinə keçdiyi barədə məlumat vermişdi.

Azatutyun bunu da bildirirdi ki, Aravus-Xnatsax otlağı Azərbaycan mövqelərinin 100 metrliyində yerləşir.

Xatırlatma

Qarabağ münaqişəsi ilə bağlı hazırda Azərbaycan və Ermənistan arasında gərginlik var.

Bu münaqişə müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib.

1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Amma 2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib.

Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib.

Avropa İnsan Hüquqları Məhkəməsi (AİHM) yanvarın 13-də Azərbaycandan göndərilmiş 15 civarında ərizə üzrə altı yekun qərar və qərardadlarını elan edib.

Bu barədə AzadlıqRadiosuna hüquqşünas Xalid Ağalıyev məlumat verib.

Məhkəmə qərarlarına əsasən, Azərbaycan ümumilikdə 126 min avrodan artıq təzminat ödəməlidir.

Onlardan biri – "Səid Haşemi və başqaları Azərbaycana qarşı" işində ərizəçilərə münasibətdə şəxsi həyata hörmət hüququna müdaxilə olduğu qənaətinə gəlinib, hökumət onların hər birinə 2 min 100 avro təzminat ödəməlidir: "Bu işdə ərizəçilər – Səid Haşemi, Məhəmməd Ehsani, Ruhullah Rüstəmi, Şaimə Əliközie, Nafiza Əhmədzadə, Eyaz Qureşi, Məhəmməd Heydəri xarici vətəndaşlardır. Onlar Azərbaycan torpaqlarında doğulmuş, doğum haqqında şəhadətnamələri olan övladlarına ölkə vətəndaşlığının verilməsindən imtinadan şikayət etmişdilər".

Başqa işlər isə qeyri-hökumət təşkilatlarının dövlət qeydiyyatına alınmasından imtina, məhkəmə qərarının icra edilməməsi, mülkiyyət hüquqlarının pozulması, şəxsin intim xarakterli videogörüntülərinin çəkilməsi, internetdə və özəl bir telekanalda yayılması ilə bağlı idi. Sonuncu işdə söhbət jurnalist Tural Cəfərovdan (Qan Turalı) gedir. "Tural Cəfərov Azərbaycana qarşı" işində tərəflər dostca anlaşma bağlayıblar. Hökumət ərizəçiyə 8 min 300 avro təzminat ödəməlidir.

Hələlik, qərarlara Azərbaycanın rəsmi və cavabdeh qurumlarından münasibət almaq mümkün olmayıb.

Hazırda həbsdə olan AXCP üzvü Şahin Hacıyev saxlanandan sonra işgəncələrə məruz qaldığını iddia edir.

"Turan"ın xəbərinə görə, o bunu bu gün, yanvarın 13-də Gəncə Ağır Cinayətlər Məhkəməsində keçirilən hazırlıq iclası zamanı bildirib. Ş.Hacıyev Cinayət Məcəlləsinin 234.4.3-cü (böyük ölçüdə narkotik vasitələrin qanunsuz dövriyyəsi) maddəsi ilə ittiham olunur.

İclasda o, məhkəməyə bununla bağlı yazılı müraciət təqdim edib. O, həmçinin bildirib ki, cinayət işinin materialları ilə tanış olmayıb və ittiham aktı ona təqdim edilməyib. Məhkəmə bunu nəzərə alaraq prosesi yanvarın 21-nə təxirə salıb.

Vəkil Zabil Qəhrəmanov isə agentliyə bildirib ki, Ş.Hacıyev istintaq təcridxanasına daxil olarkən ekspertiza onun ayağında travma olduğunu təsdiq etsə də, prokurorluq bununla bağlı cinayət işi açmaqdan imtina edib.

Məhkəmədə işgəncə ilə bağlı səslənən fikirlərə, hələlik, Daxili İşlər Nazirliyi və Baş Prokurorluqdan münasibət almaq mümkün olmayıb. Amma Azərbaycan hüquq-mühafizə orqanları işgəncələrlə bağlı şikayətləri, əsasən, qəbul etmirlər.

Xatırlatma

AXCP üzvü, şahmat müəllimi Şahin Hacıyevi Gəncədə polis ötən il noyabrın 26-da saxlamışdı. Onda AXCP-dən bildirilmişdi ki, onun evində axtarış aparılıb: "Özünü isə qollarına qandal vurub aparıblar. Bizdə olan məlumata görə, ona narkotik ittihamı ilə cinayət işi açmaq istəyirlər".

Müxalifətdə olan AXCP-nin hazırda beşə qədər fəalı müxtəlif ittihamlarla uzunmüddətli həbsdədir. AXCP onların şərlənərək siyasi sifarişlə həbs edildiyini açıqlayıb. Amma rəsmilər ölkədə siyasi məhbusların olması fikrini qəbul etmir. Rəsmilər vurğulayırlar ki, elə dəyərləndirilənlər məhz törətdikləri əmələ görə məsuliyyətə cəlb ediliblər.

