ABŞ Suriyaya əlavə qüvvə göndərir

ABŞ prezidenti Barack Obama Suriya üsyançılarına məsləhət vermək üçün bu ölkəyə kiçik hərbi heyət göndərəcək.

Qərbin informasiya agentlikləri adı çəkilməyən ABŞ rəsmisinə istinadla xəbər verir ki, Suriyanın şimalında azı 50-dək xüsusi qüvvələr yerləşdiriləcək.

Bu qüvvələr İslam Dövləti qrupu ilə mübarizə aparan yerli qüvvələr və beynəlxalq koalisiyaya məsləhət verəcəklər.

ABŞ həmçinin F-16 və A-10c təyyarələri də daxil olmaqla Türkiyədəki İncirlik bazasına əlavə təyyarələr göndərəcək.

Qeyd edək ki, bu qərar Rusiyanın 1 aydır ki, Suriyada hava əməliyyatlarına başlamasından sonra qəbul edilib.

Oktyabrın 30-da Vyanada Suriya münaqişəsi ilə bağlı beynəlxalq sammit keçirilib.

Görüşdə 17 ölkənin xarici işlər nazirləri iştirak edib.

Tərəflər 2 həftə ərzində daha bir görüş keçirmək razılığına gəliblər.