-
"Bu fondun adının deyəsən, kimlərçünsə birbaşa mənasından əlavə, xüsusi prestiji var."
Nərmin Kamal
Kitabxanaçı müstəqilliyi
Kitabxanaçı müstəqilliyi də mətbuatın müstəqilliyi qədər vacib məsələdir. Hər nə qədər dərsinə gedib biblioqrafiya, kataloqlaşdırma oxuyursansa oxu, axırda kim sənə zəng edib hansı kitabı hansı bölməyə, hansı diski hansı kataloqa qoymağa göstəriş verirsə, onda üzə çıxır sənin oxuduğun qayda-qanun puç imiş.
M.F.Axundov adına Milli Kitabxana sovet vaxtı qurulub. Bu kitabxananın arxivi sovet dövründə konyukturaya uyğun kitablardan tərtib olunmuşdu. Bugün də belədir.
Ona görə yox ki, kitabxananın zallarında üzərində hakim ailə üzvlərinin fotoları olan yeni çıxmış jurnallar düzülür. Konyuktura özünü kitabxananın dibində, Nadir Kitablar Fondunda da göstərir.
Nadir Kitablar Fondunda hansı kitablar olmalıdır? Necə deyərlər, adından göründüyü kimi. Amma bu fondun deyəsən, kimlərçünsə birbaşa mənasından əlavə, xüsusi prestiji var.
Burada saxlanan kitabların adlarına baxanda görürsən ki, o qədər də nadir kitablar deyil, sadəcə konyukturaya uyğun kitablardır. Heydər Əliyev, Zərifə Əliyeva, Mir Cəlal Paşayev və bu sıradan başqaları haqqında yazılmış kitablar və disklər.
Bundan əlavə, Nadir Fonda qoyulan yeni kitabların müəllifləri vəzifələrinə görə seçilir.
Baş nazirin müavini, yazıçı Elçin, Mədəniyyət və Turizm Nazirliyinin sektor müdiri, şair Çingiz Əlioğlu və başqa məmur yazıçıların yeni kitabları Nadir Fonda qoyulur.
(Yazıdakı fikirlər müəllifin şəxsi mülahizələridir)
Fotolar