Baş Prokurorluqdan açıqlama

Azərbaycan Baş Prokurorluğu jamaz.info xəbər saytının rəhbərliyinin cərimələnməsi ilə bağlı məlumatı təsdiqləyib.

Qurumun açıqlamasında da bu, Fikrət Fərəməz oğlu İbişbəylinin "Şuşa şəhərinin Xankəndidən atəşə tutulması barədə həqiqətəuyğun olmayan məlumatı özünə məxsus jamaz.info xəbər saytında yerləşdirməsi" ilə izah edilir.

"...Dəqiqləşdirilməmiş, həqiqətəuyğun olmayan, eləcə də ictimaiyyətdə çaşqınlıq yaratmağa yönəlmiş informasiyaların qərəzli surətdə yayılmasına görə bundan sonra da tərəfimizdən qəti tədbirlər görüləcək", - qurum vurğulayıb.

+++

Yanvarın 12-də jam.az saytının rəhbəri Fikrət Fərəməzoğlu bu saytda gedən yazıya görə 500 manat cərimələndiyini deyir.

Bu barədə onun özü məlumat verib.

Fərəməzoğlunun sözlərinə görə, yanvarın 12-də onu Baş Prokurorluqda Cinayət Təqibi olmayan işlər üzrə İdarəyə dəvət ediblər:

"Çağırılmanın səbəbi dünən, yanvarın 11-də rəhbərlik etdiyim saytda" "Xankəndidən Şuşa atəşə tutuldu" başlığı altında gedən yazı oldu. Prokurorluq hesab etdi ki, bu yazı camaatın arasında çaşqınlıq yaradır".

Fərəməzoğlu qeyd edib ki, barəsində İnzibati Xətalar Məcəlləsinin 388-1.1.1-ci maddəsilə (informasiya ehtiyatında “İnformasiya, informasiyalaşdırma və informasiyanın mühafizəsi haqqında” Azərbaycan Respublikasının Qanunu ilə yayılması qadağan edilən informasiyanın yerləşdirilməsinə yol verilməsi ) protokol tərtib edilərək Sabunçu Rayon Məhkəməsinə göndərilib:

"Məhkəmədə 500 manat cərimələndim. Hesab edirəm ki, yazı sadəcə bəhanədir. Sadəcə“ipə-sapa” yatmayanları belə cərimələrlə və digər vasitələrlə“ipə-sapa” yatızdırmaq istəyirlər".

O, əlavə edib ki, məhkəmə qərarından apellyasiya şikayəti verəcək.

Bu deyilənlərlə bağlı Baş Prokurorluq və məhkəmədən, hələlik, münasibət öyrənmək mümkün olmayıb.

Amma rəsmilər birqayda olaraq vurğulayırlar ki, ölkədə söz azadlığına basqı yoxdur.

Azərbaycan Müdafiə naziri general-polkovnik Zakir Həsənov bu ölkənin ərazisində yerləşdirilən Rusiya sülhməramlı qüvvələrinin yeni komandanı general-mayor Andrey Volkovu qəbul edib.

Bu məlumatı bu gün, yanvarın 12-də Azərbaycan Müdafiə Nazirliyi (AMN) yayıb.

Məlumatda qeyd edildiyinə görə, görüşdə Rusiya sülhməramlılarının müvəqqəti yerləşdirildiyi Qarabağ iqtisadi zonasındakı əməliyyat şəraiti müzakirə olunub: "General-mayor A.Volkovu general-leytenant Rüstəm Muradov təqdim edib".

Rusiyanın Dağlıq Qarabağdakı kontingentinə general-mayor A.Volkovun rəhbərlik edəcəyi xəbəri bir neçə gün öncə Ermənistan mediasinda da yayılmışdı. Həmin məlumatlara görə, komandir dəyişikliyi plan üzrə rotasiya çərçivəsində həyata keçirilir.

Embed paylaş

Sizcə, Rusiya sülhməramlıları Qarabağda nə qədər qalmalıdır? - Bakıda sorğu

Embed paylaş

Kod yaddaşa götürüldü

---

en px hündürlük px

---

The URL has been copied to your clipboard

No media source currently available

0:00 0:01:23 0:00

Volkov kimdir?

General-mayor Volkov 2020-ci ilin noyabrından 2021-ci ilin mayına qədər Dağlıq Qarabağdakı Rusiya sülhməramlı kontingentinin komandir müavini olub. Həmin vaxt kontingentə general-leytenant R.Muradov rəhbərlik edirdi.

Bu təyinata qədər isə Volkov Rusiya Müdafiə Nazirliyinin Cənub Hərbi Dairəsinin radiasiya, kimyəvi və bioloji müdafiə qoşunlarının rəisi olub.

2021-ci ilin sentyabrından Qarabağdakı sülhməramlı kontingentin komandiri vəzifəsini general-leytenant Gennadi Anaşkin tuturdu.

