İlham Əliyev 4 milyard xəbərini təkzib edir
Maliyyə nazirinin ardınca prezident İlham Əliyev Azərbaycanın xarici maliyyə qurumlarından 4 milyard dollarlıq yardım istəməsi barədə xəbərləri təkzib edib.
Ölkə başçısı yanvarın 29-da gənclərlə görüşündə deyib ki, “Azərbaycan hökumətinin Beynəlxalq Valyuta Fondu və Dünya Bankı ilə 4 milyard dollarlıq təcili yardım paketinin cəlb olunması ilə bağlı danışıqlar apardığı barədə yayılan xəbərlərin həqiqəti əks etdirmir.
Azərbaycanın xarici maliyyə qurumlarından yardım istəməsi ilə bağlı son günlərdə xarici mətbuatda gedən yazılar yalandan ibarətdir” (Apa).
Orduda rüşvət azalıb
Azərbaycanın hərbi prokuroru Xanlar Vəliyevin bildirdiyinə görə, hərbi xidmət əleyhinə cinayətlər 7,7 faiz, tabelik qaydası əleyhinə 20 faiz, tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma 26,3 faiz, silahla və ətrafdakılar üçün yüksək təhlükə törədən əşyalarla davranış qaydalarını pozma 33 faiz azalıb.Hərbi prokuror deyir ki, hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə cinayətləri 74 faiz, rüşvət alma və rüşvət vermə 71,5 faiz, ölüm hadisələri 2,3 faiz azalıb. O, ötən il bəzi növ cinayətlərdə cüzi artım olduğunu desə də, həmin cinayətlərin detallarına varmayıb.
İlham Əliyev: "Minsk qrupu məsələnin dondurulmasına çalışır"
“Ermənistanın danışıqlar prosesində vaxt uzadır, ATƏT-in Minsk qrupu isə məsələnin həllinə yox, dondurulmasına çalışır”.
APA-nın məlumatına görə, bu sözləri Azərbaycan prezidentİlham Əliyev Azərbaycan Gənclərinin Birinci Forumunun 20 illiyi münasibətilə ölkə gənclərinin bir qrupu ilə görüşü zamanı deyib.
323 məktəbdə, 240 uşaq bağçasında donuz qripinə qarşı dezinfeksiya
“İndiyə kimi “donuz qripi” təhlükəsinə qarşı 323 məktəb və 240 uşaq bağçasında dezinfeksiya işləri aparılıb”.
Bunu APA-ya açıqlamasında Bakı Şəhər Dezinfeksiya Stansiyasının baş həkimi Akif Məmmədov deyib.
O bildirib ki, dezinfeksiya işləri Bakı, Gəncə, Mingəçevir, Sumqayıt və Abşerondakı məktəb və bağçalarda aparılıb.
Baş həkim qeyd edib ki, məktəb və bağçalarda dezinfeksiya işləri bu həftənin sonunda başa çatdırılacaq.