İnternetdə problemin səbəbi açıqlanıb
Azərbaycanda internetin fasiləsiz təminatında, internet-provayderlərin və istifadəçilərin internetə çıxışında problem yaranıb. Hazırda şəbəkədə fasilələr də yaranıb.
Rabitə və Yüksək Texnologiyalar Nazirliyindən (RYTN) "Report"a verilən məlumata görə, telekommunikasiya və informasiya texnologiyaları bazarında fəaliyyət göstərən əsas internet provayderi "Delta Telecom" şirkətinin şəbəkəsində problemlər baş verdiyindən bütün ölkə ərazisində də internetin yayımında fasilə yaranıb.
"Hazırda Rabitə və Yüksək Texnologiyalar Nazirliyi və "Delta Telecom" şirkətinin əməkdaşları baş vermiş problemin aradan qaldırılması və səbəblərinin aydınlaşması ilə əlaqədar araşdırma aparılır", - deyə RYTN-dən bildirilib.
23 qıza Məhəmməd, 86 oğlana Zəhra adı verilib
"Report" Ədliyyə Nazirliyinə istinadən xəbər verir ki, son beş ildə Azərbaycanda 4201 oğlana və 8 qıza Həsən adı verilib. İki qız uşağına isə Həsanağa adı qoyulub.
Eləcə də, son beş ildə 760 qıza, 7 oğlana Aygün, 172 oğlana , 4 qıza Səxavət, 288 oğlana və 3 qıza Ədalət, 2802 oğlana və 25 qıza Nurlan, 454 oğlana və 4 qıza Rövşən, 13 902 oğlana , 23 qıza Hüseyn, eyni zamanda, daha 23 qıza Məhəmməd, 20 minə yaxın qıza, eləcə də 86 oğlan uşağına Zəhra adı verilib.
Son beş ildə Nizami, Füzuli, Nəsimi, Məhsəti kimi Azərbaycan şairlərinin adını heç kim övladına verməyib.
Deputat olmayanlar indi neyləyəcək?
Modern.az saytı gələcək 5 ildə deputat olmayacaq hazırkı deputatların (artıq onlara eks-deputat deyə bilərik-red) yeni iş sahələrini öyrənə bilib.
Aydın Abbasov verdiyi sözü tutub. Məlumat üçün deyək ki, Aydın Abbasov Modern.az-a bundan əvvəlki açıqlamalarının birində Çin dilini öyrənəcəyini demişdi.Artıq o, Çin dilini öyrənməyə başlayıb.
“Axırıncı dəfə sizinlə danışandan dərhal sonra bu işə start verdim. Çinin iqtisadi modelini öyrənirəm. Araşdırmalar aparıram. Çin iqtisadiyyatı dünyada aparıcı fiqurlardan biridir. Eyni zamanda, yavaş-yavaş Çin dilini də öyrənməyə başlayacam. Əsas odur ki, bu yola çıxmışam. Ya çinlilər Azərbaycan dilini öyrənəcək, ya da mən Çin dilində danışacam”.
Elton Məmmədov isə elmi fəaliyyətini davam etdirəcək.
“Elmi-pedaqoji fəaliyyətimi davam etdirirəm. Elm sahəsi tədqiqatlarla zəngin olan sahədir. Ona görə də elmin hər dəqiqəsi yenilik deməkdir. Elmi-tədqiqat sahəsində aparılan iş elmə yenilik gətirir. Biz də bununla məşğuluq. Çünki layihələrin icrası zamanı aparılan tədqiqatlar əsas verir ki apardığımız və tərtib etdiyimiz elmi hesabatlarda bunların hamısı öz əksini tapır”.
Ceyhun Osmanlı da yeni planlarından danışaraq fəaliyyətə başladığını deyib.
"Artıq məni təbrik edə bilərsiniz. Türkiyə və Azərbaycanın birgə istehsalı olan əsasən türk aktyor, aktrisa rejissorların iştirak etdiyi film üzərində işləyirdik. Nəhayət, film bitib. Artıq Türkiyənin bütün sinemalarına bu film təqdim olunub. Film bir qarabağlı gəncin taleyindən bəhs edir. Filmdə dünyaya müharibənin insanların həyatında necə rol oynadığı göstərilib. Filmdə Qarabağ ideyası əsas yer alıb.Mən bu filmin prodüsserlərindən biriyəm."
İlham Əliyev G-20 sammitində Azərbaycanda əlverişli sərmayə mühitindən danışıb
Bu gün Türkiyənin Antalya şəhərində G-20 "Böyük İyirmilik" ölkələri liderlərinin sammiti çərçivəsində iqtisadi inkişaf, sərmayələr, məşğulluq mövzusunda keçirilən müzakirələrdə Azərbaycanın prezidenti İlham Əliyev çıxış edib.
AzərTac xəbər verir ki, Azərbaycan prezidenti Türkiyə Respublikasının Prezidenti Rəcəb Tayyib Ərdoğanın şəxsi dəvəti ilə Azərbaycanın ilk dəfə olaraq belə mötəbər beynəlxalq tədbirdə iştirak etdiyini vurğulayaraq bu dəvətə görə Türkiyə dövlətinin başçısına minnətdarlığını bildirib.
Sonra Azərbaycan prezidenti son vaxtlar Türkiyədə və Fransada baş vermiş terror aktları ilə əlaqədar Türkiyə və Fransa xalqlarına başsağlığı verib və bildirib ki, Azərbaycan Türkiyənin və Fransanın yanıdadır.
Daha sonra prezident İlham Əliyev çıxışında son illər Azərbaycanın iqtisadi inkişaf yolunda əldə etdiyi mühüm nailiyyətləri qeyd edib, ölkədə yaradılmış əlverişli sərmayə mühiti, işsizliyin aradan qaldırılması, yoxsulluğun kəskin şəkildə azaldılması istiqamətində görülən işlərdən danışıb.