Xatırlatma

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Aİ sərhəddəki gərginlikdən narahatdır

Avropa İttifaqı Azərbaycan-Ermənistan sərhədində yeni insidentlər və itkilər haqda məlumatlardan dərin narahatlıq keçirir. Bu haqda Twitter-də Aİ-nin Cənubi Qafqaz və Gürcüstan üzrə xüsusi təmsilçisi Toivo Klaar yazıb. O, tərəfləri de-eskalasiyaya, bütün mümkün mexanizmlərdən, özəlliklə Aİ-nin vasitəçiliyi ilə iki ölkənin müdafiə nazirlikləri arasında 2021-ci ilin noyabrında yaradılmış qaynar xətdən tam istifadə etməyə çağırıb.

Aİ sərhədlərin delimitasiyası və demarkasiyası ilə bağlı tərəflərlə işləməyə, əlavə dəstək verməyə hazır olduğunu bildirir.

+++

Ermənistanın Xarici İşlər Nazirliyi Azərbaycan Silahlı Qüvvələrinin artilleriya və dronlardan istifadə edərək Ermənistanla sərhədin şərq istiqamətində atəşkəs rejimini "kobud şəkildə" pozduğunu bildirib: "Ermənistan beynəlxalq ictimaiyyətin diqqətini rəsmi Bakının Ermənistan Respublikasının suverenliyi və ərazi bütövlüyünə qarşı qəsdini davam etdirməsinə, beynəlxalq hüququn təməl prinsiplərini pozmasına çəkir".

Azərbaycan Ermənistanı təxribatda günahlandırır

Azərbaycan Müdafiə Nazirliyinin ( AMN) yanvarın 12-də səhər yaydığı məlumata görə, Ermənistan silahlı qüvvələri dövlət sərhədində yenidən təxribatlar törədib.

Vurğulandığına görə, Ermənistan silahlı qüvvələrinin bölmələri yanvarın 11-i gecə saat 23:20-dən 12-si səhər saat 05:10-dək öz mövqelərindən Kəlbəcər rayonunun Zəylik, Yellicə kəndləri istiqamətində Azərbaycan ordusunun mövqelərini atıcı silahlar və iriçaplı pulemyotlardan fasilələrlə atəşə tutub.

Habelə bildirilir ki, Tovuz rayonunun Muncuqlu, Ağbulaq, Qoşa, Koxanəbi və Əsrik Cırdaxan yaşayış məntəqələri istiqamətində yerləşən Azərbaycan ordusunun mövqeləri də vurulub.

Nazirlik hesab edir ki, Ermənistanın xüsusi səbəb olmadan üzərinə götürdüyü öhdəliklərini pozaraq iki dövlətin sərhədi boyunca vəziyyəti gərginləşdirməsi məqsədyönlü hərbi təxribat və hərbi avantüradır: "Bütün hallarda Azərbaycan ordusunun bölmələri tərəfindən qarşı tərəfə adekvat və mütənasib cavab verilib. Azərbaycan ordusunun sıralarında şəxsi heyət və hərbi texnika baxımdan itki olmayıb".

Vurğulandığına görə, hazırda qeyd olunan istiqamətlərdə nisbi sakitlikdir.

Hələlik, bu açıqlamaya Ermənistan tərəfinin münasibəti bəlli deyil.

Embed paylaş

Ermənistan ona sərf edən xəritəni açıqladı: Qaragölə iddia edirlər

Embed paylaş

Kod yaddaşa götürüldü

---

en px hündürlük px

---

The URL has been copied to your clipboard

No media source currently available

0:00 0:05:21 0:00

Sərhəddə gərginlik: 1 Azərbaycan, üç Ermənistan hərbçisi həlak olub

Yanvarın 11-də gecəyarı Azərbaycan-Ermənistan sərhədində intensiv atışma zonasında daha bir erməni hərbçinin cəsədi aşkarlanıb. Məlumatı Ermənistanın Müdafiə Nazirliyi yayıb.

Beləliklə, Ermənistan tərəfdən həlak olan hərbçilərin sayı 3-ə çatıb. Daha iki yaralının olduğu bildirilir.

Nazirlik yanvarın 11-də yaydığı məlumatda Azərbaycan tərəfi sərhəddə provokasiya törətməkdə ittiham edib.

Azatutyun Radiosu gecə sərhəddə sakitlik olduğunu, heç bir insidentin baş vermədiyini, atışma səslərinin eşidilmədiyini xəbər verir.

+++

AzadlıqRadiosunun Erməni xidməti - Azatutyun yanvarın 11-də Azərbaycan-Ermənistan sərhədində vəziyyətin gərginləşdiyinə dair məlumat verib.

Ermənistanın Müdafiə Nazirliyi iki hərbçinin, N hissəsinin sıravi əsgəri 2002-ci il təvəllüdlü Artur Mxitaryanın və kiçik serjant Rudik Qaribyanın həlak olduğunu bildirib.

Daha iki hərbçinin yaralandığı xəbər verilir.

Yerli vaxtla saat 21:00-a olan məlumata görə Azərbaycan-Ermənsitan sərhədində nisbi sakitlikdir.

Bundan əvvəl Ermənistan tərəfi xəbər verirdi ki, hazırda sərhəddə atışma davam edir, Azərbaycan tərəfi artilleriya və PUA-lardan istifadə edir.

Bundan əvvəl Ermənistan MN yerli vaxtla saat 15:15-də Azərbaycan tərəfinin Ermənistanın Geğarkunik vilayətinin Verin Şorca (Yuxarı Şorca) rayonunda Ermənistanın hərbi mövqelərini atəşə tutduğunu xəbər vermişdi.

Bundan sonra atəş dayansa da, saat 17:30-da atışma bərpa olunub.

Azərbaycan tərəfi bir hərbi xidmətçisinin həlak olduğunu xəbər verib. Bakı əsgərin “erməni tərəfinin təxribatı nəticəsində həlak olduğunu” bildirib.

Azatutyun yanvarın 11-də Yuxarı Şorcadan başqa Ermənistanın Vardenis rayonundakı sərhəd sahələrinin ətəşə tutulduğunu xəbər verir.

Embed paylaş

Azərbaycanla Ermənistan arasında sərhəd mübahisəsinə ABŞ ekspertləri də cəlb oluna bilər - Amerikalı təhlilçinin izahı

Embed paylaş

Kod yaddaşa götürüldü

---

en px hündürlük px

---

The URL has been copied to your clipboard

No media source currently available

0:00 0:14:59 0:00

‘Kəlbəcər rayonu istiqamətində vəziyyət gərginləşib’

Azərbaycan Müdafiə Nazirliyi (AMN) yanvarın 11-də sərhəddəki vəziyyətlə bağlı növbəti açıqlama yayıb.

Açıqlamada vurğulanır ki, Ermənistan silahlı qüvvələrinin yanvarın 11-i günorta saatlarından etibarən başlatdığı təxribat nəticəsində Azərbaycan-Ermənistan dövlət sərhədinin Kəlbəcər rayonu istiqamətində vəziyyət gərginləşib.

Bildirildiyinə görə, Azərbaycan ordusunun bölmələri qeyd olunan istiqamətdə heç bir aviasiya vasitəsi və artilleriyadan istifadə etmədən adekvat cavab tədbirləri həyata keçirir:

“Hazırda əməliyyat şəraiti bölmələrimizin nəzarəti altındadır”.

***

Azərbaycan hərbi qulluqçusu həlak olub. Bununla bağlı bu gün, yanvarın 11-də Azərbaycan Müdafiə Nazirliyi (AMN) məlumat yayıb.

Məlumatda bildirilir ki, Azərbaycan-Ermənistan dövlət sərhədinin Kəlbəcər rayonu istiqamətində yanvarın 11-i günorta saatlarında Ermənistan silahlı qüvvələrinin təxribatı nəticəsində bir əsgərləri həlak olub.

Açıqlamaya görə, Azərbaycan ordusunun bölmələri qarşı tərəfə cavab veriblər: "Baş verən gərginliyə görə bütün məsuliyyət Ermənistanın hərbi-siyasi rəhbərliyinin üzərinə düşür".

Amma bu açıqlamaya, hələlik, Ermənistan tərəfinin münasibəti bəlli deyil.

Tərəflər arasında atəşkəs razılaşması olsa da, onun pozulması ilə bağlı tez-tez qarşılıqlı iddialar səslənir. Bu zaman tərəflər bir-birlərini ittiham edirlər.

Xatırlatma

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib.

Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Bugün, yanvarın 11-də Azərbaycan xarici işlər naziri Ceyhun Bayramovun Amerika Birləşmiş Ştatları dövlət katibinin Avropa və Avrasiya məsələləri üzrə köməkçisi Karen Donfrid ilə telefon danışığı olub.

Bu barədə Azərbaycan Xarici İşlər Nazirliyi (XİN) məlumat yayıb.

Məlumatda vurğulanıb ki, tərəflər regional təhlükəsizlik vəziyyəti ətrafında fikir mübadiləsi aparıblar:

“Nazir Ceyhun Bayramov bölgədə mövcud olan ən son vəziyyət, o cümlədən üçtərəfli bəyanatların icrası ilə bağlı Azərbaycan tərəfindən atılan addımlar barəsində danışıb.”

Açıqlamaya görə, nazir, Ermənistanın iki ölkənin dövlət sərhədində təxribatı davam etdirməsi və Kəlbəcər istiqamətində bir hərbi qulluqçunun həlak olması haqqında qarşı tərəfə məlumat verib.

Vurğulandığına görə, o əlavə edib ki, bu təxribata görə, məsuliyyət bilavasitə Ermənistan hərbi-siyasi rəhbərliyinin üzərinə düşür:

“Telefon danışığı zamanı tərəflər, həmçinin qarşılıqlı maraq doğuran digər mövzuları müzakirə ediblər.”

Azərbaycanla Ermənistan arasında atəşkəs razılaşması olsa da, onun pozulması ilə bağlı tez-tez qarşılıqlı iddialar səslənir. Bu zaman tərəflər bir-birlərini ittiham edirlər.

Azərbaycan Müdafiə Nazirliyi yanvarın 11-də iki ölkənin sərhəddində bir hərbi qulluqçunun həlak olduğunu açıqlayıb.

Buna da bax:

Sərhəddə gərginlik: 1 Azərbaycan, 3 Ermənistan hərbçisi həlak olub

Xatırlatma

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib.

Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib.

Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Ötən il qeyd edilən 3 ölkənin rəhbərliyi regionda iqtisadi və nəqliyyat əlaqələrinin bərpası ilə bağlı bəyanatlar imzalayıblar.

Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib.

Mərkəzi Nəbatat Bağı və Dendrologiya İnstitutu Azərbaycan Milli Elmlər Akademiyasının (AMEA) balansından çıxarılıb. Onların əsasında "Mərkəzi Nəbatat Bağı" və "Dendrologiya Bağı" publik hüquqi şəxsləri yaradılıb.

Bu, Nazirlər Kabinetinin 7 yanvar tarixli "Bakı Şəhər İcra Hakimiyyəti başçısının tabeliyində "Mərkəzi Nəbatat Bağı" və "Dendrologiya Bağı" publik hüquqi şəxslərin yaradılması haqqında" Qərarında əksini tapıb.

AMEA-yə 2019-cu ilin sonlarından akademik Ramiz Mehdiyev rəhbərlik edir. O, həmin ilə qədər Prezident Administrasiyasına rəhbərlik edirdi.

Həbsdə olan xeberman.com saytının rəhbəri Polad Aslanovun yanvarın 6-dan aclıq aksiyası keçirdiyi bildirilir.

Bu barədə onun həyat yoldaşı Gülmirə Aslanova məlumat verib.

Onun sözlərinə görə, Polad Aslanovla bugün, yanvarın 10-da telefonla danışıb:

“Bu 5 gün ərzində 3 kilo çəki itirib. Habelə deməsinə görə, başında şiddətli ağrılar, halsızlıq var, nəbz sürətlənib...”

Xanımının qeyd etməsinə görə, sayt rəhbəri işinin yenidən araşdırılmasını tələb edir.

Gülmirə Aslanova əlavə edib ki, ərinə aclığı dayandırmasından ötrü təzyiqlər edilib.

O, habelə qeyd edib ki, məsələ ilə bağlı Ombudsman Aparatına, Beynəlxalq Qırmızı Xaç Komitəsinə və Penitensiar Xidmətə məlumat verib.

Gülmirə Aslanovanın dediklərinə, hələlik, Penitensiar Xidmət və başqa adı çəkilən qurumlardan münasibət almaq mümükn olmayıb. Amma Xidmətdən, bir qayda olaraq, deyirlər ki, cəzaçəkmə müəssisələrində məhbuslarla yalnız qanun çərçivəsində davranılır.

Buna da bax:

Sayt rəhbəri işinin yenidən araşdırılmasını istəyir

Xatırlatma

Xeberman.com saytının təsisçisi və baş redaktoru Polad Aslanov 2019-cu il iyunun 12-də saxlanıb. O, Cinayət Məcəlləsinin 274-cü (dövlətə xəyanət) maddəsi ilə ittiham olunub.

Həmin ilin noyabrında P.Aslanov 16 il azadlıqdan məhrum edilib. Hökmə əsasən, P.Aslanov dövlətə xəyanətdə - İranın xüsusi xidmət orqanlarına casusluqda suçlu bilinib. O, özünü təqsirli bilmir.

Azərbaycanda da koronavirusun "Omikron" ştammı aşkarlanıb.

Bu barədə bu gün, yanvarın 10-da Azərbaycan Səhiyyə Nazirliyi məlumat yayıb.

Məlumatda bildirilir ki, aparılan araşdırmaların növbəti mərhələsində ölkə xaricindən gələn şəxslərdən götürülmüş nümunələrdən 12-də SARS-CoV-2 21K "Omikron" variantı aşkarlanıb.

Bununla bağlı ölkənin səhiyyə qurumları ikinci dozadan və yaxud xəstəliyə yoluxub sağaldıqdan altı ay sonra qoruyucu immunitetin səviyyəsinin azalmasını nəzərə alaraq, gücləndirici (buster) doza ilə peyvəndləməni vacib sayırlar: "Vaksinasiya ilə yanaşı, xüsusi karantin rejiminin qaydalarına da riayət olunmalıdır. Fiziki məsafənin saxlanılması, maskalardan istifadə, əl təmizliyi kimi qaydalar, virusun variantından asılı olmayaraq, xəstəlikdən qorunmağın və normal həyata qayıtmağın yeganə yoludur".

Dünya Səhiyyə Təşkilatının ekspertlərinin açıqlamasına görə, "Omikron" ştammı daha sürətlə yayılır. Dünyanın bir çox ölkələrində bu ştammın aşkarlandığı açıqlanıb.

Azərbaycanda koronavirus pandemiyası ilə bağlı 2020-ci ilin martından karantin rejimi hökm sürür.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 5.4 milyondan çox şəxsin vəfat etdiyi açıqlanıb.

Azərbaycanda isə yanvarın 10-na kimi ümumilikdə 621 min 234 nəfərin koronavirus infeksiyasına yoluxması faktı müəyyən edilib, onlardan 8 min 445-nin vəfat etdiyi bildirilib.

Azərbaycan SSR Kommunist Partiyası Mərkəzi Komitəsinin 13-cü Birinci katibi Əbdürrəhman Vəzirov yanvarın 10-da 91 yaşında vəfat edib.

Bu barədə "Turan"a onun yaxınları məlumat verib.

Məlumata görə, Ə.Vəzirov Rusiyanın paytaxtı Moskva şəhərində vəfat edib.

Əbdürrəhman Vəzirov 1930-cu ildə Bakı şəhərində doğulub.

SSRİ-nin Nepal Krallığında və Pakistan İslam Respublikasında səfiri olmuşdu.

1988-1990-cı illərdə Azərbaycan SSR Kommunist Partiyası Mərkəzi Komitəsinin Birinci katibi vəzifəsində çalışıb.

Sovet qoşunlarının 1990-cı il yanvarın 20-də Azərbaycanda qətllər törətməsindən bir neçə gün öncə, etirazlar zamanı Azərbaycanı tərk etmişdi, Moskvada yaşayırdı.

Həmin vaxt sovet qoşunları Azərbaycanda 130-dan çox şəxsi qətlə yetirmiş, 700-dən çox şəxs isə yaralanmışdı.

Bu gün, yanvarın 10-da 44 günlük İkinci Qarabağ müharibəsinin bir qrup iştirakçısı Bakıda Azərbaycan Müdafiə Nazirliyinin binası qarşısına toplaşaraq təltifetmədən narazılıqlarını bildiriblər.

Həmin şəxslərin sözlərinə görə, ölkənin ərazi bütövlüyü uğrunda müharibədə xidmətlərinə baxmayaraq onlara medal verilmir. "Bizə dəyər versinlər. Bizi yandıran odur ki, bizdən 40 kilometr arxada… olana dörd dənə medal verilib. Müdafiə Nazirliyinin öz hərbi hissəsi var, hər uşağa səkkiz dənə medal veriblər. Ədalətli qərar deyil axı", - şikayətçilərdən biri vurğulayıb. Onun qeyd etməsinə görə, prezident tapşırıb ki, müharibə iştirakçılarına diqqət və qayğı göstərilməlidir: "Amma heç biri olmur. Səbəbini da bilmirik".

Onların vurğulamasına görə, artıq bir ildir ki, qəbullara gedirlər, müraciətlər yazırlar, amma nəticəsi yoxdur.

Şikayətçilərin qarşısına çıxan Müdafiə Nazirliyinin nümayəndəsi onlara bildirib ki, məsələ araşdırılacaq.

Xatırlatma

2020-ci ildə, İkinci Qarabağ müharibəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib. Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

100 milyon manat dəyərindən artıq əmlak üzərinə həbs qoyulub.

Bu rəqəm Baş Prokurorluqda 2021-ci ildə prokurorluq orqanlarının gördüyü işlərin və qarşıda duran vəzifələrin müzakirəsinə həsr olunan əməliyyat müşavirəsində səslənib.

Müşavirə yanvarın 8-də keçirilib, bununla bağlı qurumun mətbuat xidməti yanvarın 10-da məlumat yayıb.

Tədbirdə vurğulanıb ki, hesabat dövründə korrupsiya hüquqpozmasına yol verən 492 şəxs barəsində 301 cinayət işinin istintaqı tamamlanaraq məhkəmələrə göndərilib: "39 milyon 224 min manat ziyanın ödənilməsi təmin edilib. 101 milyon 373 min manat dəyərində əmlak üzərinə həbs qoyulub, eləcə də cinayət məsuliyyətindən azad olunmuş şəxslər tərəfindən mövcud qanunvericiliyin tələbinə uyğun olaraq dövlət büdcəsinə əlavə 2 milyon 195 min manat pul vəsaitinin ödənilməsi təmin olunub".

Açıqlamada ittiham edilən və əmlakları müsadirə edilən şəxslərin adları açıqlanmayıb.

Azərbaycanın Müdafiə Nazirliyi Kəlbəcər rayonu istiqamətində Azərbaycan ordusunun mövqelərinin Ermənistan tərəfdən atəşə tutulduğu barədə məlumat yayıb.

Yanvarın 8-də yayılan məlumatda deyilir ki:

"...saat 13:50 radələrində Ermənistan silahlı qüvvələrinin bölmələri Basarkeçər (Vardenis) rayonunun Yuxarı Şorca (Verin Shorzha)yaşayış məntəqəsi istiqamətindən AQS və iriçaplı silahlardan istifadə etməklə Azərbaycan Ordusunun Kəlbəcər rayonu ərazisində yerləşən mövqelərini atəşə tutub. Bölmələrimizin cavab tədbirləri nəticəsində qarşı tərəf susdurulub. Şəxsi heyət və texnikamızda itki yoxdur"- Müdafiə nazirliyi bildirir.

Məlumatda hazırda qeyd olunan istiqamətdə vəziyyətin sabit olduğu bildirilir.

Hələki bu məlumata Ermənistan müdafiə nazirliyindən hər hansı münasibət yoxdur.

Günün sonuna yaxın Ermənistan Müdafiə Nazirliyi Azərbaycan Müdafiə Nazirliyinin yaydığı xəbəri təkzib edib. Öz növbəsində qeyd edib ki, “bu ərazidə Azərbaycan bölmələri ardıcıl olaraq atəş açıb, amma Ermənistan tərəfi buna cavab verməyib”.

Nayirlik hazırda bütün Ermənistan-Azərbaycan sərhədi boyunca vəziyyət nisbətən sabit olduğunu bildirib.

Gənc fəal Qiyas İbrahimov yanvarın 7-də axşam saatlarında polisdən sərbəst buraxılıb.

Qiyas İbrahimov ona fiziki və mənəvi təzyiq olmadığını söyləyib.

***

Bugün, dekabrın 7-də gənc fəal Qiyas İbrahimov Prezident Administrasiyasının qarşısında saxlanıb. Gənc fəal Avropa İnsan Hüquqları Məhkəməsinin (AİHM) qərarı ilə ona çatacaq kompensasiyasının verilməməsinə görə etiraz etdiyini bildirib. Polis onu saxlayıb, aparıb.

Ərazidə olan jurnalistlərə qarşı təzyiq göstərildiyi bildirilir.

Daxili İşlər Nazirliyinin Mətbuat xidmətindən "Turan"a məsələ ilə bağlı açıqlama veriləcəyi söylənilib. Amma jurnalistlərə təzyiqin olmasını qurumdan inkar ediblər.

İki il öncə, fevralın 13-də AİHM Azərbaycandan gənc fəallar Qiyas İbrahimov və Bayram Məmmədovun verdiyi altı şikayət üzrə qərar çıxarmışdı. AİHM onların işgəncə, qanunsuz axtarış, məhkəmə öncəsi həbs, qeyri-insani rəftar şikayətlərini təmin edib. Məhkəmə fəalların Avropa İnsan Hüquqları Konvensiyasının 3-cü (işgəncələrin qadağan edilməsi), 5-ci (azadlıq və toxunulmazlıq hüququ), 10-cu ( ifadə azadlığı) və 18-ci (hüquqlarla bağlı məhdudiyyətlərdən istifadə həddi) maddələri üzrə hüquqlarının pozulduğu qənaətinə gəlib. Məhkəmənin qərarına əsasən, Azərbaycan hökuməti fəallara 60 min avro ödəməli idi.

Q.İbrahimovun bununla bağlı şikayətinə, hələlik, Prezident Administrasiyası və başqa rəsmi qurumlardan münasibət almaq mümkün olmayıb.

Xatırlatma

Q.İbrahimov digər gənc fəal B.Məmmədovla birgə 2016-cı il mayın 10-da Azərbaycanda saxlanmışdı. Rəsmi qurumlar onları narkotikdə ittiham edirdi. Məhkəmə qanunsuz narkotik maddə dövriyyəsi ittihamını təsdiqləyib onların hər birini 10 il azadlıqdan məhrum edib. Ancaq gənclər məhkəmədə deyiblər ki, narkotik ittihamını qəbul etmirlər. Onların keçmiş prezident, indiki dövlət başçısı İlham Əliyevin atası Heydər Əliyevin abidəsi üzərinə "Qul bayramınız mübarək!" şüarı yazılmasına görə həbs olunduqları bildirilirdi.

Onların hər ikisi 3 il öncə, martın 16-da imzalanan əfv sərəncamı ilə azadlığa buraxılıb. Hüquq müdafiəçiləri hər iki gənci siyasi məhbus sayıblar. Amma rəsmilər ölkədə siyasi məhbusların olması fikrini qəbul etmirlər.

B.Məmmədovun ötən il Türkiyədə dənizdə boğulduğu açıqlanıb. Yaxınları ölümün müəmmalı olduğunu güman edirlər. Türkiyə polisi isə B.Məmmədovun Moda adlanan ərazidə çəkələklərini dənizə saldığını və onu götürmək üçün əyildikdə dənizə düşdüyünü açıqlamışdı.

Zəngilan rayonunun Üçüncü Ağalı kəndində "Ağıllı kənd"in tikintisində çalışdıqlarını, amma aylarla əməkhaqqı almadıqlarını deyən bəzi şəxslər problemləri həll olunsa da, daha orada işləməyəcəklərini bildiriblər. Bu barədə "Turan"a onların özləri danışıblar.

Ötən ilin son günlərində Zəngilan rayonunun Üçüncü Ağalı kəndində "Ağıllı kənd"də çalışdıqlarını deyən bəzi şikayətçilərin müraciətləri yayılmışdı. Orada bildirilmişdi ki, həmin tikintidə iştirak edən 300-dək işçinin iki aydır əməkhaqqısı ödənilmir, heç əmək müqaviləsi belə bağlanmayıb. Onlar həmçinin, məişət şəraitinin pis olmasından da şikayətlənmişdilər.

"Məsələ işıqlandırılandan sonra problem öz həllini tapdı. Pulumuzu ödədilər. Amma biz orada işimizi davam etdirməkdən imtina etdik", - onlardan adının çəkilməsini istəməyən biri bu gün, yanvarın 7-də vurğulayıb.

Bu deyilənlərə, hələlik, rəsmi qurumlardan münasibət almaq mümkün olmayıb. Amma Kənd Təsərrüfatı Nazirliyindən bir müddət öncə "Turan"a bildirilmişdi ki, yaranmış vəziyyətdə fəhlələri işə götürən və onlarla ödəniş üsulunu nizamlamayan subpodrat təşkilat günahkardır. Vurğulandığına görə, şirkət bank vasitəsilə pul ödəməyi təklif edib, lakin işçilər pulu nağd şəkildə tələb ediblər, çünki bankomat vasitəsilə almaqda çətinlik çəkirlər: "Kənd Təsərrüfatı Nazirliyi inşaatçıların əməyinin ödənilməsində iştirak etmir. Biz, sadəcə, işləri ödəyən sifarişçiyik. Kənd Təsərrüfatı Nazirliyi bu məsələni araşdırıb, fəhlələrin problemi artıq həll olunub".

Kənd Təsərrüfatı Nazirliyindən müqavilə bağlayan və subpodratçıları işə götürən baş podratçının adını açıqlaya bilməyəcəklərini bildiriblər.

Şikayətçilərin özləri də subpodratçı şirkətin adını açıqlamayıb.

Xatırlatma

2020-ci ildə Azərbaycan işğal altında olan ərazilərinin üçdə iki hissəsini ( Zəngilan rayonu daxil) azad edib. Hazırda rayonun Ağalı kəndində "Ağıllı kənd" layihəsinin həyata keçirildiyi bildirilir. Bu layihədə məqsədin çağdaş texnologiyalardan istifadə etməklə həmin kəndin idarəçiliyində ən yüksək səmərəyə çatmağın olduğu açıqlanıb. Kənddə, hələlik, məskunlaşma yoxdur.

xeberman.com-un həbsdə olan rəhbəri Polad Aslanovun işinin yenidən araşdırılmasını istədiyi bildirilir.

Bu barədə onun həyat yoldaşı Gülmirə Aslanova məlumat verib. Onun sözlərinə görə, əri dünən, yanvarın 6-da gündüz görüşərkən deyib ki, işinin yenidən araşdırılması tələbi ilə aclıq aksiyasına da başlamaq niyyətindədir: "O mənə dedi ki, Prezident İlham Əliyevə, Baş prokuror Kamran Əsədova, Dövlət Təhlükəsizliyi Xidmətinin rəhbəri Əli Nağıyevə yazdığı heç bir müraciətə cavab verilmir. Əvvəlki Baş prokuror Zakir Qaralova yazanda, heç olmasa, cavab gəlirdi, indi, ümumiyyətlə, cavab yoxdur. Polad həmçinin, onun kassasiya şikayətinin baxılmamasından narazıdır. Ötən ilin fevralında apellyasiya şikayətinə baxılıb, amma Ali Məhkəmədə proses təyin edilməyib".

"Rəis deyir ki, sən müraciətləri çox sərt yazırsan"

G.Aslanovanın sözlərinə görə, son iki ay ərinin müraciətlərinin saxlandığı 1 saylı Cəzaçəkmə Müəssisəsindən kənara çıxmasına imkan verilmir: "Rəis deyir ki, sən müraciətləri çox sərt yazırsan".

O qeyd edib ki, P.Aslanov hazırda cəzaçəkmə müəssisəsinin müalicə müəssisəsindədir: "Polada qarşı təxribatlar olmuşdu, ona görə də əsəbləri tam pozulub. Həkim rəyinə əsasən onu müalicə müəssisəsinə yerləşdiriblər. Müalicə bitdi, amma hələ də orada saxlanılır".

Bu deyilənlərə, hələlik, Penitensiar Xidmət və başqa aidiyyəti qurumlardan münasibət öyrənmək mümkün olmayıb. Amma Xidmətdən, bir qayda olaraq, deyirlər ki, cəzaçəkmə müəssisələrində məhbuslarla yalnız qanun çərçivəsində davranılır.

Xatırlatma

xeberman.com saytının təsisçisi və baş redaktoru P.Aslanov 2019-cu ilin iyunun 12-də saxlanıb. O, Cinayət Məcəlləsinin 274-cü (dövlətə xəyanət) maddəsi ilə ittiham olunurdu.

Həmin ilin noyabrında P.Aslanov 16 il azadlıqdan məhrum edilib. Hökmə əsasən, P.Aslanov dövlətə xəyanətdə - İranın xüsusi xidmət orqanlarına casusluqda suçlu bilinib. O, özünü təqsirli bilmir.